નરેન્દ્ર મોદીનું વિઝન અને ભૂપેન્દ્ર પટેલના નેતૃત્વથી ગિફ્ટ સિટીનો વ્યાપક વિકાસ
ગાંધીનગરમાં આવેલું ગુજરાત ઇન્ટરનેશનલ ફાઇનાન્સ ટેક-સિટી (GIFT City) આજે ભારતનું ગૌરવ અને વિશ્વના અગ્રણી નાણાકીય કેન્દ્રોમાંનું એક બની ગયું છે. વડાપ્રધાન નરેન્દ્ર મોદીએ જ્યારે ગુજરાતના મુખ્યમંત્રી હતા ત્યારે આ પ્રોજેક્ટની પરિકલ્પના કરી હતી, જે આજે એક જીવંત આંતરરાષ્ટ્રીય ઇકોસિસ્ટમમાં પરિવર્તિત થઈ છે. વર્તમાન મુખ્યમંત્રી ભૂપેન્દ્ર પટેલના નેતૃત્વમાં ગિફ્ટ સિટીનો વિસ્તાર અને વિકાસ વધુ ઝડપી બન્યો છે. અહીં અત્યાધુનિક માળખાગત સુવિધાઓ અને નીતિ-સંચાલિત વાતાવરણને કારણે વિશ્વભરની મોટી નાણાકીય સંસ્થાઓ આકર્ષાઈ રહી છે.
આર્થિક ક્ષેત્રે હરણફાળ અને બેંકિંગ ક્ષેત્રનો અભૂતપૂર્વ વિકાસ
ગિફ્ટ સિટીમાં અત્યારે 1,150 થી વધુ IFSCA-રજિસ્ટર્ડ સંસ્થાઓ કાર્યરત છે, જે તેની વૈશ્વિક સ્વીકૃતિ દર્શાવે છે. અહીં બેંકિંગ ક્ષેત્રનો વ્યવહાર $106 બિલિયન સુધી પહોંચ્યો છે, જે વર્ષ 2020 ની સરખામણીમાં સાત ગણો વધારે છે. આ ઉપરાંત, કેપિટલ માર્કેટ પણ $80 બિલિયનના સ્તરે પહોંચ્યું છે અને દર મહિને એક્સચેન્જ ટર્નઓવર સતત $100 બિલિયનનો આંકડો પાર કરી રહ્યું છે. વિમાન અને જહાજ લીઝિંગ જેવી આધુનિક સેવાઓ સાથે 37થી વધુ બેંકો અને 65થી વધુ વીમા કંપનીઓ અહીં એક જ છત નીચે કાર્ય કરી રહી છે.
‘લીવ, વર્ક, થ્રાઇવ’ મંત્ર સાથે આધુનિક સામાજિક માળખું
ગિફ્ટ સિટી માત્ર વ્યવસાય પૂરતું મર્યાદિત નથી, પરંતુ અહીં રહેનારા અને કામ કરતા લોકો માટે ‘લીવ, વર્ક, થ્રાઇવ’ ના મંત્ર સાથે સામાજિક ઇન્ફ્રાસ્ટ્રક્ચર ઊભું કરવામાં આવ્યું છે. અહીં આંતરરાષ્ટ્રીય શાળાઓ, ભવ્ય સેન્ટ્રલ પાર્ક, સ્પોર્ટ્સ એરેના અને શોપિંગ મોલ્સ જેવી સુવિધાઓ ઉપલબ્ધ છે. ભારતમાં પ્રથમવાર અન્ડરગ્રાઉન્ડ યુટિલિટી ટનલ, ડિસ્ટ્રિક્ટ કૂલિંગ સિસ્ટમ અને ઓટોમેટેડ વેસ્ટ કલેક્શન જેવી અત્યાધુનિક ટેકનોલોજીનો ઉપયોગ અહીં કરવામાં આવ્યો છે. અંદાજ છે કે વર્ષ 2030 સુધીમાં અહીં 1,00,000 થી વધુ નવી રોજગારીની તકો ઊભી થશે.
વિશ્વના નાણાકીય નકશા પર ભારતનો મજબૂત પક્ષકાર
વૈશ્વિક સ્તરે ગિફ્ટ સિટી ભારત માટે આંતરરાષ્ટ્રીય ફાઇનાન્શિયલ ગેટવે તરીકે કામ કરે છે. તેની પહોંચ દાવોસના વર્લ્ડ ઇકોનોમિક ફોરમથી લઈને હોંગકોંગ, ઝ્યુરિચ અને મિલાન જેવા મુખ્ય નાણાકીય કેન્દ્રો સુધી વિસ્તરેલી છે. વાઈબ્રન્ટ ગુજરાત અને વિવિધ ફિનટેક સમિટ દ્વારા તે સ્થાનિક અને વૈશ્વિક નેટવર્કને જોડે છે. ગ્લોબલ યુનિવર્સિટીઓની ભાગીદારી અને ઉચ્ચ-મૂલ્ય ધરાવતી નાણાકીય સેવાઓ દ્વારા ગિફ્ટ સિટી ભારતને વિશ્વનું આર્થિક પાવરહાઉસ બનાવવાની દિશામાં મક્કમતાથી આગળ વધી રહ્યું છે.
