જિલ્લા વિકાસ અધિકારી નવલદાન ગઢવીના અધ્યક્ષસ્થાને મિશન લાઇફ બેઠક
મોરબી જિલ્લા સેવા સદન ખાતે ભારત સરકારના ‘મિશન લાઇફ’ (લાઇફ સ્ટાઇલ ફોર એન્વાર્યમેન્ટ) પ્રોજેક્ટ અંગે એક મહત્વની બેઠક યોજાઈ હતી. જિલ્લા વિકાસ અધિકારી નવલદાન ગઢવીના અધ્યક્ષસ્થાને મળેલી આ બેઠકમાં પર્યાવરણના જતન અને આબોહવા પરિવર્તનની અસરોને ઘટાડવા માટેના વિવિધ મુદ્દાઓ પર ચર્ચા કરવામાં આવી હતી. સામાજિક વનીકરણ વિભાગના નાયબ વન સંરક્ષક અને મિશન લાઇફના નોડલ ઓફિસર યુવરાજસિંહ ઝાલાએ સમગ્ર બેઠકનું સંચાલન કર્યું હતું અને જિલ્લાના વિવિધ સરકારી વિભાગોને પર્યાવરણ લક્ષી કામગીરી સોંપી હતી.
સભાન જીવનશૈલી અને જન આંદોલન પર વિશેષ ભાર
નાયબ વન સંરક્ષક યુવરાજસિંહ ઝાલાએ મિશન લાઇફના ઉમદા હેતુ વિશે વાત કરતા જણાવ્યું હતું કે, હાલમાં સમગ્ર વિશ્વ પર્યાવરણીય કટોકટીનો સામનો કરી રહ્યું છે ત્યારે ભારત આ દિશામાં વિશ્વને નવો માર્ગ બતાવી રહ્યું છે. આ મિશનનો મુખ્ય ઉદ્દેશ્ય સંસાધનોના આડેધડ વપરાશને બદલે વિચારપૂર્વક અને પર્યાવરણને અનુકૂળ જીવનશૈલી અપનાવવાનો છે. વર્ષ ૨૦૨૭ સુધીમાં વધુને વધુ લોકો સાતત્યપૂર્ણ જીવનશૈલી અપનાવે અને પર્યાવરણ સાથે સંતુલન જાળવીને જીવે તે દિશામાં આ એક મોટું જન આંદોલન બની રહ્યું છે.
મિયાવાકી પદ્ધતિથી વન અને ગ્રીન એનર્જીનો પ્રચાર
આ બેઠકમાં પર્યાવરણ સુરક્ષા માટે કેટલાક નક્કર આયોજનો કરવામાં આવ્યા હતા. મોરબી જિલ્લામાં સામાજિક વનીકરણ વિભાગ દ્વારા ‘મિયાવાકી’ પદ્ધતિનો ઉપયોગ કરીને ગાઢ વન બનાવવામાં આવશે અને મોટા પાયે વૃક્ષારોપણ કરવામાં આવશે. આ ઉપરાંત, સરકારી કચેરીઓમાં વોટર હાર્વેસ્ટિંગ સિસ્ટમ અને સોલાર રૂફટોપનો ઉપયોગ વધારવા પર ભાર મૂકવામાં આવ્યો હતો. ઉર્જાની બચત અને કુદરતી સ્ત્રોતોના રક્ષણ માટે આ કામગીરીને પ્રાથમિકતા આપવા સંબંધિત અધિકારીઓને સૂચનાઓ આપવામાં આવી હતી.
પ્લાસ્ટિક મુક્તિ અને જનજાગૃતિના વિવિધ આયામો
પર્યાવરણમાં થતા પ્રદૂષણને અટકાવવા માટે પ્લાસ્ટિકના બદલે કાપડની થેલીઓનો ઉપયોગ કરવા અને તેના વિતરણ માટેની યોજના બનાવવામાં આવી હતી. ઇ-વેસ્ટના ઘટાડા અને પરિવહન માટે સાયકલના ઉપયોગને પ્રોત્સાહન આપવા અંગે પણ ચર્ચા થઈ હતી. બેઠકમાં પ્રાંત અધિકારી ઉમંગ પટેલ સહિત શિક્ષણ અને આરોગ્ય વિભાગના ઉચ્ચ અધિકારીઓ હાજર રહ્યા હતા. તમામ અધિકારીઓને પોતપોતાના ક્ષેત્રમાં પર્યાવરણ જાળવણી અંગે જનજાગૃતિ ફેલાવવા અને મિશન લાઇફના લક્ષ્યાંકોને સફળ બનાવવા માટે કટિબદ્ધ થવા જણાવાયું હતું.
