મિશન લાઈફ અંતર્ગત ફનફેસ્ટમાં બાળકોની રમતો અને અધિકારીઓની ભાગીદારીથી સર્જાયું અનોખું દૃશ્ય
તાપી જિલ્લામાં ‘મિશન લાઈફ’ અભિયાન અંતર્ગત આયોજિત ‘તાપી ફનફેસ્ટ-2026’માં વ્યારાનું સયાજી ગ્રાઉન્ડ ઉત્સાહ અને ઉમંગથી છલકાઈ ગયું હતું. મેદાનના એક ભાગમાં રસ્સાખેંચ અને કબડ્ડી જેવી પરંપરાગત રમતોમાં ખેલાડીઓની શારીરિક અને બૌદ્ધિક ચપળતા જોવા મળતી હતી, જે પ્રેક્ષકોમાં ભારે રોમાંચ જગાડતી હતી. તો બીજી તરફ, મેદાનના બીજા છેડે નાના ભૂલકાઓના નિર્દોષ કિલ્લોલ અને ખડખડાટ હાસ્યએ સમગ્ર વાતાવરણને જીવંત અને આનંદમય બનાવી દીધું હતું. આ ફનફેસ્ટ દ્વારા રમતગમત સાથે પર્યાવરણ અને ફિટનેસનો સુંદર સમન્વય સાધવામાં આવ્યો હતો.
ભૂલકાઓની રમતિયાળ ચાલાકી અને નિર્દોષ આનંદની છોળો
ફનફેસ્ટમાં સૌથી વધુ આકર્ષણનું કેન્દ્ર નાના બાળકોની વિવિધ રમતો રહી હતી. લીંબુ-ચમચીની દોડમાં જ્યારે ટાબરિયાઓ પૂરી એકાગ્રતાથી ચાલતા હતા, ત્યારે તેમની નિર્દોષ ભૂલોમાં પણ વહાલ વરસતું હતું. કોઈ બાળકની ચમચીમાંથી લીંબુ પડી જાય તો તે ચુપકેથી ખિસ્સામાં મૂકી દઈને ફિનિશિંગ લાઇન પાસે ફરી ગોઠવી દેવાની તેમની રમતિયાળ ચાલાકીએ સૌના દિલ જીતી લીધા હતા. આ નાનકડા ભૂલકાઓએ પોતાની અનોખી શૈલીમાં રમત રમીને બાળપણની સાચી મજા માણી હતી અને ઉપસ્થિત સૌનું મનોરંજન કર્યું હતું.
કોથળા દોડ અને કેળા કૂદમાં જોવા મળ્યો અદભૂત ઉત્સાહ
મેદાનમાં જ્યારે ‘કોથળા દોડ’ શરૂ થઈ ત્યારે દ્રશ્યો ખરેખર જોવા જેવા હતા. પગ કોથળામાં ફસાયેલા હોવા છતાં નાના બાળકો કાંગારૂની જેમ કુદકા મારીને જે રીતે આગળ વધતા હતા, તે જોઈને આખું મેદાન હાસ્યના ગુંજારવથી ભરાઈ ગયું હતું. કોઈ બાળક સંતુલન ગુમાવીને ગબડી પડતું તો ફરી પાછું તરત ઊભું થઈને લક્ષ્ય તરફ દોડવા માંડતું હતું. આ સાથે જ ‘કેળા કૂદ’માં પણ બાળકોની અદભૂત ચપળતા અને સ્ફૂર્તિએ સૌને અચંબિત કરી દીધા હતા, જે દર્શાવે છે કે રમતગમત બાળકના સર્વાંગી વિકાસ માટે કેટલી જરૂરી છે.
વહીવટી તંત્રના ઉચ્ચ અધિકારીઓની બાળકો સાથે સહજ મસ્તી
કાર્યક્રમનું સૌથી યાદગાર અને હૃદયસ્પર્શી દ્રશ્ય ત્યારે સર્જાયું જ્યારે જિલ્લા કલેક્ટર ડૉ. વિપીન ગર્ગ અને તેમનો પરિવાર, તેમજ નિવાસી અધિક કલેક્ટર આર. આર. બોરડ બાળકોની મસ્તીમાં જોડાઈ ગયા હતા. કલેક્ટરશ્રીએ જ્યારે નાના ભૂલકાઓ સાથે ખભેખભા મિલાવીને દોડ લગાવી, ત્યારે આખું મેદાન તાળીઓના ગડગડાટથી ગુંજી ઉઠ્યું હતું. વહીવટી તંત્રના ઉચ્ચ અધિકારીઓની આ સહજતા અને મિલનસાર સ્વભાવે ‘મિશન લાઈફ’ના આ કાર્યક્રમને માત્ર સફળ જ નહીં, પરંતુ સૌના માટે કાયમ યાદગાર બનાવી દીધો હતો.
