કેનેડામાં અપહરણ અને ખંડણી કેસમાં ખળભળાટ: ૪ ભારતીય મૂળના યુવકોની ધરપકડ, પાંચમાની શોધખોળ ચાલુ
કેનેડાથી ભારતીય સમુદાયને ચોંકાવનારા અને ચિંતામાં મૂકી દે તેવા સમાચાર સામે આવ્યા છે. કેનેડાના અલ્બર્ટા પ્રાંતના કેલગરી શહેરમાં પોલીસે અપહરણ અને ખંડણી (Extortion) ના એક અત્યંત ગંભીર મામલામાં ચાર ભારતીય મૂળના વ્યક્તિઓની ધરપકડ કરી છે. જ્યારે આ ગુનામાં સામેલ પાંચમા આરોપીની પોલીસ હજુ પણ સઘન શોધખોળ કરી રહી છે.
કેલગરી પોલીસ સર્વિસ (CPS) ના ઓર્ગેનાઈઝ્ડ ક્રાઈમ એન્ડ ઓફેન્ડર મેનેજમેન્ટ સેક્શને શુક્રવારે આ અંગે સત્તાવાર જાહેરાત કરી હતી. પોલીસે જણાવ્યું હતું કે, આ પાંચેય શખ્સોએ શહેરમાં એક વ્યક્તિ પાસેથી મોટી રકમ પડાવવા માટે અપહરણનું એક પદ્ધતિસરનું અને મોટું ષડયંત્ર રચ્યું હતું. પોલીસના જણાવ્યા અનુસાર, કેનેડામાં સાઉથ એશિયન (દક્ષિણ એશિયાઈ) સમુદાયને નિશાન બનાવીને ચલાવવામાં આવી રહેલી ખંડણીની શ્રેણીબદ્ધ પ્રવૃત્તિઓ અને હિંસાનો જ આ એક ભાગ છે.
એડમોન્ટનથી ફિલ્મી ઢબે અપહરણ અને કેલગરી સુધીની સફર
પોલીસ તપાસમાં બહાર આવેલી વિગતો અનુસાર, આ સમગ્ર ઘટના કોઈ ફિલ્મી વાર્તા જેવી છે. ગત ૬ મેની સાંજે આશરે સાડા છ થી સાડા સાત વાગ્યાના ગાળામાં, ચાર હથિયારધારી શખ્સોએ એડમોન્ટન શહેરમાં રહેતા એક વ્યક્તિના ઘરમાં ઘૂસીને તેનું અપહરણ કરી લીધું હતું. અપહરણકારોએ પીડિત વ્યક્તિ પર હુમલો કર્યો હતો, તેને બંદૂકની અણીએ જાનથી મારી નાખવાની ધમકી આપી હતી અને પરાણે એક વાહનમાં બેસાડીને તેને એડમોન્ટનથી આશરે ૩૦૦ કિલોમીટર દૂર કેલગરી શહેરમાં લઈ આવ્યા હતા.
અપહરણકારોનો અસલી હેતુ આ પીડિત વ્યક્તિ નહીં, પરંતુ કેલગરીમાં રહેતો તેનો એક ધનિક મિત્ર હતો. આરોપીઓ પીડિતને તેના મિત્રના ઘરની બહાર લઈ ગયા હતા, જ્યાં અન્ય કેટલાક શખ્સો અને ગાડીઓ પણ હાજર હતી. ત્યાં તેમણે પીડિત પર ફરીથી હુમલો કર્યો અને તેને દબાણ કર્યું કે તે કોઈ બહાને તેના મિત્રને ઘરની બહાર બોલાવે જેથી તેઓ તેના મિત્ર પાસેથી મોટી રકમની ખંડણી માંગી શકે. જો કે, પીડિતે પોતાના મિત્રને ફસાવવાનો સાફ ઈનકાર કરી દીધો હતો, જેના કારણે અપહરણકારોએ તેને ફરીથી ઢોર માર માર્યો હતો.
મિત્રના પરિવારે બચાવ્યો જીવ; પોલીસ એક્શનમાં આવી
જ્યારે આ બદમાશો ઘરની બહાર જ હાજર હતા, ત્યારે પીડિતનો મિત્ર અને તેની પત્ની કોઈ કામસર પોતાના ઘરની બહાર નીકળ્યા હતા. આરોપીઓએ તરત જ તેમનો પીછો કર્યો અને તેમને હથિયાર બતાવીને ડરાવવાનો પ્રયત્ન કર્યો. પરિસ્થિતિ વણસતી જોઈને મિત્ર અને તેની પત્ની જીવ બચાવીને પાછા પોતાના ઘરમાં ભાગી ગયા હતા અને અંદરથી દરવાજો બંધ કરીને તાત્કાલિક પોલીસને ફોન કરી દીધો હતો.
