કુદરતનો બેવડો માર: ગુજરાતમાં આભમાંથી વરસે છે અગનગોળા, તો ૧૬ રાજ્યોમાં વરસાદ-વાવાઝોડાની આફત.
ભારતીય હવામાન વિભાગ (IMD) એ દેશના વાતાવરણમાં મોટા પલટાની આગાહી કરી છે. એક તરફ ગુજરાત સહિત ઉત્તર-પશ્ચિમ ભારત કાળઝાળ ગરમીમાં શેકાઈ રહ્યું છે, તો બીજી તરફ દક્ષિણ બંગાળની ખાડીમાં ચોમાસાના પગરવ શરૂ થઈ ગયા છે. આ પરિવર્તનને કારણે આગામી દિવસોમાં દેશના ૧૬ રાજ્યોમાં ૫૦ થી ૭૦ કિમી પ્રતિ કલાકની ઝડપે પવન ફૂંકાવા સાથે વરસાદની ચેતવણી જારી કરવામાં આવી છે.
ગુજરાતમાં ‘ઓરેન્જ એલર્ટ’: સૌરાષ્ટ્ર અને કચ્છમાં સ્થિતિ ગંભીર
ગુજરાતમાં ઉનાળો તેના આકરા મિજાજમાં છે. તાપમાનનો પારો ૪૫ ડિગ્રીની આસપાસ રહેતા જનજીવન પ્રભાવિત થયું છે. હવામાન વિભાગે ખાસ કરીને કચ્છ, સુરેન્દ્રનગર અને સમગ્ર સૌરાષ્ટ્ર પંથક માટે ‘ઓરેન્જ એલર્ટ’ જાહેર કર્યું છે. આ સિવાય અમદાવાદ, ગાંધીનગર, બનાસકાંઠા, પાટણ, વડોદરા, રાજકોટ અને અમરેલી જેવા શહેરોમાં ગરમીનું ‘યલો એલર્ટ’ આપવામાં આવ્યું છે, જે દર્શાવે છે કે આગામી થોડા દિવસો સુધી અગનવર્ષા યથાવત રહેશે.
દિલ્હી-એનસીઆર અને ઉત્તર પ્રદેશમાં વાતાવરણ પલટાશે
દેશની રાજધાની દિલ્હીમાં ૧૪ થી ૧૬ મે દરમિયાન આંશિક વાદળછાયું વાતાવરણ રહેશે. અહીં ૪૦ થી ૬૦ કિમી પ્રતિ કલાકની ઝડપે પવન ફૂંકાવાની સાથે હળવો વરસાદ પડી શકે છે, જેનાથી ગરમીમાં આંશિક રાહત મળી શકે છે. ઉત્તર પ્રદેશમાં પણ લખનૌ અને પશ્ચિમ યુપીના જિલ્લાઓમાં હળવા વાદળો અને ઝરમર વરસાદની શક્યતા વ્યક્ત કરવામાં આવી છે.
બિહાર, ઝારખંડ અને બંગાળમાં તોફાની વરસાદ
હવામાન વિભાગના જણાવ્યા અનુસાર, બિહાર અને ઝારખંડમાં ૧૪ થી ૧૮ મે દરમિયાન હવામાન અત્યંત સક્રિય રહેશે. દરભંગા અને પૂર્ણિયા જેવા વિસ્તારોમાં ૭૦ કિમી સુધીની ઝડપે પવન ફૂંકાઈ શકે છે. આ રાજ્યોમાં વીજળીના કડાકા-ભડાકા સાથે વરસાદ થવાની પૂરી શક્યતા છે, જેને પગલે લોકોને સાવધ રહેવા સૂચના આપવામાં આવી છે.
પહાડી રાજ્યોમાં હિમવર્ષા અને વરસાદ
ઉત્તરાખંડ અને હિમાચલ પ્રદેશમાં પણ હવામાન પ્રતિકૂળ રહેવાની ધારણા છે. હિમાચલના ઊંચાઈવાળા વિસ્તારોમાં હિમવર્ષા અને નીચાણવાળા વિસ્તારોમાં ભારે વરસાદની આગાહી છે. શિમલા, મનાલી અને ધર્મશાલામાં પ્રવાસીઓને સાવચેતી રાખવા જણાવાયું છે. ઉત્તરાખંડમાં ચારધામ યાત્રાળુઓ માટે પણ લપસણી સ્થિતિ અને ભૂસ્ખલનની ચેતવણી આપવામાં આવી છે.
રાજસ્થાનમાં લૂનું સામ્રાજ્ય
રાજસ્થાનમાં જેસલમેર અને બિકાનેર જેવા સરહદી જિલ્લાઓમાં તાપમાન ૪૫ ડિગ્રીને પાર કરી જશે. પશ્ચિમ રાજસ્થાનમાં ૧૫ થી ૧૮ મે દરમિયાન તીવ્ર હીટવેવની સ્થિતિ રહેશે, જે સ્વાસ્થ્ય માટે જોખમી બની શકે છે.
ચોમાસું આંદામાન-નિકોબાર ટાપુઓ તરફ આગળ વધી રહ્યું છે ત્યારે દેશના અલગ-અલગ ભાગોમાં જોવા મળી રહેલી આ વિરોધાભાસી હવામાનની સ્થિતિ આગામી થોડા દિવસો સુધી યથાવત રહેશે.
