મિશન વર્લ્ડ કપ 2027: IPL ની ધમાલ વચ્ચે હાર્દિક પંડ્યાની મોટી રણનીતિ, ટીમ ઈન્ડિયા માટે કરી રહ્યો છે ખાસ તૈયારી
ભારતીય ક્રિકેટના સ્ટાર ઓલરાઉન્ડર અને મુંબઈ ઈન્ડિયન્સના કેપ્ટન હાર્દિક પંડ્યા અત્યારે બેવડી ભૂમિકા ભજવી રહ્યા છે. એકતરફ તેના ખભા પર મુંબઈ ઈન્ડિયન્સને 6 વર્ષના લાંબા અંતર બાદ ફરી એકવાર IPL ચેમ્પિયન બનાવવાની જવાબદારી છે, તો બીજી તરફ તેની નજર વર્ષ 2027 માં યોજાનારા વનડે વર્લ્ડ કપ પર ટકેલી છે. હાર્દિક સારી રીતે જાણે છે કે જો તેણે વર્લ્ડ કપમાં ભારત માટે ટ્રમ્પ કાર્ડ સાબિત થવું હોય, તો માત્ર બેટિંગ નહીં પણ પાવરફુલ બોલિંગ પણ અનિવાર્ય છે.
મુંબઈ ઈન્ડિયન્સ અને હાર્દિકનું લક્ષ્ય
મુંબઈ ઈન્ડિયન્સે છેલ્લે 2020 માં આઈપીએલ ખિતાબ જીત્યો હતો. ત્યારપછીની સીઝન્સ ટીમ માટે ઉતાર-ચઢાવવાળી રહી છે. હાર્દિક પંડ્યાની કેપ્ટનશીપ હેઠળ ટીમ ફરીથી તે જૂનો દબદબો મેળવવા માંગે છે. જોકે, IPL ની આ વ્યસ્તતા વચ્ચે પણ હાર્દિકે પોતાનું ધ્યાન આગામી દોઢ વર્ષ પછી આવનારા વનડે વર્લ્ડ કપ પરથી હટાવ્યું નથી. તેનો મુખ્ય ફોકસ પોતાની બોલિંગ ક્ષમતા અને ‘વર્કલોડ’ વધારવા પર છે.
10 ઓવરનો સ્પેલ: હાર્દિકનો માસ્ટર પ્લાન
તાજેતરના અહેવાલો મુજબ, હાર્દિક પંડ્યા અત્યારે પોતાની બોલિંગની મર્યાદા વધારવા પર સખત મહેનત કરી રહ્યો છે. BCCI ના સૂત્રોના જણાવ્યા અનુસાર, હાર્દિક ધીમે-ધીમે પોતાના ‘બોલિંગ લોડ’ ને વધારી રહ્યો છે. વનડે ક્રિકેટમાં એક બોલર માટે 10 ઓવર ફેંકવી અનિવાર્ય હોય છે. હાર્દિક, જે ભૂતકાળમાં પીઠની ઈજા અને ફિટનેસની સમસ્યાઓથી ઝૂઝી ચૂક્યો છે, તે હવે પોતાના શરીરને એવી રીતે તૈયાર કરી રહ્યો છે કે તે કોઈપણ મુશ્કેલી વગર સતત 10 ઓવર બોલિંગ કરી શકે.
BCCI અને ટીમ ઈન્ડિયાનું મેનેજમેન્ટ હાર્દિકની ફિટનેસ બાબતે હંમેશા સતર્ક રહ્યું છે. સાઉથ આફ્રિકા, ઝિમ્બાબ્વે અને નામિબિયામાં યોજાનારા 2027 ના વર્લ્ડ કપમાં ત્યાંની પિચો પર ફાસ્ટ બોલિંગ ઓલરાઉન્ડરની ભૂમિકા ખૂબ જ મહત્વની રહેશે. જો હાર્દિક માત્ર 4-5 ઓવર સુધી મર્યાદિત રહે, તો ટીમ ઈન્ડિયાના બોલિંગ કોમ્બિનેશનમાં મુશ્કેલી પડી શકે છે. આથી જ હાર્દિક અત્યારથી જ પૂરી 10 ઓવર માટે સજ્જ થઈ રહ્યો છે.
ડોમેસ્ટિક ક્રિકેટમાં જોવા મળી હતી ઝલક
હાર્દિકની ગંભીરતાનો અંદાજ એ વાત પરથી લગાવી શકાય છે કે ગત વર્ષે જ્યારે BCCI એ તેને ઈજાથી બચવા માટે ઓછી બોલિંગ કરવાની સલાહ આપી હતી, ત્યારે પણ તેણે વિજય હજારે ટ્રોફીમાં બરોડા માટે પૂરી 10 ઓવર બોલિંગ કરી હતી. આ સાબિત કરે છે કે તે માત્ર એક બેટર તરીકે નહીં, પણ એક પ્રોપર ઓલરાઉન્ડર તરીકે ટીમમાં પોતાની જગ્યા મજબૂત કરવા માંગે છે. તેના શરીર પ્રતિસાદ આપી રહ્યું છે અને તેને હવે અહેસાસ થઈ રહ્યો છે કે તે લાંબા સ્પેલ ફેંકવા માટે સંપૂર્ણ રીતે ફિટ છે.
2023 ના વર્લ્ડ કપની કડવી યાદોમાંથી બોધપાઠ
વર્લ્ડ કપ 2023 માં હાર્દિક પંડ્યાની ગેરહાજરી ભારતને ફાઈનલમાં ક્યાંકને ક્યાંક નડી હતી. તે ટુર્નામેન્ટમાં માત્ર 3 મેચ રમી શક્યો હતો અને બાંગ્લાદેશ સામે બોલિંગ કરતી વખતે જ તેને પગની ઘૂંટીમાં (Ankle injury) ગંભીર ઈજા થઈ હતી. આ ઈજાને કારણે તે આખી ટુર્નામેન્ટમાંથી બહાર થઈ ગયો હતો. સાઉથ આફ્રિકાની ધરતી પર ફરીથી આવી સ્થિતિ ન સર્જાય તે માટે હાર્દિક અત્યારથી જ પોતાના સ્નાયુઓને મજબૂત કરી રહ્યો છે અને વૈજ્ઞાનિક રીતે પોતાની ટ્રેનિંગ પર ધ્યાન આપી રહ્યો છે.
