ઇંગ્લેન્ડની ‘ધ હંડ્રેડ 2026’ ટૂર્નામેન્ટનો આજથી પ્રારંભ: ચાર ભારતીય મહિલા ખેલાડીઓ ચમકશે; જાણો ક્યારે અને ક્યાં જોશો લાઇવ મેચો
વિશ્વભરના ક્રિકેટ ચાહકો માટે એક રોમાંચક સમાચાર સામે આવ્યા છે. ઇંગ્લેન્ડ એન્ડ વેલ્સ ક્રિકેટ બોર્ડ (ECB) ની સૌથી લોકપ્રિય અને ઝડપી ફોર્મેટ ગણાતી ‘ધ હંડ્રેડ 2026’ ટૂર્નામેન્ટની નવી સીઝનનો આજથી એટલે કે ૨૧ જુલાઈથી ધમાકેદાર પ્રારંભ થઈ રહ્યો છે. ટૂર્નામેન્ટની પ્રથમ અને ઓપનિંગ મેચ લંડનના ઐતિહાસિક સ્ટેડિયમ ‘ધ ઓવલ’ ખાતે એમઆઈ લંડન (MI London) અને સનરાઇઝર્સ લીડ્સ વચ્ચે રમાશે.
એમઆઈ લંડનની ટીમ (જે અગાઉ ઓવલ ઇન્વિન્સિબલ્સ તરીકે ઓળખાતી હતી) વર્તમાન ડિફેન્ડિંગ ચેમ્પિયન છે. ગયા વર્ષે ટ્રેન્ટ રોકેટ્સને હરાવીને ટાઇટલ જીતનારી એમઆઈ લંડનની ટીમ આ સીઝનની શરૂઆત પણ વિજય સાથે કરવાનો લક્ષ્ય રાખશે. ૨૧ જુલાઈથી શરૂ થઈ રહેલો ક્રિકેટનો આ મહાકુંભ ૧૬ ઓગસ્ટ સુધી ચાલશે, જેમાં પુરુષ અને મહિલા વિભાગમાં આઠ-આઠ ટીમો ટ્રોફી માટે એકબીજા સામે બાથ ભીડશે.
વિમેન્સ હંડ્રેડમાં ચાર ભારતીય ખેલાડીઓ બતાવશે પોતાનો દમ
ધ હંડ્રેડની ખાસિયત એ છે કે તેની પુરુષ અને મહિલા ટૂર્નામેન્ટ એક જ દિવસે અને એક સાથે જ શરૂ થાય છે. આ વર્ષે વિમેન્સ હંડ્રેડમાં ભારતની ચાર દિગ્ગજ મહિલા ખેલાડીઓ પોતપોતાની ટીમો માટે મેદાનમાં ઉતરશે, જે ભારતીય ફેન્સ માટે મોટા ઉત્સાહના સમાચાર છે.
ભારતની સ્ટાર ઓપનર સ્મૃતિ મંધાના અને મધ્યમ ક્રમની વિસ્ફોટક બેટ્સમેન જેમીમા રોડ્રિગ્સ ટૂર્નામેન્ટના મુખ્ય આકર્ષણ રહેશે. હરાજી પહેલા જ સ્મૃતિ મંધાનાને માન્ચેસ્ટર સુપર જાયન્ટ્સ ટીમે અને જેમીમા રોડ્રિગ્સને સધર્ન બ્રેવ ટીમે ડાયરેક્ટ સાઇન કરી લીધી હતી.
બીજી તરફ, તાજેતરમાં યોજાયેલી હરાજીમાં ભારતની અનુભવી ઓલરાઉન્ડર દીપ્તિ શર્માને સનરાઇઝર્સ લીડ્સ દ્વારા અને સ્ટાર વિકેટકીપર-બેટ્સમેન રિચા ઘોષને માન્ચેસ્ટર સુપર જાયન્ટ્સ દ્વારા તેમની બેઝ પ્રાઇસ ₹૩૪ લાખમાં ખરીદવામાં આવી હતી. ગત સીઝનમાં નોર્ધન સુપરચાર્જર્સની ટીમે વિમેન્સ હંડ્રેડની ટ્રોફી જીતી હતી, પરંતુ આ વખતે ભારતીય સ્ટાર્સથી સજ્જ ટીમો દાવેદાર માનવામાં આવી રહી છે.
શેફાલી સહિતના ખેલાડીઓ અનસોલ્ડ; જેમ્સે બનાવ્યો વિક્રમ
જ્યાં એક તરફ ચાર ભારતીય મહિલા ખેલાડીઓ પર મોટી બોલી લાગી, ત્યાં બીજી તરફ પુરુષોની હંડ્રેડ ટૂર્નામેન્ટમાં આ વર્ષે પણ કોઈ ભારતીય પુરુષ ખેલાડી રમતો જોવા મળશે નહીં.
મહિલા હરાજીની વાત કરીએ તો, ભારતની વર્લ્ડ કપ વિજેતા ટીમના કેટલાક અગ્રણી નામોને મોટો આંચકો લાગ્યો હતો. ભારતની વિસ્ફોટક ઓપનર શેફાલી વર્મા, સ્પિનર રાધા યાદવ અને શ્રી ચારણી જેવા નામો હરાજીના લિસ્ટમાં સામેલ હતા, પરંતુ આશ્ચર્યજનક રીતે કોઈપણ ટીમે તેમને ખરીદવામાં રસ દાખવ્યો ન હતો અને તેઓ ‘વેચાયા વિના’ (Unsold) રહ્યા હતા.
Cricket’s newest format just got a new destination in India! 🇮🇳
The Hundred now on JioHotstar & Star Sports 📺📲#TheHundred 👉 STARTS TUE, 21st JULY! pic.twitter.com/60M87vIMbg
— Star Sports (@StarSportsIndia) July 21, 2026
બીજી તરફ, પુરુષોની હરાજીમાં ભારે બોલી જોવા મળી હતી. ઇંગ્લેન્ડના સ્ટાર ઓલરાઉન્ડર જેમ્સ કોલ્સ આ વર્ષના સૌથી મોંઘા ખેલાડી તરીકે ઉભરી આવ્યા હતા. લંડન સ્પિરિટ ટીમે તેમને £૩૯૦,૦૦૦ (આશરે ₹૪.૮ કરોડ) ની માતબર રકમ ચૂકવીને પોતાની ટીમમાં સામેલ કર્યા હતા.
ક્યારે અને ક્યાં લાઈવ જોઈ શકાશે ‘ધ હંડ્રેડ’ની તમામ મેચો?
ડિજિટલ ઓનલાઇન સ્ટ્રીમિંગ: જે ફેન્સ મોબાઇલ અથવા લેપટોપ પર મેચ જોવા માગે છે, તેઓ JioHotstar એપ અને તેની અધિકૃત વેબસાઇટ પર તમામ મેચોનું લાઇવ સ્ટ્રીમિંગ માણી શકે છે.
ટીવી ટેલિકાસ્ટ: જે લોકો ઘરના મોટા પડદા પર ટીવી પર મેચ જોવાનું પસંદ કરે છે, તેમના માટે સ્ટાર સ્પોર્ટ્સ નેટવર્ક (Star Sports Network) ની વિવિધ સ્પોર્ટ્સ ચેનલો પર આખી ટૂર્નામેન્ટનું સીધું પ્રસારણ (Live Telecast) કરવામાં આવશે.
