હાર છતાં સંજીવ ગોયન્કાનો પંત પર અતૂટ વિશ્વાસ! સોશિયલ મીડિયા પર પોસ્ટ કરી કહી મોટી વાત, પણ ફેન્સ કેમ થયા નારાજ?
IPL 2026ની પોતાની પ્રથમ મેચમાં દિલ્હી કેપિટલ્સ સામે મળેલી હાર બાદ લખનૌ સુપર જાયન્ટ્સ (LSG)ના ખેમામાં હલચલ મચી ગઈ છે. મેદાન પર કેપ્ટન ઋષભ પંત અને કોચ જસ્ટિન લેંગર સાથેની ગંભીર વાતચીત બાદ હવે ટીમના માલિક સંજીવ ગોયન્કાએ સોશિયલ મીડિયા પર એક પોસ્ટ શેર કરી છે, જે અત્યારે ટોક ઓફ ધ ટાઉન બની છે. એક તરફ ગોયન્કા ટીમનો ઉત્સાહ વધારી રહ્યા છે, તો બીજી તરફ ફેન્સ તેમને જૂની ઘટનાઓ યાદ અપાવી રહ્યા છે.
શું લખ્યું સંજીવ ગોયન્કાએ પોતાની પોસ્ટમાં?
મેચ પૂરી થયાના મોડી રાત્રે સંજીવ ગોયન્કાએ પોતાના ઓફિશિયલ એક્સ (X) એકાઉન્ટ પર એક પોસ્ટ શેર કરી હતી. આ પોસ્ટમાં તેમણે હાર છતાં પોઝિટિવ અભિગમ અપનાવ્યો છે. તેમણે લખ્યું:
“આ એક લાંબી સીઝન છે અને આવા ઉતાર-ચઢાવ રમતનો જ એક ભાગ છે. મને મારા કેપ્ટન ઋષભ પંત અને આખી ટીમ પર સંપૂર્ણ વિશ્વાસ છે કે તેઓ આગામી મેચોમાં જોરદાર વાપસી કરશે. ઇકાના સ્ટેડિયમમાં અમને સપોર્ટ કરવા બદલ તમામ ફેન્સનો આભાર. અમે હજુ વધુ મજબૂત બનીને મેદાનમાં ઉતરીશું. LSGની અસલી કહાની હજુ લખવાની બાકી છે.”
ગોયન્કાની આ પોસ્ટે સ્પષ્ટ કરી દીધું છે કે ભલે મેદાન પર તેઓ ગુસ્સામાં દેખાયા હોય, પરંતુ સત્તાવાર રીતે તેઓ પોતાની ટીમ અને નવા કેપ્ટન પંતની પડખે ઉભા છે.
મેદાન પરની એ ‘ગંભીર ચર્ચા’ અને વિવાદ
સંજીવ ગોયન્કાની આ પોસ્ટ ત્યારે આવી છે જ્યારે સોશિયલ મીડિયા પર તેમનો એક વીડિયો વાયરલ થઈ રહ્યો હતો. આ વીડિયોમાં તેઓ મેચ હાર્યા બાદ મેદાન પર જ ઋષભ પંત અને જસ્ટિન લેંગર સાથે ખૂબ જ આકરા તેવરમાં વાત કરતા જોવા મળ્યા હતા.
ફેન્સને તરત જ એ જૂની ઘટના યાદ આવી ગઈ જ્યારે કેએલ રાહુલ લખનૌનો કેપ્ટન હતો અને એક હાર બાદ ગોયન્કાએ તેની સાથે પણ આવું જ વર્તન કર્યું હતું. વીડિયોમાં ઋષભ પંત થોડો પરેશાન અને દબાણમાં દેખાઈ રહ્યો હતો, જે જોઈને ક્રિકેટ પ્રેમીઓમાં રોષ જોવા મળ્યો હતો.
ફેન્સે સોશિયલ મીડિયા પર ક્લાસ લીધો: “મીટિંગ બંધ દરવાજે કરો”
ગોયન્કાની પોસ્ટ પર ફેન્સે મિશ્ર પ્રતિસાદ આપ્યો છે. કેટલાક લોકોએ આને ‘ડેમેજ કંટ્રોલ’ ગણાવ્યું છે, તો કેટલાકે તેમની આકરી ટીકા કરી છે.
This is a long season, and moments like these are part of building something meaningful. I have full confidence in our captain and the team to respond with strength. To our fans, thank you for your support at Ekana today, we will come back stronger. The story of @LucknowIPL this… pic.twitter.com/iQvN8u4g1d
— Dr. Sanjiv Goenka (@DrSanjivGoenka) April 1, 2026
ડૅમેજ કંટ્રોલ: એક યુઝરે લખ્યું કે, “વીડિયો વાયરલ થયા પછી પોતાની ઈમેજ સુધારવા માટે ગોયન્કાએ આ પોસ્ટ કરી છે.”
ખાનગી મીટિંગની સલાહ: અન્ય એક યુઝરે સલાહ આપતા લખ્યું કે, “મહેરબાની કરીને તમારી ટીમ મીટિંગ બંધ દરવાજે કે ડ્રેસિંગ રૂમમાં કરો. આ રીતે આખા મેદાન અને કેમેરાની સામે ખેલાડીઓ અને કોચ સાથે વાત કરવી બિલકુલ યોગ્ય નથી લાગતી.”
શરમજનક વર્તન: કેટલાક ફેન્સે લખ્યું કે તમે પ્રોફેશનલ ખેલાડીઓને ક્રિકેટ શીખવી રહ્યા હોવ તેવું લાગે છે, જે ઘણું શરમજનક છે.
