ઈરાન સાથેના જંગનો ફફડાટ? અમેરિકાએ મિડલ ઈસ્ટમાંથી 3 પૈકી 2 ‘માઈન્સ શિપ’ હટાવ્યા
અમેરિકા અને ઈરાન વચ્ચેના સંઘર્ષની વચ્ચે એક ચોંકાવનારી વિગત સામે આવી છે. અમેરિકી નૌસેનાના ત્રણ મુખ્ય માઈન્સ (દરિયાઈ સુરંગ) શોધનારા અને તેને હટાવનારા જહાજો પૈકી બે જહાજો મિડલ ઈસ્ટથી હજારો માઈલ દૂર એશિયામાં જોવા મળ્યા છે. આ ઘટનાએ હોર્મુઝ સ્ટ્રેટની સુરક્ષાને લઈને મોટા સવાલો ઉભા કર્યા છે, કારણ કે આ દરિયાઈ માર્ગ હાલમાં ઈરાન દ્વારા બિછાવવામાં આવેલી સુરંગોને કારણે લગભગ બંધ જેવી સ્થિતિમાં છે.
એશિયામાં જોવા મળ્યા અમેરિકી જહાજો
અહેવાલો અનુસાર, USS તુલસા અને USS સાન્ટા બાર્બરા નામના બે જહાજોને તાજેતરમાં મલેશિયાના પેનાંગ રાજ્યના કન્ટેનર ટર્મિનલ પર લાંગરેલા જોવામાં આવ્યા હતા. આ સ્થળ બહેરીનમાં આવેલા તેમના કાયમી બેઝથી અંદાજે 3,500 માઈલ દૂર છે. સામાન્ય રીતે આ જહાજો મિડલ ઈસ્ટમાં યુએસ નેવીની ‘ફિફ્થ ફ્લીટ’ હેઠળ કાર્યરત હોય છે. પેન્ટાગોન કે અમેરિકી સેન્ટ્રલ કમાન્ડે આ જહાજોને ત્યાંથી ખસેડવા પાછળનું કોઈ સ્પષ્ટ કારણ આપ્યું નથી.
અત્યાધુનિક પણ ‘બિનઅનુભવી’ ટેકનોલોજી?
આ બંને જહાજો ‘ઇન્ડિપેન્ડન્સ ક્લાસ’ ના છે અને દરિયામાં છુપાયેલા વિસ્ફોટકોને શોધવા માટે અંડરવોટર ડ્રોન, સોનાર અને હેલિકોપ્ટર જેવી અત્યાધુનિક સિસ્ટમથી સજ્જ છે. જોકે, સંરક્ષણ નિષ્ણાતો માને છે કે આ જહાજોની ટેકનોલોજી હજુ સુધી વાસ્તવિક યુદ્ધમાં સંપૂર્ણ રીતે સાબિત થઈ નથી. આ જહાજો કદમાં મોટા હોવાથી માઈન્સવાળા સમુદ્રમાં તેને ઓપરેટ કરવા જોખમી સાબિત થઈ શકે છે. હાલમાં માત્ર એક જ જહાજ, USS કેનબેરા, ખાડી વિસ્તારમાં હોવાનું મનાય છે.
ઈરાને દરિયામાં બિછાવ્યું સુરંગોનું જાળું
ખુફિયા એજન્સીઓના અંદાજ મુજબ, ઈરાને હોર્મુઝ સ્ટ્રેટમાં જહાજોની અવરજવર રોકવા માટે દરિયાની સપાટી પર અને તળિયે 5,000 થી વધુ માઈન્સ (દરિયાઈ સુરંગો) બિછાવી દીધી છે. 28 ફેબ્રુઆરીએ અમેરિકા અને ઈઝરાયેલની સૈન્ય કાર્યવાહી શરૂ થયા બાદ ઈરાને આ વ્યૂહાત્મક રસ્તો લગભગ બંધ કરી દીધો છે. છેલ્લા બે અઠવાડિયાથી ઠપ્પ થયેલા આ માર્ગને ખોલવા માટે અમેરિકા તમામ પ્રયાસો કરી રહ્યું છે, જેમાં તાજેતરમાં ઈરાનની 16 માઈન્સ બિછાવનારી બોટને તબાહ કરવાનો પણ સમાવેશ થાય છે.
સહયોગી દેશોનું વલણ
અમેરિકી રાષ્ટ્રપતિ ડોનાલ્ડ ટ્રમ્પે ચીન, ફ્રાન્સ, જાપાન અને દક્ષિણ કોરિયા જેવા દેશો પાસે હોર્મુઝ સ્ટ્રેટ ખોલવા માટે મદદ માંગી હતી. જોકે, બ્રિટને ડ્રોન મોકલવાની તૈયારી દર્શાવી છે, પરંતુ જાપાન અને ઓસ્ટ્રેલિયાએ હાલમાં તેમના સૈન્ય સંસાધનો મોકલવાનો સ્પષ્ટ ઇનકાર કરી દીધો છે. આ સંજોગોમાં અમેરિકા માટે આ મહત્વનો જળમાર્ગ સુરક્ષિત કરવો એક મોટો પડકાર બની રહ્યો છે.
