મોરબીના આરોગ્ય કેન્દ્રો દેશના શ્રેષ્ઠમાં સામેલ, ગુણવત્તા અને દર્દીલક્ષી સેવાઓને મળ્યો ગૌરવ
મોરબી જિલ્લાના આરોગ્ય તંત્રએ રાષ્ટ્રીય સ્તરે એક મોટી સિદ્ધિ હાંસલ કરી છે. ભારત સરકાર દ્વારા હાથ ધરવામાં આવેલા ગુણવત્તા મૂલ્યાંકનમાં મોરબી જિલ્લાના ૮ આયુષ્માન આરોગ્ય મંદિરોને પ્રતિષ્ઠિત NQAS (National Quality Assurance Standards) પ્રમાણપત્ર એનાયત કરવામાં આવ્યું છે. આ સફળતામાં મોરબી તાલુકાના ૭ અને વાંકાનેર તાલુકાના ૧ આરોગ્ય કેન્દ્રનો સમાવેશ થાય છે. આ પ્રમાણપત્ર મળવાથી સાબિત થયું છે કે જિલ્લાના છેવાડાના વિસ્તારોમાં પણ આરોગ્ય સેવાઓ ઉચ્ચ ગુણવત્તાવાળી અને દર્દીલક્ષી છે, જે સમગ્ર જિલ્લા માટે ગૌરવની બાબત છે.
કેન્દ્ર સરકારની ટીમ દ્વારા પાયાની ૧૨ સેવાઓની ઝીણવટભરી તપાસ
આ રાષ્ટ્રીય બહુમાન મેળવવા માટે કેન્દ્ર સરકારની વિશેષ ટીમે આ તમામ કેન્દ્રોની મુલાકાત લઈને ૧૨ મહત્વપૂર્ણ આરોગ્ય સેવાઓની ચકાસણી કરી હતી. જેમાં મુખ્યત્વે માતૃત્વ સેવાઓ, શિશુ આરોગ્ય, કુપોષણ નિવારણ, કુટુંબ કલ્યાણ અને ચેપી-બિનચેપી રોગોના નિદાન જેવી સુવિધાઓનું મૂલ્યાંકન કરવામાં આવ્યું હતું. આ ઉપરાંત માનસિક સ્વાસ્થ્ય, આયુષ-યોગ પદ્ધતિ અને શાળાના બાળકો માટેના હેલ્થ ચેકઅપ જેવી પ્રવૃત્તિઓમાં આ કેન્દ્રોની ઉત્કૃષ્ટ કામગીરીની રાષ્ટ્રીય સ્તરે વિશેષ નોંધ લેવામાં આવી હતી.
સ્ટાફની મહેનત અને વહીવટી કટિબદ્ધતાથી ઝળક્યા આરોગ્ય કેન્દ્રો
મોરબી જિલ્લાના આ કેન્દ્રોએ ગુણવત્તાના માપદંડમાં શાનદાર દેખાવ કર્યો છે. જેમાં બહાદુરગઢ કેન્દ્ર ૯૩.૮૨% સાથે મોખરે રહ્યું છે, જ્યારે જુના નાગડાવાસ, બરવાળા, જોધપર (નદી), લખધીરપુર, કોયલી, મકતાનપર અને ગોર ખીજડીયા કેન્દ્રોએ પણ ૮૭% થી વધુ માર્કસ મેળવીને વિશિષ્ટ સિદ્ધિ મેળવી છે. વહીવટી તંત્રના ‘પીપલ ફર્સ્ટ’ અભિગમ અને મેડિકલ સ્ટાફની અથાગ મહેનતને કારણે જ આ કેન્દ્રો આજે રાષ્ટ્રના અન્ય શ્રેષ્ઠ આરોગ્ય કેન્દ્રો સાથે ખભેખભા મિલાવીને ઉભા રહેવા સક્ષમ બન્યા છે.
ભાવિ લક્ષ્ય અને અધિકારીઓ દ્વારા કર્મચારીઓને અભિનંદન
આ ઐતિહાસિક સફળતા બદલ જિલ્લા વિકાસ અધિકારી એન.એસ. ગઢવી અને મુખ્ય જિલ્લા આરોગ્ય અધિકારી ડૉ. પી.કે. શ્રીવાસ્તવે તમામ તબીબો, કોમ્યુનિટી હેલ્થ ઓફિસર (CHO) અને પેરામેડિકલ સ્ટાફને અભિનંદન પાઠવ્યા છે. જિલ્લા ક્વોલિટી એશ્યોરન્સ મેડિકલ ઓફિસર ડૉ. હાર્દિક રંગપરિયાએ આ સફળતાનું શ્રેય સુસજ્જ સુવિધાઓ અને કર્મચારીઓના સમર્પણને આપ્યું છે. તંત્ર હવે આગામી સમયમાં જિલ્લાના વધુમાં વધુ આરોગ્ય કેન્દ્રો આ પ્રકારનું રાષ્ટ્રીય સન્માન મેળવે તે દિશામાં મક્કમતાથી કામ કરી રહ્યું છે.
