ગાંધીનગરમાં વિશ્વ ચકલી દિવસ નિમિત્તે “હેપ્પી સ્પેરો વીક-૨૦૨૬”ની ઉજવણી

રીટાબહેન પટેલની ઉપસ્થિતિમાં ચકલી ઘર વિતરણ, ગાંધીનગરને ગ્રીન સિટી બનાવવાના સંકલ્પ સાથે અભિયાન

ગાંધીનગરમાં પર્યાવરણ અને પક્ષીઓના જતન માટે હેપ્પી યૂથ ક્લબ દ્વારા સતત ૧૧મા વર્ષે “હેપ્પી સ્પેરો વીક-૨૦૨૬”નું સુંદર આયોજન કરવામાં આવ્યું છે. આ અભિયાનના ભાગરૂપે સેક્ટર-૧૬ સ્થિત પાટનગર યોજના ભવન ખાતે ‘હેપ્પી ચકલી ઘર’ વિતરણનો ખાસ કાર્યક્રમ યોજાયો હતો. આ પ્રસંગે ગાંધીનગર ઉત્તરના ધારાસભ્ય રીટાબહેન પટેલે હાજર રહીને નગરજનોને ચકલી ઘરનું વિતરણ કર્યું હતું. તેમણે જણાવ્યું હતું કે ચકલી જેવા અબોલ પક્ષીઓનું સંરક્ષણ કરવું આપણી નૈતિક ફરજ છે, કારણ કે પક્ષીઓ વગર કુદરતનું સંતુલન જાળવવું મુશ્કેલ બની જશે.

સતત ૧૩ દિવસ સુધી ચકલી ઘરનું નિઃશુલ્ક વિતરણ અને જનજાગૃતિ

હેપ્પી સ્પેરો વીક અંતર્ગત ૧૯ માર્ચથી ૩૧ માર્ચ સુધી શહેરના અલગ-અલગ વિસ્તારોમાં પૂંઠાના બનેલા ચકલી ઘરનું વિનામૂલ્યે વિતરણ કરવામાં આવી રહ્યું છે. ધારાસભ્યએ સંસ્થાની આ કામગીરીને બિરદાવતા લોકોને અપીલ કરી હતી કે તેઓ નજીકના વિતરણ કેન્દ્ર પરથી ચકલી ઘર મેળવી પોતાના ઘરે લગાવે. આ નાનકડો પ્રયાસ ચકલીઓને સુરક્ષિત આશ્રય સ્થાન પૂરું પાડશે અને લુપ્ત થતી જતી આ પ્રજાતિને બચાવવામાં મદદરૂપ થશે. પક્ષીઓ પ્રત્યે સંવેદના કેળવાય તે હેતુથી આ વિતરણ અભિયાનને વ્યાપક પ્રતિસાદ મળી રહ્યો છે.

ગાંધીનગરને વધુ હરિયાળું બનાવવા ૧ લાખ નવા વૃક્ષો વાવવાનો સંકલ્પ

પર્યાવરણની જાળવણી માટે માત્ર પક્ષીઓ જ નહીં પણ વૃક્ષોનું જતન પણ તેટલું જ જરૂરી છે. ધારાસભ્યશ્રીએ વધુમાં ઉમેર્યું હતું કે કેન્દ્રીય ગૃહ મંત્રી અમિતભાઈ શાહની પ્રેરણાથી ગાંધીનગરને ‘ગ્રીન સિટી’ રાખવા માટે ગત વર્ષે ૧ લાખ વૃક્ષો વાવવામાં આવ્યા હતા. આ પરંપરાને આગળ ધપાવતા આ વર્ષે પણ વધુ ૧ લાખ નવા વૃક્ષો વાવવાનું આયોજન કરવામાં આવ્યું છે. વૃક્ષોની સંખ્યા વધવાથી પક્ષીઓને કુદરતી રહેઠાણ મળશે અને શહેરનું વાતાવરણ વધુ શુદ્ધ અને ખુશનુમા બનશે.

ગાંધીનગરના લોકભવન ખાતે ભવ્ય રાજ્યસ્તરીય ‘સંસ્કૃત સન્માન સમારોહ’નું આયોજન

ગાંધીનગર સિવિલ હોસ્પિટલ ખાતે એક માસ માટે ‘વર્લ્ડ ઓરલ હેલ્થ મંથ’ની ઉજવણી

બાળકોમાં પર્યાવરણ જતન માટે નકામા ખોખામાંથી ચકલી ઘર બનાવવાની તાલીમ

હેપ્પી યૂથ ક્લબ દ્વારા માત્ર વિતરણ જ નહીં પણ નવી પેઢીમાં જાગૃતિ લાવવા માટે પણ વિશેષ પ્રયત્નો કરવામાં આવે છે. પ્રાથમિક શાળાના બાળકોને નકામા ખોખામાંથી ચકલી ઘર બનાવતા શીખવવામાં આવે છે, જેથી તેઓ નાનપણથી જ પક્ષીઓ અને પર્યાવરણ સાથે જોડાય. આ ઉપરાંત, ઉનાળાની આકરી ગરમીમાં પક્ષીઓને પીવાનું પાણી મળી રહે તે માટે શૈક્ષણિક સંકુલો અને જાહેર સ્થળોએ માટીના કુંડા અને પરબોની વ્યવસ્થા પણ કરવામાં આવી છે. આ પ્રકારના સામાજિક કાર્યોથી શહેરમાં પક્ષી પ્રેમની એક નવી લહેર જોવા મળી રહી છે.