‘કોરોના કાળની જેમ ધૈર્યથી દરેક પડકારનો સામનો કરીશું’: પશ્ચિમ એશિયાના સંકટ પર PM મોદીનું લોકસભામાં સંબોધન
વડાપ્રધાન નરેન્દ્ર મોદીએ આજે લોકસભામાં પશ્ચિમ એશિયા (West Asia) માં સર્જાયેલી ગંભીર પરિસ્થિતિ અને ઈરાન-ઈઝરાયેલ વચ્ચેના વધતા તણાવ અંગે દેશને સંબોધિત કર્યો હતો. વડાપ્રધાને વિશ્વાસ અપાવ્યો હતો કે ભારત સરકાર વૈશ્વિક સ્તરે ઉદભવતા કોઈપણ પડકારનો સામનો કરવા માટે સંપૂર્ણ રીતે તૈયાર છે. તેમણે દેશવાસીઓને અપીલ કરી હતી કે જેમ આપણે કોરોના કાળમાં ધીરજ અને મક્કમતા બતાવી હતી, તેમ આ વૈશ્વિક સંકટ સમયે પણ આપણે ધૈર્ય જાળવી રાખવાનું છે.
વૈશ્વિક સપ્લાય ચેઈન અને ઇંધણ સંકટ પર ભાર
વડાપ્રધાને પોતાના ભાષણમાં સંભવિત વૈશ્વિક ઇંધણ સંકટ અને ગ્લોબલ સપ્લાય ચેઈનમાં આવનારા અવરોધો અંગે ચિંતા વ્યક્ત કરી હતી. તેમણે જણાવ્યું કે મધ્ય-પૂર્વના દેશોમાં ચાલી રહેલા યુદ્ધને કારણે ક્રૂડ ઓઈલની આયાત, ખાતરનો પુરવઠો અને આંતરરાષ્ટ્રીય વેપાર પર અસર પડી શકે છે. જોકે, પીએમ મોદીએ સ્પષ્ટ કર્યું હતું કે સરકાર આ પરિસ્થિતિ પર સતત નજર રાખી રહી છે અને દેશની ઇકોનોમી તેમજ એનર્જી સિક્યુરિટી (ઉર્જા સુરક્ષા) ને સુરક્ષિત રાખવા માટે તમામ જરૂરી પગલાં લેવામાં આવી રહ્યા છે.
ખેડૂતો અને સામાન્ય જનતા માટે સરકારની વ્યૂહરચના
રવિવારે મંત્રીઓ સાથે મળેલી હાઈ-લેવલ બેઠકનો ઉલ્લેખ કરતા વડાપ્રધાને કહ્યું કે, સરકાર ટૂંકા ગાળાના અને લાંબા ગાળાના આયોજન પર કામ કરી રહી છે. ખાસ કરીને ખેડૂતોને ખાતરની અછત ન વર્તાય તે માટે ખાતરના વૈકલ્પિક સ્ત્રોતો પર મંથન કરવામાં આવ્યું છે. પશ્ચિમ એશિયામાં વધતા તણાવની અસર ભારતના ઓઈલ ઈમ્પોર્ટ પર ન પડે તે માટે પણ વૈકલ્પિક વ્યવસ્થાઓ પર ધ્યાન આપવામાં આવી રહ્યું છે. વડાપ્રધાને ખાતરી આપી હતી કે જીવનજરૂરી ચીજવસ્તુઓની ઉપલબ્ધતામાં કોઈ ખલેલ પહોંચવા દેવામાં આવશે નહીં.
બદલાતી વિદેશ નીતિ અને ભારતનું વલણ
લોકસભામાં આ ચર્ચા એવા સમયે થઈ રહી છે જ્યારે વૈશ્વિક સ્તરે રાજકીય સમીકરણો ઝડપથી બદલાઈ રહ્યા છે. પીએમ મોદીએ તેમના સંબોધનમાં ભારતની વિદેશ નીતિના અભિગમને સ્પષ્ટ કરતા કહ્યું કે, ભારત હંમેશા શાંતિ અને સ્થિરતાનો પક્ષધર રહ્યો છે. મધ્ય-પૂર્વના દેશો સાથે ભારતના ગાઢ વ્યાપારી અને વ્યૂહાત્મક સંબંધો છે, તેથી ત્યાંની અસ્થિરતા આપણા હિતોને અસર કરી શકે છે. સરકાર આ મામલે અત્યંત સાવધ છે અને કોઈપણ પરિસ્થિતિને પહોંચી વળવા માટે વ્યૂહાત્મક રીતે તૈયાર છે.
