૧ કરોડ કર્મચારીઓ અને પેન્શનરો માટે રાહતના સમાચાર!
દેશના ૧ કરોડથી વધુ કેન્દ્ર સરકારના કર્મચારીઓ અને પેન્શનરોને ટૂંક સમયમાં મોટી રાહત મળી શકે છે. ફાઇનાન્સિયલ એક્સપ્રેસના અહેવાલ મુજબ, નાણા રાજ્યમંત્રી પંકજ ચૌધરીએ રાજ્યસભામાં માહિતી આપી હતી કે સરકારને ૮મા પગાર પંચ સંબંધિત વિવિધ હિસ્સેદારો પાસેથી માહિતી મળી છે. તેમણે કહ્યું કે આ અંગેનું સત્તાવાર જાહેરનામું “યોગ્ય સમયે” બહાર પાડવામાં આવશે.
૮મા પગાર પંચમાં નિમણૂક ક્યારે કરવામાં આવશે?
મોદી સરકારે ૧૬ જાન્યુઆરી ૨૦૨૫ના રોજ આઠમા પગાર પંચની રચનાની જાહેરાત કરી હતી. જોકે, ૬ મહિનાથી વધુ સમય વીતી ગયા પછી પણ, ચેરમેન અને સભ્યોની નિમણૂક અંગે કોઈ સત્તાવાર જાહેરાત કરવામાં આવી નથી.
હાલના ૭મા પગાર પંચનો કાર્યકાળ ૩૧ ડિસેમ્બર ૨૦૨૫ના રોજ સમાપ્ત થશે અને ૮મા પગાર પંચની ભલામણો ૧ જાન્યુઆરી ૨૦૨૬થી લાગુ થવાની ધારણા છે.
કર્મચારીઓ અને પેન્શનરોની ચિંતાઓ વધી
કેન્દ્ર સરકાર સામાન્ય રીતે કર્મચારીઓના પગાર અને પેન્શનની સમીક્ષા કરવા માટે દર ૧૦ વર્ષે પગાર પંચની રચના કરે છે. ૨૦૧૬માં લાગુ કરાયેલા સાતમા પગાર પંચ પછી પગાર અને પેન્શનમાં મોટો સુધારો થયો હતો. હવે કર્મચારીઓ અને પેન્શનરો આઠમા પગાર પંચની ભલામણોની આતુરતાથી રાહ જોઈ રહ્યા છે.