નજીકમાં જ પેટ્રોલિંગ કરી રહેલી કેલગરી પોલીસે માહિતી મળતાની સાથે જ એક્શન લીધું અને શંકાસ્પદ વાહનની નાકાબંધી કરી દીધી. પોલીસે એક કારને અટકાવીને તેમાંથી ઘટનાસ્થળે જ બે આરોપીઓની ધરપકડ કરી લીધી હતી. જો કે, આ સમયે એડમોન્ટનથી થયેલા અસલી અપહરણ અંગે પોલીસને કોઈ સત્તાવાર ફરિયાદ મળી નહોતી.
બાકીના શખ્સો જે પીડિતને લઈને ભાગી છૂટ્યા હતા, તેઓ તેને આખી રાત ફેરવ્યા બાદ બીજા દિવસે વહેલી સવારે પાછા એડમોન્ટન લઈ ગયા અને તેના ઘરની નજીક છોડી દીધા હતા. મુક્ત થયા બાદ પીડિતે હિંમત દાખવીને પોલીસનો સંપર્ક કર્યો અને પોતાની સાથે થયેલી આપવીતી જણાવી, ત્યારબાદ કેસની ગંભીરતા વધી ગઈ હતી.
હથિયારો સાથે ઝડપાયા ભારતીય મૂળના યુવાનો
આ કેસની ઉંડાણપૂર્વક તપાસ કર્યા બાદ, મંગળવારે કેલગરી પોલીસની સ્પેશિયલ ટેક્ટિકલ ટીમે ફરીથી એક ઓપરેશન હાથ ધર્યું અને રસ્તા પરથી અન્ય બે શખ્સોની પણ ધરપકડ કરી લીધી. આ સર્ચ ઓપરેશન દરમિયાન પોલીસના હાથે એક પ્રાઇવેટલી મેન્યુફેક્ચર્ડ ફાયરઆર્મ (PMF) એટલે કે ગેરકાયદેસર રીતે બનાવેલી પિસ્તોલ પણ મળી આવી છે, જેનો ઉપયોગ ગુનામાં કરવામાં આવ્યો હતો.
પકડાયેલા ચારેય આરોપીઓની ઓળખ નીચે મુજબ થઈ છે:
૧. તરણવીર સિંહ (ઉંમર ૨૪ વર્ષ)
૨. દક્ષ ગૌતમ (ઉંમર ૨૫ વર્ષ)
૩. આકાશદીપ સિંહ (ઉંમર ૧૮ વર્ષ)
૪. પ્રદીપ સિંહ (ઉંમર ૨૪ વર્ષ)
આ ચારેય યુવકો કેલગરીના જ રહેવાસી છે અને તેમની સામે ગેરકાયદે હથિયાર રાખવા, અપહરણ કરવું, જીવલેણ હુમલો કરવો અને ખંડણી માંગવા જેવા ગંભીર ગુનાઓ હેઠળ કેસ દાખલ કરવામાં આવ્યો છે. આ ઉપરાંત, આ ગેંગના પાંચમા સભ્ય ૨૯ વર્ષીય ગગનદીપ સિંહની ધરપકડ કરવા માટે પોલીસે તેના ફોટા જાહેર કર્યા છે અને જનતાની મદદ માંગી છે.
કેનેડામાં સાઉથ એશિયન સમુદાયમાં ભયનો માહોલ
કેલગરી પોલીસના જણાવ્યા અનુસાર, આ કેસ ઉકેલવામાં તેમને એડમોન્ટન પોલીસ સર્વિસ અને કેનેડા બોર્ડર સર્વિસ એજન્સી (CBSA) તરફથી મોટો સહયોગ મળ્યો છે. ચિંતાજનક બાબત એ છે કે કેનેડામાં ભારતીય મૂળના વેપારીઓ અને સુખી સંપન્ન પરિવારોને નિશાન બનાવીને ખંડણી માંગવાના કિસ્સાઓ ઝડપથી વધી રહ્યા છે. આ પહેલા પણ ગ્રેટર ટોરોન્ટો એરિયાના બ્રેમ્પટન, બ્રિટિશ કોલંબિયાના સરે અને એડમોન્ટન જેવા વિસ્તારોમાંથી આવી જ ગેંગ અને ભારતીય મૂળના ગુનેગારોની ધરપકડ કરવામાં આવી ચૂકી છે.
પોલીસના સત્તાવાર આંકડા અનુસાર, એપ્રિલ ૨૦૨૫ થી અત્યાર સુધીમાં માત્ર કેલગરી શહેરમાં જ ખંડણી સંબંધિત ૪૫ થી વધુ ગુનાહિત ઘટનાઓ નોંધાઈ છે. આમાંથી ૧૯ ઘટનાઓ એવી હતી જેમાં ડર ફેલાવવા માટે લોકોના ઘરો, બિઝનેસના સ્થળો કે વાહનો પર ખુલ્લેઆમ ફાયરિંગ (શૂટિંગ) કરવામાં આવ્યું હતું. કેલગરીમાં ચાલી રહેલી ખંડણીની આ આખી સિરીઝમાં અત્યાર સુધીમાં કુલ ૧૧ લોકો સામે ગુનાહિત આરોપો દાખલ કરવામાં આવ્યા છે, જે કેનેડામાં વસતા ભારતીય સમુદાયની સુરક્ષા સામે મોટો સવાલ ઉભો કરે છે.
