લેબનોનમાં ઈઝરાયેલના હુમલા ચાલુ રહેશે: શું ટ્રમ્પના સીઝફાયર પ્રસ્તાવથી નેતન્યાહુ ખુશ નથી?
અમેરિકી રાષ્ટ્રપતિ ડોનાલ્ડ ટ્રમ્પ દ્વારા જાહેર કરવામાં આવેલા યુદ્ધવિરામ (સીઝફાયર)ના પ્રસ્તાવ પર ઈઝરાયેલ તરફથી મહત્વની પ્રતિક્રિયા સામે આવી છે. ઈઝરાયેલના વડાપ્રધાન બેન્જામિન નેતન્યાહુએ આ પ્રસ્તાવને શરતી ટેકો તો આપ્યો છે, પરંતુ સાથે જ સ્પષ્ટ કર્યું છે કે લેબનોનમાં હિઝબુલ્લાહ વિરુદ્ધ તેમનું સૈન્ય અભિયાન અટકશે નહીં. ઈઝરાયેલે આ યુદ્ધવિરામ માટે ઈરાન સામે કડક શરતો મૂકી છે, જેના કારણે આ વિસ્તારમાં શાંતિ સ્થપાશે કે કેમ તે અંગે પ્રશ્નાર્થો સર્જાયા છે.
ઈઝરાયેલની મોટી શરત: ‘સ્ટ્રેટ ઓફ હોર્મુઝ’ ખોલવું પડશે
બુધવારે ઈઝરાયેલના વડાપ્રધાન કાર્યાલય દ્વારા જારી કરવામાં આવેલા નિવેદનમાં જણાવવામાં આવ્યું છે કે તેઓ અમેરિકી રાષ્ટ્રપતિના નિર્ણયનું સમર્થન કરે છે, પરંતુ આ સમર્થન અમુક શરતોને આધીન છે. ઈઝરાયેલની મુખ્ય શરત એ છે કે ઈરાને તાત્કાલિક અસરથી ‘સ્ટ્રેટ ઓફ હોર્મુઝ’ (Hormuz Strait) ખુલ્લું કરવું પડશે. આ ઉપરાંત, ઈરાને અમેરિકા, ઈઝરાયેલ અને અન્ય આરબ દેશો પરના હુમલાઓ સંપૂર્ણપણે બંધ કરવા પડશે. નેતન્યાહુ ઈચ્છે છે કે ઈરાન હવે પરમાણુ શસ્ત્રો, મિસાઈલ ટેકનોલોજી અને આતંકવાદી પ્રવૃત્તિઓ દ્વારા વિશ્વ માટે ખતરો ન રહે.
લેબનોન પર સીઝફાયર લાગુ નહીં થાય
સૌથી ચોંકાવનારી વાત એ છે કે ઈઝરાયેલે સ્પષ્ટપણે કહી દીધું છે કે બે અઠવાડિયાનો આ પ્રસ્તાવિત યુદ્ધવિરામ લેબનોન પર લાગુ થશે નહીં. એક તરફ પાકિસ્તાની વડાપ્રધાન શહબાઝ શરીફ જેવા નેતાઓએ આ સીઝફાયરમાં લેબનોનનો સમાવેશ હોવાની વાત કરી હતી, તો બીજી તરફ ઈઝરાયેલે પોતાનો ઈરાદો સ્પષ્ટ રાખ્યો છે. લેબનોનમાં હિઝબુલ્લાહની પકડ નબળી પાડવા માટે ઈઝરાયેલ ત્યાંના રહેણાંક વિસ્તારોમાં પણ ભીષણ હુમલા કરી રહ્યું છે. જો ઈઝરાયેલ લેબનોનમાં હુમલા ચાલુ રાખશે, તો આ સીઝફાયર પ્રક્રિયા નિષ્ફળ જવાની પૂરેપૂરી શક્યતા છે.
અમેરિકાનું આશ્વાસન અને ભવિષ્યની રણનીતિ
રિપોર્ટ અનુસાર, અમેરિકાએ ઈઝરાયેલને ખાતરી આપી છે કે આગામી મંત્રણાઓમાં તેઓ એ તમામ લક્ષ્યો હાંસલ કરવા માટે પ્રતિબદ્ધ છે જે ઈઝરાયેલની સુરક્ષા માટે જરૂરી છે. અમેરિકા અને ઈઝરાયેલ બંને સહમત છે કે ઈરાનનો પ્રભાવ આ ક્ષેત્રમાં ઓછો થવો જોઈએ. જોકે, લેબનોન મુદ્દે બંને દેશો વચ્ચેના મતમાં તફાવત દેખાઈ રહ્યો છે.
ממשיכים לכתוש את משטר הטרור באיראן >> pic.twitter.com/CmVK60tfw7
— Benjamin Netanyahu – בנימין נתניהו (@netanyahu) April 7, 2026
શાંતિની કોશિશ સામે મોટું સંકટ
જો ઈઝરાયેલ લેબનોન પર પોતાના હુમલા ચાલુ રાખશે, તો સમગ્ર મધ્ય પૂર્વમાં યુદ્ધવિરામની કોશિશને મોટો ફટકો પડી શકે છે. હાલની સ્થિતિ જોતા એવું લાગે છે કે નેતન્યાહુ માત્ર અમેરિકાના દબાણવશ પ્રસ્તાવ સ્વીકારી રહ્યા છે, પરંતુ વાસ્તવમાં તેઓ હજુ પણ સૈન્ય કાર્યવાહી દ્વારા જ પોતાના દુશ્મનોને ખતમ કરવાના પક્ષમાં છે. હવે જોવાનું એ રહે છે કે ડોનાલ્ડ ટ્રમ્પનું આ ‘શાંતિ મિશન’ ઈઝરાયેલની જિદ્દ સામે કેટલું ટકી શકે છે.
