સીઝફાયર નહીં, કાયમી ઉકેલ: ઈરાન હોર્મુઝ સ્ટ્રેટમાંથી જાપાની જહાજોને સુરક્ષિત રસ્તો આપવા તૈયાર
ઈરાન, ઈઝરાયેલ અને અમેરિકા વચ્ચે ચાલી રહેલા ભયાનક યુદ્ધને કારણે વૈશ્વિક શાંતિ અને તેલના પુરવઠા પર ગંભીર સંકટ તોળાઈ રહ્યું છે. આ સંઘર્ષની સૌથી વધુ અસર હોર્મુઝ સ્ટ્રેટ (Hormuz Strait) પર પડી છે, જે વિશ્વના તેલ વેપાર માટે અત્યંત મહત્વનો માર્ગ છે. આ તણાવ વચ્ચે ઈરાને એક મહત્વની જાહેરાત કરતા જણાવ્યું છે કે, તે જાપાનના જહાજોને આ દરિયાઈ માર્ગેથી સુરક્ષિત પસાર થવા દેવા માટે તૈયાર છે. જોકે, ઈરાને સ્પષ્ટ કર્યું છે કે તે માત્ર કામચલાઉ યુદ્ધવિરામ નહીં, પરંતુ સંઘર્ષનો કાયમી ઉકેલ ઈચ્છે છે.
જાપાન માટે કેમ મહત્વનો છે આ નિર્ણય?
જાપાન તેની ઉર્જા જરૂરિયાતો માટે મોટાભાગે મધ્ય-પૂર્વના દેશો પર નિર્ભર છે. જાપાનના કુલ ક્રૂડ ઓઈલની આયાતનો 90% થી વધુ હિસ્સો આ હોર્મુઝ સ્ટ્રેટ દ્વારા જ પસાર થાય છે. ઈરાનના વિદેશ મંત્રી અબ્બાસ અરાઘચીએ જણાવ્યું હતું કે, “ઈરાન જાપાનના જહાજોને સુરક્ષિત રીતે બહાર કાઢવામાં મદદ કરવા તૈયાર છે. આ દરિયાઈ માર્ગ બંધ કરવામાં આવ્યો નથી, પરંતુ સુરક્ષિત રીતે પસાર થવા માટે દેશોએ ઈરાન સાથે તાલમેલ સાધવો પડશે.” રસ્તો બંધ થવાના ડરથી અત્યાર સુધી તેલનું સંકટ ઘેરાઈ રહ્યું હતું, જે હવે આ ઓફરથી થોડું હળવું થઈ શકે છે.
ઈરાન ઈચ્છે છે કાયમી શાંતિ
ઈરાનનો આ પ્રસ્તાવ એવા સમયે આવ્યો છે જ્યારે અમેરિકા અને ઈઝરાયેલના હુમલા બાદ સમગ્ર વિસ્તારમાં ભારે અફરાતફરીનો માહોલ છે. ઈરાને સ્પષ્ટ કર્યું છે કે તેઓ માત્ર થોડા સમય માટે હુમલા રોકવા (સીઝફાયર) નથી માંગતા, પરંતુ તેઓ ઈચ્છે છે કે આ યુદ્ધનો સંપૂર્ણ અને કાયમી રીતે અંત આવે. હોર્મુઝ સ્ટ્રેટમાં અવરજવર પર મુકાયેલા પ્રતિબંધોને કારણે વિશ્વભરમાં તેલના ભાવ વધવાની અને સપ્લાય ચેઈન ખોરવાઈ જવાની ચિંતા સેવાઈ રહી છે.
22 દિવસથી ચાલી રહેલું ભીષણ યુદ્ધ
ઈરાન, ઈઝરાયેલ અને અમેરિકા વચ્ચે છેલ્લા 22 દિવસથી સતત યુદ્ધ ચાલી રહ્યું છે. આ સંઘર્ષની શરૂઆત 28 ફેબ્રુઆરી, 2026ના રોજ થઈ હતી જ્યારે ઈઝરાયેલ અને અમેરિકાએ એકસાથે ઈરાનના 30 થી વધુ સ્થળો પર હુમલો કર્યો હતો. આ યુદ્ધમાં અત્યાર સુધીમાં ઈરાનના ટોચના નેતૃત્વના અનેક મોટા નેતાઓ માર્યા ગયા હોવાના અહેવાલ છે. એક તરફ ઈઝરાયેલ અને અમેરિકા સતત બોમ્બમારો કરી રહ્યા છે, તો બીજી તરફ ઈરાન પણ આ હુમલાઓનો વળતો જવાબ આપી રહ્યું છે.
