‘પાંચ છગ્ગાનો હીરો’ ફોર્મમાં પરત: રિંકુ સિંહની તોફાની પારીએ KKRને અપાવી પહેલી જીત, ઈડન ગાર્ડન્સમાં મચી ધમાલ
કહેવાય છે કે ‘હારકર જીતને વાલે કો બાઝીગર કહેતે હૈં’, અને રવિવારની સાંજે કોલકાતા નાઈટ રાઈડર્સ (KKR) માટે રિંકુ સિંહ ખરેખર ‘બાઝીગર’ સાબિત થયો. આઈપીએલ 2026ની સીઝનમાં સતત નિષ્ફળતા બાદ, રિંકુ સિંહે આખરે પોતાના અસલી અંદાજમાં વાપસી કરી છે. ઈડન ગાર્ડન્સના ઐતિહાસિક મેદાન પર રાજસ્થાન રોયલ્સ વિરુદ્ધ રમાયેલી મેચમાં રિંકુએ માત્ર પોતાની ટીમનું ખાતું જ નથી ખોલાવ્યું, પણ ટીકાકારોના મોઢા પણ બંધ કરી દીધા છે.
સીઝનની પહેલી જીત અને રિંકુનો જાદુ
કોલકાતા નાઈટ રાઈડર્સ માટે આ સીઝનની શરૂઆત અત્યંત નિરાશાજનક રહી હતી. પોઈન્ટ ટેબલમાં સૌથી નીચે રહેલી આ ટીમને એક એવી ઈનિંગની જરૂર હતી જે તેમનો આત્મવિશ્વાસ પાછો લાવી શકે. રાજસ્થાન રોયલ્સે આપેલા 155 રનના પડકારજનક લક્ષ્યાંકનો પીછો કરતા KKRની હાલત એક સમયે કફોડી હતી. પરંતુ રિંકુ સિંહે અણનમ 53 રન ફટકારીને ટીમને ચાર વિકેટે વિજય અપાવ્યો. આ જીત સાથે જ KKRના કેમ્પમાં અને ચાહકોના ચહેરા પર લાંબા સમય પછી સ્મિત જોવા મળ્યું છે.
સતત નિષ્ફળતા બાદ શાનદાર કમબેક
આઈપીએલ 2023માં ગુજરાત ટાઇટન્સ સામે છેલ્લી પાંચ બોલમાં પાંચ છગ્ગા ફટકારીને રાતોરાત સ્ટાર બનેલા રિંકુ સિંહ માટે આ સીઝન અત્યાર સુધી સંઘર્ષપૂર્ણ રહી હતી. અગાઉની પાંચ મેચોમાં તેણે 33, 35*, 4, 6 અને 1 રન બનાવ્યા હતા. સોશિયલ મીડિયા પર તેના ફોર્મ અંગે સવાલો ઉઠી રહ્યા હતા, પરંતુ રિંકુએ સાબિત કરી દીધું કે તે મુશ્કેલ પરિસ્થિતિઓનો ખેલાડી છે. જ્યારે ટીમ 73 રનમાં 5 વિકેટ ગુમાવીને સંકટમાં હતી, ત્યારે રિંકુએ પારીને સંભાળી અને અંત સુધી અણનમ રહીને મેચ પૂરી કરી.
નસીબનો સાથ અને રિંકુની વ્યૂહરચના
મેચ દરમિયાન એક એવો વળાંક આવ્યો હતો જ્યાં કદાચ KKRના ચાહકોના શ્વાસ અધ્ધર થઈ ગયા હતા. રિંકુ સિંહ જ્યારે માત્ર 8 રન પર રમી રહ્યો હતો, ત્યારે તેણે એક મોટો શોટ રમવાનો પ્રયાસ કર્યો પણ બોલ બેટની ધાર લઈને હવામાં ઊંચો ગયો. સદનસીબે, રાજસ્થાનના નૈન્દ્રે બર્ગર પાસે એક અત્યંત સરળ કેચ આવ્યો હતો, જે તેણે છોડી દીધો. આ ‘જીવનદાન’ રાજસ્થાનને 96 લાખની ભૂલ જેવું મોંઘું પડ્યું.
મેચ બાદ પોતાના સાથી ખેલાડી અનુકૂલ રોય સાથે વાતચીત કરતા રિંકુએ જણાવ્યું હતું કે, “કેચ છૂટ્યા પછી મેં મારી જાત સાથે વાત કરી. રમનદીપ સિંહે મને સલાહ આપી હતી કે ગમે તેમ કરીને મેચને છેલ્લી ઓવર સુધી લઈ જવાની છે. મેદાન પર બાઉન્ડ્રી મળવી મુશ્કેલ હતી એટલે મેં એ શોટ રમ્યો હતો, પણ ભગવાનનો આભાર કે મારો કેચ પકડાયો નહીં.”
રૂમમેટ્સની અતૂટ ભાગીદારી: રિંકુ અને અનુકૂલની જોડી
KKRની આ જીતમાં રિંકુ સિંહ અને અનુકૂલ રોય વચ્ચેની 76 રનની અણનમ ભાગીદારી ગેમ ચેન્જર સાબિત થઈ. આ બંને ખેલાડીઓ માત્ર મેદાન પર જ નહીં, પણ અંગત જીવનમાં પણ સારા મિત્રો અને રૂમમેટ્સ છે.
રિંકુએ આ અંગે ખુશી વ્યક્ત કરતા કહ્યું, “અમે બંને હંમેશા રૂમમાં ક્રિકેટ વિશે જ ચર્ચા કરતા હોઈએ છીએ. આજે અમને સાથે બેટિંગ કરવાનો અને ટીમને જીતાડવાનો મોકો મળ્યો એનો ઘણો આનંદ છે. જ્યારે મેદાન પર અમારી છેલ્લી જોડી બાકી હતી, ત્યારે અમારે ખૂબ જ સમજી વિચારીને રમવાનું હતું અને અમે એમાં સફળ રહ્યા.”
