કેરળમાં કોંગ્રેસે સાંસદોને ટિકિટ ન આપી: આંતરિક જૂથવાદને ડામવામાં પક્ષ સફળ
કેરળ વિધાનસભા ચૂંટણીમાં સત્તામાં પુનરાગમન કરવા માટે કોંગ્રેસ પાર્ટીએ આક્રમક રણનીતિ અપનાવી છે. લાંબા સમયથી ચાલી રહેલા આંતરિક સંઘર્ષ અને જૂથવાદ વચ્ચે, કોંગ્રેસ આ વખતે ઉમેદવારોના નામ નક્કી કરવામાં વિવાદોને રોકવામાં સફળ રહી હોય તેવું જણાય છે. પક્ષે સ્પષ્ટ કર્યું છે કે તે રાજ્યની 140 બેઠકોમાંથી 92 બેઠકો પર પોતાના ઉમેદવારો ઉતારશે, જ્યારે બાકીની બેઠકો સહયોગી પક્ષો માટે છોડવામાં આવી છે.
સાંસદોને મેદાનમાં ન ઉતારવાનો મોટો નિર્ણય
કોંગ્રેસની આ વખતની યાદીમાં સૌથી નોંધપાત્ર બાબત એ છે કે પક્ષે કોઈ પણ વર્તમાન સાંસદને વિધાનસભાની ટિકિટ આપી નથી. કેરળમાં કોંગ્રેસ ‘યુનાઈટેડ ડેમોક્રેટિક ફ્રન્ટ’ (UDF) ના બેનર હેઠળ ચૂંટણી લડી રહી છે. જાણવા મળ્યું છે કે લગભગ અડધો ડઝન જેટલા સાંસદો પોતે વિધાનસભા ચૂંટણી લડવા માટે ઈચ્છુક હતા અને ટિકિટની માંગ કરી રહ્યા હતા.
જોકે, પક્ષના હાઈકમાન્ડે ખૂબ જ વિચારીને આ નિર્ણય લીધો છે. જો આ દિગ્ગજ નેતાઓને મેદાનમાં ઉતારવામાં આવ્યા હોત, તો ભવિષ્યમાં મુખ્યમંત્રી પદ માટે ખેંચતાણ અને નવી સમસ્યાઓ ઊભી થવાની શક્યતા હતી. આ સ્થિતિને ટાળવા માટે જ સાંસદોને ટિકિટ આપવાનું ટાળવામાં આવ્યું છે.
બળવાખોર નેતાઓને સમર્થન અને જૂથવાદ પર કાબૂ
કોંગ્રેસ માત્ર પોતાની 92 બેઠકો પર જ ધ્યાન કેન્દ્રિત નથી કરી રહી, પરંતુ રણનીતિક રીતે 3 એવી બેઠકો પર બળવાખોર નેતાઓને સમર્થન આપી રહી છે જેઓ સીપીએમ (CPM) થી અલગ થઈને નવો જૂથ બનાવી ચૂંટણી લડી રહ્યા છે. આ પગલા દ્વારા કોંગ્રેસ ડાબેરી મોરચાના મતોમાં ગાબડું પાડવાની યોજના બનાવી રહી છે.
પક્ષના સૂત્રોના જણાવ્યા અનુસાર, ટિકિટ વહેંચણીમાં તમામ જૂથો વચ્ચે સંતુલન જાળવવામાં આવ્યું છે, જેથી ચૂંટણી ટાણે કોઈ મોટો બળવો ન થાય. 17 માર્ચે જાહેર થયેલી પ્રથમ યાદીમાં 55 અને બીજી યાદીમાં 37 ઉમેદવારોના નામ જાહેર કરીને પક્ષે પોતાની તૈયારીઓ પૂર્ણ કરી લીધી છે.
પક્ષના નિર્ણયનો સ્વીકાર: અદૂર પ્રકાશનું નિવેદન
UDF ના સંયોજક અને કોંગ્રેસના સાંસદ અદૂર પ્રકાશે પક્ષના આ નિર્ણય પર પોતાની પ્રતિક્રિયા આપી છે. તેમણે જણાવ્યું કે, પથનમથિટ્ટા જિલ્લાના કોન્ની મતવિસ્તારના લોકો ઈચ્છતા હતા કે તેઓ ચૂંટણી લડે, કારણ કે તેઓ 23 વર્ષ સુધી ત્યાંના ધારાસભ્ય રહી ચૂક્યા છે.
અદૂર પ્રકાશે વધુમાં ઉમેર્યું, “મેં પક્ષના આદેશ પર અટિંગલથી લોકસભા ચૂંટણી લડી અને જીત મેળવી હતી. કોન્નીના લોકોના આગ્રહને કારણે મેં ચૂંટણી લડવાની ઈચ્છા વ્યક્ત કરી હતી, પરંતુ તે શરત સાથે કે જો રાષ્ટ્રીય નેતૃત્વ સાંસદોને મંજૂરી આપે. હવે જ્યારે પક્ષે નક્કી કર્યું છે કે સાંસદોએ ચૂંટણી ન લડવી જોઈએ, ત્યારે અમે તે નિર્ણયનું સન્માન કરીએ છીએ.”
