વ્હાઇટ હાઉસનું ગુપ્ત મિશન: 1000 લોકો માટેનો બોલરૂમ, પણ તેની નીચે શું છે ખાસ?
અમેરિકાના રાષ્ટ્રપતિના સત્તાવાર નિવાસસ્થાન ‘વ્હાઇટ હાઉસ’ ને લઈને એક ચોંકાવનારો ખુલાસો થયો છે. રાષ્ટ્રપતિ ડોનાલ્ડ ટ્રમ્પે જાહેરાત કરી છે કે વ્હાઇટ હાઉસમાં એક નવો 90,000 સ્ક્વેર ફૂટનો વિશાળ બોલરૂમ બનાવવામાં આવી રહ્યો છે. જોકે, આ માત્ર કાર્યક્રમો યોજવા માટેનો હોલ નથી, પરંતુ તેની નીચે એક અત્યંત આધુનિક અને સુરક્ષિત સૈન્ય બંકર (Military Bunker) તૈયાર કરવામાં આવી રહ્યું છે. આશરે 400 મિલિયન ડોલર (લગભગ 3300 કરોડ રૂપિયા) ના ખર્ચે આ પ્રોજેક્ટ સાકાર થઈ રહ્યો છે.
ભવ્ય બોલરૂમ અને હાઈ-ટેક સુરક્ષા
આ પ્રોજેક્ટ માટે વ્હાઇટ હાઉસના જૂના ‘ઈસ્ટ વિંગ’ ને તોડી પાડવામાં આવ્યો છે. ટ્રમ્પના જણાવ્યા અનુસાર, આ દુનિયાનો સૌથી ભવ્ય બોલરૂમ હશે, જેમાં એકસાથે 1,000 લોકો બેસી શકશે. પરંતુ અસલી રહસ્ય તેની જમીનની નીચે છુપાયેલું છે. બોલરૂમની બરાબર નીચે એક વિશાળ મિલિટરી કોમ્પ્લેક્સ બનાવવામાં આવી રહ્યું છે, જે બુલેટપ્રૂફ ગ્લાસ, ડ્રોન હુમલાથી બચવાની ટેકનોલોજી અને એડવાન્સ સુરક્ષા સિસ્ટમથી સજ્જ હશે. યુદ્ધ કે કટોકટીના સમયે આ બંકર અમેરિકી નેતૃત્વ માટે સુરક્ષિત કવચ સાબિત થશે.
વ્યૂહાત્મક રીતે અત્યંત મહત્વનું
સુરક્ષાના કારણોસર આ બંકરની ચોક્કસ ક્ષમતા ગુપ્ત રાખવામાં આવી છે, પરંતુ તે અગાઉના બંકર કરતા કદમાં ઘણું મોટું અને વધુ હાઈ-ટેક હશે. આ જગ્યા માત્ર છુપાવવા માટે જ નહીં, પરંતુ યુદ્ધ જેવી સ્થિતિમાં ત્યાંથી જ સૈન્ય સંચાલન અને વ્યૂહાત્મક નિર્ણયો લેવા માટે પણ ઉપયોગમાં લેવાશે. અમેરિકી સેનાની મદદથી આ બંકરને એવી રીતે તૈયાર કરાયું છે કે તે પરમાણુ કે જૈવિક હુમલા સામે પણ ટકી શકે.
ઐતિહાસિક વારસા અને નિયમો અંગે વિવાદ
આટલા મોટા પાયે થઈ રહેલા નિર્માણને કારણે વિવાદો પણ ઊભા થયા છે. ઘણા આર્કિટેક્ટ્સ અને ઈતિહાસકારોનું માનવું છે કે આટલો મોટો ફેરફાર વ્હાઇટ હાઉસની જૂની અને ઐતિહાસિક ઓળખને ભૂંસી નાખશે. ‘નેશનલ ટ્રસ્ટ ફોર હિસ્ટોરિક પ્રિઝર્વેશન’ એ આ પ્રોજેક્ટ વિરુદ્ધ કોર્ટમાં કેસ પણ કર્યો છે. તેમનો આરોપ છે કે આ પ્રોજેક્ટ માટે કોંગ્રેસની મંજૂરી લેવામાં આવી નથી અને નિયમોને નેવે મૂકીને ઉતાવળમાં કામ શરૂ કરાયું છે.
હાલમાં આ મામલે અદાલતી કાર્યવાહી ચાલી રહી છે અને ‘નેશનલ કેપિટલ પ્લાનિંગ કમિશન’ ની મંજૂરીની રાહ જોવાઈ રહી છે. જો બધી મંજૂરીઓ મળી જશે, તો વ્હાઇટ હાઉસના આંગણે દુનિયાનું સૌથી સુરક્ષિત અને આધુનિક મિલિટરી માળખું ઊભું થશે.
