ઉમરેઠ વિધાનસભાની પેટા ચૂંટણી ૨૩ એપ્રિલે, જિલ્લા ચૂંટણી અધિકારી પ્રવીણ ચૌધરીએ આદર્શ આચારસંહિતાના કડક અમલની જાહેરાત કરી

ઉમરેઠ વિધાનસભામાં ૨,૪૨,૮૩૬ મતદારો અને ૩૦૬ મતદાન મથકો સાથે પારદર્શક પેટા ચૂંટણી યોજાશે

આણંદ જિલ્લાની ઉમરેઠ વિધાનસભા બેઠક પર પેટા ચૂંટણીની જાહેરાત સાથે જ સમગ્ર વિસ્તારમાં આદર્શ આચાર સંહિતા અમલી બની છે. પૂર્વ ધારાસભ્ય ગોવિંદભાઈ પરમારના અવસાનથી ખાલી પડેલી આ બેઠક માટે આગામી ૨૩ એપ્રિલ ૨૦૨૬ના રોજ મતદાન યોજાશે. જિલ્લા ચૂંટણી અધિકારી અને કલેક્ટર પ્રવીણ ચૌધરીએ પત્રકાર પરિષદમાં જણાવ્યું હતું કે, ચૂંટણી પ્રક્રિયા મુક્ત, ન્યાયી અને પારદર્શક વાતાવરણમાં યોજાય તે માટે તંત્ર દ્વારા તમામ તૈયારીઓ કરી લેવામાં આવી છે. આચાર સંહિતાના અમલના ભાગરૂપે જાહેર સ્થળો પરથી રાજકીય બેનરો અને હોર્ડિંગ્સ હટાવવાની કામગીરી પણ શરૂ કરી દેવામાં આવી છે.

મતદારોની આંકડાકીય વિગત અને મતદાન મથકોની વ્યવસ્થા

ઉમરેઠ વિધાનસભા મતવિસ્તારમાં આ વખતે કુલ ૨,૪૨,૮૩૬ નોંધાયેલા મતદારો પોતાના મતાધિકારનો ઉપયોગ કરશે. આંકડાકીય વિગત મુજબ, ૧,૦૫,૯૯૦ પુરુષ મતદારો અને ૧,૦૦,૯૦૯ મહિલા મતદારોનો સમાવેશ થાય છે. ચૂંટણી પંચ દ્વારા મતદારોની સુવિધા માટે કુલ ૩૦૬ મતદાન મથકો ઉભા કરવામાં આવ્યા છે. દરેક મતદાન મથક પર આધુનિક ઇલેક્ટ્રોનિક વોટિંગ મશીન (EVM) અને વીવીપેટ (VVPAT) નો ઉપયોગ કરવામાં આવશે, જેથી મતદાનની વિશ્વસનીયતા જળવાઈ રહે અને મતદારો કોઈપણ શંકા વગર વોટ આપી શકે.

ચૂંટણી ખર્ચ પર દેખરેખ અને ફરિયાદો માટે હેલ્પલાઇન

ચૂંટણી દરમિયાન ઉમેદવારોના ખર્ચ પર કડક નજર રાખવા માટે નાયબ જિલ્લા વિકાસ અધિકારીની નોડલ અધિકારી તરીકે નિમણૂંક કરવામાં આવી છે. આ ઉપરાંત, આચાર સંહિતાના ભંગ અને ગેરરીતિ રોકવા માટે ફ્લાઈંગ સ્ક્વોડ (FST) અને સ્ટેટિક સર્વેલન્સ (SST) જેવી વિવિધ ટીમો કાર્યરત કરવામાં આવી છે. જો કોઈ નાગરિકને ચૂંટણીલક્ષી ફરિયાદ હોય, તો તેઓ ટોલ ફ્રી નંબર ૧૮૦૦-૪૨૫-૨૫૬૦ પર સંપર્ક કરી શકે છે. વહીવટી તંત્ર દ્વારા દરેક ગતિવિધિ પર ચાંપતી નજર રાખવામાં આવશે જેથી આર્થિક કે અન્ય લાલચો વગર લોકશાહીનો ઉત્સવ ઉજવાય.

ઉમરેઠ વિધાનસભા પેટા ચૂંટણી ૨૦૨૬ માટે આણંદ ખાતે મીડિયા મોનિટરિંગ સેન્ટર કાર્યરત

આણંદ મનપા વિસ્તારમાં બે દિવસમાં જ ૩૯ લાખથી વધુ મિલકત વેરાની વસુલાત

લોકશાહીના પર્વમાં સહભાગી થવા કલેક્ટરની અપીલ

જિલ્લા ચૂંટણી અધિકારીએ ઉમરેઠ વિધાનસભાના તમામ મતદારોને લોકશાહીના આ પર્વમાં ઉત્સાહભેર જોડાઈને ફરજિયાત મતદાન કરવા ખાસ અપીલ કરી છે. પત્રકાર પરિષદ દરમિયાન મીડિયાના માધ્યમથી મતદારોને જાગૃત કરવા અને વધુમાં વધુ મતદાન થાય તેવા પ્રયાસો પર ભાર મૂકવામાં આવ્યો હતો. નાયબ જિલ્લા ચૂંટણી અધિકારી અનિતાબેન લાછુન સહિતના અધિકારીઓની ઉપસ્થિતિમાં યોજાયેલી આ બેઠકમાં સ્પષ્ટ કરવામાં આવ્યું હતું કે, વહીવટી તંત્ર મજબૂત સુરક્ષા વ્યવસ્થા અને સુવિધાઓ સાથે સજ્જ છે, જેથી પ્રત્યેક મતદાર નિર્ભય બનીને પોતાના મતાધિકારનો ઉપયોગ કરી શકે.