મહિલા દિવસ નિમિત્તે સુરતમાં ખેલો ઈન્ડિયા અને માય ભારતના સંયુક્ત ઉપક્રમે રમતોત્સવ
સુરત ખાતે આંતરરાષ્ટ્રીય મહિલા દિવસ નિમિત્તે કેન્દ્રીય યુવા બાબતો અને રમતગમત મંત્રાલયના માર્ગદર્શન હેઠળ ‘અસ્મિતા લીગ-૨૦૨૬’નું શાનદાર આયોજન કરવામાં આવ્યું હતું. ‘માય ભારત-સુરત’ અને ‘ખેલો ઈન્ડિયા સેન્ટર’ના સંયુક્ત ઉપક્રમે યોજાયેલ આ કાર્યક્રમ કેન્દ્રીય મંત્રી મનસુખ માંડવિયા અને રાજ્ય મંત્રી રક્ષા ખડસેના વિઝનને સાકાર કરવાના ભાગરૂપે યોજાયો હતો. દેશભરના ૨૫૦ જિલ્લાઓમાં એકસાથે યોજાયેલા આ કાર્યક્રમ અંતર્ગત સુરતમાં વિજેતા મહિલા ખેલાડીઓને મહાનુભાવોના હસ્તે મેડલ અને પ્રમાણપત્રો આપી સન્માનિત કરવામાં આવ્યા હતા.
૫૦૦થી વધુ મહિલા એથ્લેટ્સ વચ્ચે ખરાખરીનો જંગ
સુરતમાં યોજાયેલી આ અસ્મિતા લીગમાં ૧૦૦ મીટર, ૨૦૦ મીટર અને ૪૦૦ મીટરની દોડ સ્પર્ધાઓનું આયોજન કરવામાં આવ્યું હતું. આ સ્પર્ધાઓ મુખ્યત્વે અંડર-૧૩, ૧૩ થી ૧૮ વર્ષ અને ૧૮ વર્ષથી ઉપરની એમ ત્રણ શ્રેણીઓમાં વહેંચાયેલી હતી. જેમાં સુરતની ૫૦૦ થી વધુ મહિલા એથ્લેટ્સે ઉત્સાહભેર ભાગ લીધો હતો. મેદાન પર ખેલાડીઓનો જુસ્સો વધારવા માટે ૧૦૦૦ થી વધુ મહિલા પ્રેક્ષકો પણ હાજર રહ્યા હતા, જેના કારણે સમગ્ર વાતાવરણ રમતમય અને જોશભર્યું બની ગયું હતું.
રમતગમત દ્વારા મહિલા સશક્તિકરણ અને ફિટનેસનો સંદેશ
આ કાર્યક્રમમાં સુરત મહાનગરપાલિકાના હોદ્દેદારો અને રમતગમત વિભાગના અધિકારીઓ મોટી સંખ્યામાં ઉપસ્થિત રહ્યા હતા. કાર્યક્રમનો મુખ્ય હેતુ રમતગમત દ્વારા મહિલાઓમાં આત્મવિશ્વાસ, ફિટનેસ અને સશક્તિકરણની ભાવના જગાડવાનો હતો. ઉપસ્થિત વક્તાઓએ જણાવ્યું હતું કે આવી સ્પર્ધાઓથી નાની બાળાઓ અને મહિલાઓને શારીરિક પ્રવૃત્તિઓમાં જોડાવાની અને પોતાની શક્તિને ઓળખવાની નવી પ્રેરણા મળે છે. સ્થાનિક કોચ અને વોલેન્ટિયર્સની મહેનતથી આ સમગ્ર આયોજન સફળતાપૂર્વક સંપન્ન થયું હતું.
