ODI વર્લ્ડ કપ 2027: બાંગ્લાદેશની માસ્ટરચાલ, બે વખતની ચેમ્પિયન વેસ્ટ ઈન્ડિઝ પર ટુર્નામેન્ટમાંથી બહાર થવાનું જોખમ
ક્રિકેટ જગતના સૌથી મોટા મહાકુંભ એટલે કે ODI વર્લ્ડ કપ 2027 માટે અત્યારથી જ પડદા પાછળ ખેલ શરૂ થઈ ગયો છે. દક્ષિણ આફ્રિકા, ઝિમ્બાબ્વે અને નામિબિયામાં યોજાનારા આ વર્લ્ડ કપ માટે કઈ ટીમો સીધી એન્ટ્રી મેળવશે અને કોણે ક્વોલિફાયરના અગ્નિપરીક્ષામાંથી પસાર થવું પડશે, તેને લઈને ભારે મથામણ ચાલી રહી છે. આ દરમિયાન બાંગ્લાદેશ ક્રિકેટ બોર્ડ (BCB) એ એક એવો પ્લાન બનાવ્યો છે જેનાથી બે વખતની વર્લ્ડ ચેમ્પિયન વેસ્ટ ઈન્ડિઝની મુશ્કેલીઓ વધી શકે તેમ છે.
વર્લ્ડ કપ 2027 નું ક્વોલિફિકેશન ગણિત
આગામી વર્લ્ડ કપમાં યજમાન હોવાને કારણે દક્ષિણ આફ્રિકા અને ઝિમ્બાબ્વે પહેલેથી જ ક્વોલિફાય કરી ચૂક્યા છે. નિયમ મુજબ, ICC વન-ડે રેન્કિંગની ટોપ-8 ટીમોને સીધી એન્ટ્રી મળે છે. પરંતુ દક્ષિણ આફ્રિકા પહેલેથી જ ટોપ-8 માં છે અને તે યજમાન પણ છે, તેથી રેન્કિંગમાં નવમા ક્રમ સુધીની ટીમ માટે સીધા ક્વોલિફિકેશનના દરવાજા ખુલી ગયા છે.
હાલની સ્થિતિએ જોવામાં આવે તો, ઈંગ્લેન્ડ આઠમા ક્રમે અને બાંગ્લાદેશ નવમા ક્રમે છે, જ્યારે વેસ્ટ ઈન્ડિઝ દસમા સ્થાને છે. જો આ જ સ્થિતિ જળવાઈ રહે, તો બાંગ્લાદેશ સીધું ક્વોલિફાય થશે અને વેસ્ટ ઈન્ડિઝે ક્વોલિફાયર રાઉન્ડ રમવો પડશે.
બાંગ્લાદેશનો ‘ન્યૂઝીલેન્ડ પ્લાન’
બાંગ્લાદેશે પોતાની રેન્કિંગ અને રેટિંગ પોઈન્ટ્સ સુધારવા માટે એક મહત્વનો નિર્ણય લીધો છે. બાંગ્લાદેશની ટીમ આગામી 17 એપ્રિલથી ન્યૂઝીલેન્ડ સામે ત્રણ મેચની વન-ડે સીરીઝ રમવા જઈ રહી છે. અત્યારે મોટાભાગના દિગ્ગજ ખેલાડીઓ IPL માં વ્યસ્ત હોવાથી ન્યૂઝીલેન્ડે ટૉમ લેથમની કેપ્ટન્સીમાં પોતાની ‘B’ ટીમની જાહેરાત કરી છે.
બાંગ્લાદેશ પાસે આ સુવર્ણ તક છે કે તેઓ ન્યૂઝીલેન્ડની આ યુવા ટીમને હરાવીને પોતાના રેટિંગ પોઈન્ટ્સમાં મોટો ઉછાળો લાવે.
- જો બાંગ્લાદેશ 3-0 થી સીરીઝ જીતે છે, તો તેના રેટિંગ પોઈન્ટ્સ 79 થી વધીને 85 થઈ જશે.
- જો તેઓ 2-1 થી પણ જીતે છે, તો પણ તેમના રેટિંગ પોઈન્ટ્સ 83 થશે, જે વેસ્ટ ઈન્ડિઝના 77 રેટિંગ કરતા ઘણા વધારે હશે.
વેસ્ટ ઈન્ડિઝ માટે અસ્તિત્વનો સવાલ
ક્લાઈવ લોઈડની કેપ્ટન્સીમાં પ્રથમ બે વર્લ્ડ કપ જીતનારી વેસ્ટ ઈન્ડિઝની ટીમ માટે અત્યારે કપરા ચઢાણ છે. વેસ્ટ ઈન્ડિઝ અત્યારે કોઈ વન-ડે સીરીઝ રમી રહ્યું નથી. તેઓ છેક જુલાઈ મહિનામાં ન્યૂઝીલેન્ડ સામે ટકરાશે. જો ત્યાં સુધીમાં બાંગ્લાદેશ પોતાની લીડ વધારી લેશે, તો વેસ્ટ ઈન્ડિઝ માટે ટોપ-9 માં આવવું અશક્ય બની જશે.
જો વેસ્ટ ઈન્ડિઝ સીધું ક્વોલિફાય નહીં થાય, તો તેમને અફઘાનિસ્તાન, આયર્લેન્ડ કે અન્ય એસોસિયેટ ટીમો સામે ક્વોલિફાયર રમવું પડશે. ભૂતકાળમાં આપણે જોયું છે કે વેસ્ટ ઈન્ડિઝ જેવી મોટી ટીમો પણ ક્વોલિફાયર રાઉન્ડમાં નબળા પ્રદર્શનને કારણે બહાર ફેંકાઈ જતી હોય છે.
શું બાંગ્લાદેશ બાજી મારી જશે?
બાંગ્લાદેશ અત્યારે જે ફોર્મમાં છે અને જે રીતે પ્લાનિંગ કરી રહ્યું છે, તે જોતા લાગે છે કે તેઓ 2027 ના વર્લ્ડ કપ માટે પોતાની સીટ પાકી કરવાના પૂરેપૂરા મૂડમાં છે. ન્યૂઝીલેન્ડ સામેની આગામી સીરીઝ માત્ર એક દ્વિપક્ષીય શ્રેણી નથી, પણ વર્લ્ડ કપની ટિકિટ મેળવવાની રેસ છે.
હવે આખી દુનિયાની નજર 17 એપ્રિલથી શરૂ થનારી આ શ્રેણી પર રહેશે. શું બાંગ્લાદેશ પોતાનું સ્થાન પાકું કરશે કે પછી વેસ્ટ ઈન્ડિઝ છેલ્લી ઘડીએ કોઈ ચમત્કાર કરશે? આનો જવાબ આવનારો સમય જ આપશે.
