નેશનલ લેવલે સાબરકાંઠાના ખેલાડીઓની સિદ્ધિ, ગુજરાત માટે ગૌરવ અને દિવ્યાંગો માટે પ્રેરણા
બિહારના પટનામાં સ્થિત પાટલીપુત્ર સ્પોર્ટ્સ કોમ્પ્લેક્સ ખાતે ૧૩ થી ૧૫ માર્ચ દરમિયાન ૨૧મી નેશનલ એથ્લેટિક્સ ચેમ્પિયનશિપ ફોર સેરેબ્રલ પાલ્સીનું ભવ્ય આયોજન કરવામાં આવ્યું હતું. આ પ્રતિષ્ઠિત સ્પર્ધામાં દેશના ૧૯ રાજ્યોમાંથી ૩૦૦થી વધુ ખેલાડીઓએ પોતાનું કૌશલ્ય બતાવ્યું હતું. જેમાં ગુજરાતના ૪૦ ખેલાડીઓએ ભાગ લીધો હતો. આ સ્પર્ધામાં સાબરકાંઠા જિલ્લાના બે ખેલાડીઓએ પોતાની શારીરિક મર્યાદાઓને હરાવીને કુલ ૩ ગોલ્ડ મેડલ જીતી રાજ્ય અને જિલ્લાનું નામ દેશભરમાં રોશન કર્યું છે.
ઇડરના ધર્મ સગરે જીત્યા બે સુવર્ણ ચંદ્રકો
સાબરકાંઠા જિલ્લાના ઇડર તાલુકાના સાબલી ગામના વતની ધર્મ જીગરભાઈ સગરે સબ-જુનિયર કેટેગરીમાં અદભૂત પ્રદર્શન કર્યું હતું. ૧૨ થી ૧૫ વર્ષની વય મર્યાદામાં ભાગ લેતા ધર્મે ગોળા ફેંક અને ભાલા ફેંક એમ બંને સ્પર્ધાઓમાં પ્રથમ ક્રમ મેળવીને બે ગોલ્ડ મેડલ પોતાના નામે કર્યા છે. તેની આ બેવડી સફળતાએ સાબિત કરી દીધું છે કે જો મનમાં દ્રઢ સંકલ્પ અને મહેનત કરવાની તૈયારી હોય, તો સેરેબ્રલ પાલ્સી જેવી ગંભીર સ્થિતિ પણ સફળતાના આડે આવી શકતી નથી.
વિજયનગરના અજય મોડીયાની સુવર્ણ સિદ્ધિ
વિજયનગર તાલુકાના ખેલાડી અજય મોડીયાએ પણ રાષ્ટ્રીય કક્ષાએ પોતાની પ્રતિભાનો પરચો આપ્યો છે. અજયે F-35 કેટેગરીમાં ગોળા ફેંકની સ્પર્ધામાં ભાગ લીધો હતો અને પોતાની શક્તિના જોરે સુવર્ણ ચંદ્રક જીતી લીધો હતો. આમ, અજય અને ધર્મની જોડીએ મળીને સાબરકાંઠા જિલ્લાની ઝોળીમાં કુલ ૩ ગોલ્ડ મેડલ નાખ્યા છે. આ ખેલાડીઓની જીત પાછળ તેમની વર્ષોની મહેનત અને પરિવારે આપેલા પ્રોત્સાહનનો મોટો ફાળો રહ્યો છે.
દિવ્યાંગો માટે પ્રેરણારૂપ સફળતા અને અભિનંદન
સેરેબ્રલ પાલ્સી ધરાવતા બાળકો માટે આ જીત માત્ર એક મેડલ નથી, પરંતુ સમાજમાં સન્માનજનક સ્થાન મેળવવાની એક નવી દિશા છે. સાબરકાંઠા જિલ્લા વહીવટી તંત્ર અને યુવા વિકલાંગ સંગઠન મંડળ દ્વારા આ બંને વિજેતાઓને હાર્દિક અભિનંદન પાઠવવામાં આવ્યા છે. આ ખેલાડીઓની સિદ્ધિ અન્ય દિવ્યાંગ બાળકો અને યુવાનો માટે પ્રેરણાનો સ્ત્રોત બની છે. જો દિવ્યાંગોને યોગ્ય પ્લેટફોર્મ અને સુવિધાઓ મળે, તો તેઓ પણ આંતરરાષ્ટ્રીય સ્તરે દેશનું પ્રતિનિધિત્વ કરવાની ક્ષમતા ધરાવે છે.
