તરસાલી ઔદ્યોગિક તાલીમ સંસ્થામાં સ્પોર્ટ્સ વીકનો સફળ સમાપન, વિજેતા ખેલાડીઓને મેડલ અને ટ્રોફીથી સન્માન
વડોદરાની ઔદ્યોગિક તાલીમ સંસ્થા (ITI), તરસાલી ખાતે તાલીમાર્થીઓમાં કૌશલ્યની સાથે રમતગમતની ભાવના ખીલે તેવા હેતુથી વાર્ષિક ‘સ્પોર્ટ્સ વીક’નું ભવ્ય આયોજન કરવામાં આવ્યું હતું. ૨૫ થી ૨૭ ફેબ્રુઆરી ૨૦૨૬ દરમિયાન યોજાયેલા આ રમતગમત મહોત્સવમાં ૪૦થી વધુ ટ્રેડના ૨૦૦૦થી વધુ તાલીમાર્થીઓએ ખૂબ જ ઉત્સાહ સાથે ભાગ લીધો હતો. આ ત્રણ દિવસ દરમિયાન વોલીબોલ, ખો-ખો, રસ્સાખેંચ, બેડમિન્ટન જેવી મેદાની રમતો તેમજ કેરમ અને સંગીત ખુરશી જેવી ઇન્ડોર રમતોની સ્પર્ધાઓ યોજાઈ હતી, જેમાં વિદ્યાર્થીઓએ પોતાની ખેલપ્રતિભાનું પ્રદર્શન કર્યું હતું.
વિજેતા ખેલાડીઓ માટે ઇનામ વિતરણ સમારોહ
રમતગમત સપ્તાહના સફળ સમાપન બાદ ૨ માર્ચ ૨૦૨૬ના રોજ સંસ્થા ખાતે એક વિશેષ ઇનામ વિતરણ કાર્યક્રમ રાખવામાં આવ્યો હતો. આ સમારોહમાં બેંક ઓફ બરોડાના સહયોગથી (CSR અંતર્ગત) વિજેતા બનેલા તાલીમાર્થીઓને મેડલ અને ટ્રોફી આપીને સન્માનિત કરવામાં આવ્યા હતા. સંસ્થાના આચાર્ય આર. શાસ્ત્રી દ્વારા તમામ મહેમાનોનું સ્વાગત કરવામાં આવ્યું હતું. તેમણે વિદ્યાર્થીઓને સમજાવ્યું હતું કે જીવનમાં શારીરિક તંદુરસ્તી અને માનસિક એકાગ્રતા માટે રમતગમત કેટલી અનિવાર્ય છે.
મહાનુભાવોની પ્રેરક ઉપસ્થિતિ અને સફળ આયોજન
આ ઇનામ વિતરણ પ્રસંગે આચાર્ય વાય. વી. પટેલ, બેંક ઓફ બરોડાના પ્રતિનિધિઓ મનીષ આનંદ અને દુર્ગેશ શુક્લા તેમજ યુનિયન પ્રમુખ કે. સી. વસાવા ખાસ હાજર રહ્યા હતા. આ મહાનુભાવોના હસ્તે ખેલાડીઓને પુરસ્કારો એનાયત કરવામાં આવ્યા હતા. સમગ્ર મહોત્સવનું સફળ સંચાલન સંસ્થાના સુપરવાઈઝર ઇન્સ્ટ્રક્ટરશ્રીઓ અને ઓરા સેલિબ્રેશન કમિટી દ્વારા કરવામાં આવ્યું હતું. આ કાર્યક્રમમાં આખું આઈટીઆઈ સ્ટાફ અને મોટી સંખ્યામાં તાલીમાર્થીઓ જોડાઈને રમતગમતના ઉત્સાહમાં સહભાગી બન્યા હતા.
