‘MS ધોનીને ટીમમાંથી બહાર કરવા કોઈ કહી શકતું નથી’ CSKના પૂર્વ ખેલાડીએ કેમ આવું કહ્યું?
મહેન્દ્ર સિંહ ધોની આગામી ઈન્ડિયન પ્રીમિયર લીગ (IPL) સીઝન માટે ફરી એકવાર ચેન્નાઈ સુપર કિંગ્સ (CSK) ના પીળા ગણવેશમાં મેદાન પર ઉતરવા માટે તૈયાર છે. ફ્રેન્ચાઈઝીના CEO કાશી વિશ્વનાથ દ્વારા પહેલા જ પુષ્ટિ કરવામાં આવી છે કે આ અનુભવી ખેલાડી આખા ટુર્નામેન્ટ માટે ઉપલબ્ધ રહેશે. જોકે, પ્લેઈંગ ઈલેવનમાં તેમની ચોક્કસ ભૂમિકા હજુ નક્કી થઈ નથી. મેનેજમેન્ટ ધોનીને વિકેટકીપર તરીકે રાખશે કે ‘ઈમ્પેક્ટ પ્લેયર’ તરીકે, તે મોટો પ્રશ્ન છે. આ દરમિયાન સીએસકેના પૂર્વ બેટ્સમેન સુબ્રમણ્યમ બદ્રીનાથે ધોનીના કદ અને ટીમમાં તેમના સ્થાન વિશે મોટું નિવેદન આપ્યું છે.
ધોનીનું પ્રદર્શન અને બદ્રીનાથનો તર્ક
આઈપીએલ 2025 ધોની માટે સરેરાશ રહી હતી, જેમાં તેણે 14 મેચોમાં 196 રન બનાવ્યા હતા. તેનો સ્ટ્રાઈક રેટ 135.17 રહ્યો હતો અને તે મોટે ભાગે નીચલા ક્રમે બેટિંગ કરવા આવતો હતો. ધોનીની ભૂમિકા અંગે વાત કરતા બદ્રીનાથે તેની યુટ્યુબ ચેનલ પર જણાવ્યું હતું કે, સીએસકેમાં ધોનીનું કદ એટલું વિશાળ છે કે મુખ્ય કોચ સ્ટીફન ફ્લેમિંગ પણ તેને પ્લેઈંગ ઈલેવનમાંથી બહાર રાખવાનો નિર્ણય લેતા પહેલા સો વાર વિચારશે.
બદ્રીનાથે કહ્યું, “મને ખબર નથી કે આ કોઈ વહીવટી નિર્ણય છે કે નહીં, પરંતુ શું ફ્લેમિંગ ધોની પાસે જઈને કહી શકશે કે ‘તમે આ મેચ ન રમો, અમે તમને ટીમમાંથી બહાર કરી રહ્યા છીએ’? મને નથી લાગતું કે ફ્લેમિંગ પાસે આવું કરવાની કોઈ તક છે. તેઓ ધોનીને ટીમમાંથી કાઢી મૂકવા વિશે વાત કેવી રીતે કરી શકે? મને ખરેખર લાગે છે કે આવું કરવું અશક્ય છે.”
ઈમ્પેક્ટ પ્લેયરની ભૂમિકા પર સવાલ
બદ્રીનાથ માને છે કે ધોની પ્રત્યે સીએસકે કેમ્પમાં અપાર સન્માન છે. તેથી કોચ કે સપોર્ટ સ્ટાફ માટે ધોનીને તેની ભૂમિકા ટૂંકી કરવા માટે કહેવું લગભગ અશક્ય છે. તેમણે ઉમેર્યું, “દુનિયામાં એવો કોઈ સપોર્ટ સ્ટાફ નથી, પછી ભલે તે ફ્લેમિંગ હોય, જે ધોનીને કહી શકે કે ‘તમે માત્ર ઈમ્પેક્ટ પ્લેયર છો’ અથવા ‘તમે આ મેચ નહીં રમો’. આવી કોઈ શક્યતા જ નથી. આપણે એવું માનીને ચાલી શકીએ છીએ કે તે બધી જ મેચો રમશે.”
CSK માટે ધોનીનું મહત્વ
ધોની માત્ર એક ખેલાડી નથી પણ સીએસકેની ઓળખ છે. ભલે તે છેલ્લી ઓવરોમાં બેટિંગ કરવા આવે, પરંતુ તેની મેદાન પરની હાજરી જ ટીમ અને ફેન્સ માટે મોટું મનોબળ પૂરું પાડે છે. ગત સીઝનમાં પણ તેણે છેલ્લી ઓવરોમાં ઝડપી રન બનાવીને ટીમને ઘણી વખત મજબૂત સ્થિતિમાં પહોંચાડી હતી. હવે જોવાનું એ રહેશે કે શું ધોની ફરી એકવાર વિકેટ પાછળ ગ્લોવ્સ પહેરીને જોવા મળશે કે પછી મેનેજમેન્ટ તેને માત્ર બેટિંગ માટે ‘ઈમ્પેક્ટ પ્લેયર’ તરીકે મેદાનમાં ઉતારશે.
