રેલવે કોલોનીના પ્રાચીન શ્રી રામેશ્વર મહાદેવ મંદિરમાં ખાટૂ શ્યામ, સાંવરિયા શેઠ અને ભારત માતાની મૂર્તિઓની પ્રાણ પ્રતિષ્ઠા, હર્ષ સંઘવીએ ભક્તોને સંબોધ્યા
વડોદરાના નવાયાર્ડ વિસ્તારમાં આવેલી રેલવે કોલોનીમાં અતિ પ્રાચીન શ્રી રામેશ્વર મહાદેવ મંદિર ખાતે ભક્તિમય વાતાવરણમાં મૂર્તિ પ્રાણ-પ્રતિષ્ઠા મહોત્સવ સંપન્ન થયો હતો. આ પ્રસંગે રાજ્યના નાયબ મુખ્યમંત્રી હર્ષભાઈ સંઘવીએ વિશેષ હાજરી આપી અખંડ જ્યોત અને કળશ યાત્રામાં ભાગ લીધો હતો. આ મહોત્સવ દરમિયાન મંદિરમાં ખાટૂ શ્યામ, સાંવરિયા શેઠ અને ભારત માતાની મૂર્તિઓની શાસ્ત્રોક્ત વિધિ મુજબ સ્થાપના કરવામાં આવી હતી. આ મંદિર વડોદરાની આસ્થાનું કેન્દ્ર છે, જ્યાં સ્વયંભૂ શિવલિંગ રેલવેના અસ્તિત્વ પૂર્વેથી બિરાજમાન છે.
જનભાગીદારી અને સામાજિક એકતાનું અનોખું ઉદાહરણ
મંદિરના જીર્ણોદ્ધારની ખાસ વાત એ છે કે આ ભવ્ય મંદિરનું નિર્માણ આસપાસની કોલોનીના દરેક પરિવારે સાથે મળીને કરેલા નાના-નાના દાનમાંથી થયું છે. મંત્રીશ્રીએ આ પ્રયાસને બિરદાવતા જણાવ્યું હતું કે, કોઈ મોટા દાતાના દાન કરતા પણ સામાન્ય પરિવારોના આ સહયોગનું મૂલ્ય અનેકગણું વિશેષ છે. આ કાર્ય લોકોની અતૂટ શ્રદ્ધા અને સામાજિક એકતાના દર્શન કરાવે છે. મંદિરના ભાવિ વિકાસ માટે તેમણે જાહેરાત કરી હતી કે જો ટ્રસ્ટ નવો પ્લાન રજૂ કરશે, તો ‘પવિત્ર યાત્રાધામ વિકાસ બોર્ડ’ દ્વારા રૂ. ૨૫ લાખની તાત્કાલિક સહાય આપવામાં આવશે.
દીકરીઓની સુરક્ષા અને ગુનેગારો સામે કડક કાયદાકીય કાર્યવાહી
કાર્યક્રમ દરમિયાન મંત્રીશ્રીએ મહિલા સુરક્ષા અંગે અત્યંત સંવેદનશીલ વાત કરી હતી. તેમણે જણાવ્યું કે જો કોઈ દીકરી અજાણતા અસામાજિક તત્વોનો શિકાર બને, તો સમાજે તેની ટીકા કરવાને બદલે સહાનુભૂતિ દાખવી તેને માનસિક ટેકો આપવો જોઈએ. તેમણે મક્કમ શબ્દોમાં ચેતવણી આપી હતી કે જે કોઈ ઈસમ નામ બદલીને કે ઓળખ છુપાવીને દીકરીઓને ફસાવશે, તેમની સામે સરકાર જિંદગીભર જેલની સજા થાય તેવા કડક કાયદાકીય પગલાં ભરશે. છેલ્લા એક વર્ષમાં પોલીસ તંત્રએ અનેક દીકરીઓને આવા વિષચક્રમાંથી મુક્ત કરાવી હોવાનો પણ તેમણે ઉલ્લેખ કર્યો હતો.
આધ્યાત્મિક મહાનુભાવો અને અગ્રણીઓની ગરિમામય ઉપસ્થિતિ
આ પ્રસંગે રાજ્ય મંત્રી મનીષાબેન વકીલ, મુખ્ય દંડક બાળકૃષ્ણ શુક્લ, મેયર પિન્કીબેન સોની અને ધારાસભ્ય કેયુર રોકડીયા સહિતના પદાધિકારીઓ હાજર રહ્યા હતા. સાથે જ નિત્યાનંદ પ્રભુજી અને પંકજકુમાર ગોસ્વામી જેવા સનાતન ધર્મના આધ્યાત્મિક વ્યક્તિત્વોએ આશીર્વાદ પાઠવ્યા હતા. મોટી સંખ્યામાં શ્રદ્ધાળુઓએ ઉમટી પડીને આ ધાર્મિક ઉત્સવને સફળ બનાવ્યો હતો. સરકારના હકારાત્મક અભિગમ અને સ્થાનિકોની શ્રદ્ધાથી આ પ્રાચીન સ્થળ હવે વધુ સુવિધાયુક્ત અને ભવ્ય બનવા તરફ જઈ રહ્યું છે.
