Video: યુવકે વીજળી વગર ચલાવ્યો પંખો, દેશી જુગાડ જોઈને એન્જિનિયરો પણ ચકરાવે ચડ્યા!
સોશિયલ મીડિયા પર અવારનવાર એવા વીડિયો સામે આવતા હોય છે જે જોઈને ભલભલા વિજ્ઞાનીઓ કે એન્જિનિયરોનું મગજ પણ કામ કરતું બંધ થઈ જાય. હાલમાં જ એક એવો વીડિયો ઈન્ટરનેટ પર ધૂમ મચાવી રહ્યો છે, જેમાં એક વ્યક્તિએ વીજળી કે મોટર વગર પંખો ચલાવીને બધાને ચોંકાવી દીધા છે. કાળઝાળ ગરમી અને વીજળી ગુલ થવાની સમસ્યાથી પરેશાન સામાન્ય જનતા માટે આ વીડિયો કોઈ ‘ચમત્કાર’ થી ઓછો નથી લાગી રહ્યો.
કેવી રીતે કામ કરે છે આ ‘જાદુઈ’ સેટઅપ?
વાયરલ થઈ રહેલા આ વીડિયોમાં જોઈ શકાય છે કે લાકડાના એક પ્લસ (+) આકારના સ્ટેન્ડ પર આખો ખેલ ગોઠવવામાં આવ્યો છે. તેના ઉપરના ભાગમાં પ્લાસ્ટિકના પંખાને એક લાંબા સ્ક્રૂ દ્વારા ફિટ કરવામાં આવ્યો છે. લાકડાના પાછળના ભાગે નીકળેલા સ્ક્રૂને રબરબેન્ડની મદદથી ફ્રેમ પર લાગેલી ત્રણ ખીલીઓ સાથે જોડવામાં આવ્યો છે. જેવો આ વ્યક્તિ પંખાને હાથથી એકવાર ધક્કો મારે છે, કે તરત જ પંખો પોતાની રફ્તાર પકડી લે છે અને સતત ફરતો રહે છે. આ દ્રશ્ય જોઈને જોનારા દંગ રહી જાય છે.
જુગાડ કે છેતરપિંડી? ઈન્ટરનેટ પર બે ભાગલા
આ વીડિયો વાયરલ થતાની સાથે જ નેટીઝન્સ બે જૂથમાં વહેંચાઈ ગયા છે. કેટલાક લોકો તેને ‘ધાંસુ જુગાડ’ કહી રહ્યા છે, તો કેટલાક તેને સદંતર ફેક ગણાવી રહ્યા છે. એક યુઝરે કોમેન્ટ કરી કે, “ભાઈ તું અત્યાર સુધી ક્યાં હતો? તેં તો ન્યૂટનના નિયમોને જ ફેલ કરી દીધા!” જ્યારે બીજા યુઝરે શંકા વ્યક્ત કરતા લખ્યું કે, “પાછળ નક્કી કોઈ કૂલર ચાલતું હશે જેની હવાથી આ પંખો ફરી રહ્યો છે, લોકોને પાગલ બનાવવાનું બંધ કરો.” એક અન્ય યુઝરે ફિઝિક્સનો હવાલો આપતા લખ્યું કે, દુનિયામાં ‘ફ્રી એનર્જી’ જેવી કોઈ વસ્તુ અસ્તિત્વમાં જ નથી.
શું ખરેખર આવું શક્ય છે?
વૈજ્ઞાનિક દૃષ્ટિકોણથી જોઈએ તો, ‘લો ઓફ કન્ઝર્વેશન ઓફ એનર્જી’ (ઉર્જા સંરક્ષણનો નિયમ) કહે છે કે ઉર્જા ક્યારેય પેદા કરી શકાતી નથી કે તેનો નાશ કરી શકાતો નથી. એટલે કે, કોઈપણ બાહ્ય ઉર્જા સ્ત્રોત વગર કોઈ વસ્તુ અનંતકાળ સુધી આપમેળે ફરી શકતી નથી. નિષ્ણાતોનું માનવું છે કે આવા વીડિયો અવારનવાર કેમેરાની પાછળ છુપાયેલા ટેબલ ફેન કે બ્લોઅરની મદદથી બનાવવામાં આવતા હોય છે, જેથી જોનારાને તે જાદુ જેવું લાગે.
