ભારત સામેની T20 શ્રેણી માટે ઝિમ્બાબ્વેની ટીમ જાહેર: નવોદિત તફાદ્ઝવા ત્સિગાને પ્રથમવાર સ્થાન, સિકંદર રઝા સોંપાઈ કમાન
ભારત અને ઝિમ્બાબ્વે વચ્ચે ૨૩ જુલાઈથી શરૂ થઈ રહેલી ત્રણ મેચોની T20 આંતરરાષ્ટ્રીય શ્રેણી માટે ઝિમ્બાબ્વે ક્રિકેટે પોતાની ૧૫ સભ્યોની મજબૂત ટીમની જાહેરાત કરી દીધી છે. અનુભવી ઓલરાઉન્ડર સિકંદર રઝા આ શ્રેણીમાં ઝિમ્બાબ્વેની આગેવાની કરતા જોવા મળશે. તાજેતરમાં બાંગ્લાદેશ સામે ઘરઆંગણે રમાયેલી T20 શ્રેણીની તુલનામાં ટીમમાં ત્રણ મહત્વપૂર્ણ ફેરફારો કરવામાં આવ્યા છે. આ ટીમમાં નવોદિત વિકેટકીપર-બેટ્સમેન તફાદ્ઝવા ત્સિગાને પ્રથમ વખત રાષ્ટ્રીય T20 ટીમમાં કોલ-અપ મળ્યો છે, જે આ શ્રેણી માટેનું મુખ્ય આકર્ષણ બન્યો છે.
ઝિમ્બાબ્વે ક્રિકેટ બોર્ડ દ્વારા જાહેર કરાયેલી યાદી મુજબ, ઈજામાંથી મુક્ત થયેલા ઓલરાઉન્ડર વેસ્લી માધેવેરે અને યુવા ઝડપી બોલર ન્યુમેન ન્યામહુરીની ટીમમાં વાપસી થઈ છે. આ બંને ખેલાડીઓ ફિટ થઈને પાછા ફરતાં ટીમની બોલિંગ અને બેટિંગ બંને વિભાગોને ઘણું બળ મળશે. આ ઉપરાંત, બાંગ્લાદેશ સામેની શ્રેણી દરમિયાન ન્યામહુરીના સ્થાને ટીમમાં સામેલ કરાયેલા ઝડપી બોલર તનાકા ચિવાંગા પણ પોતાના ઉત્કૃષ્ટ પ્રદર્શનના આધારે આ શ્રેણી માટે સ્થાન જાળવી રાખવામાં સફળ રહ્યા છે.
બર્લ, બેનેટ અને મુઝારાબાની પર રહેશે મોટી જવાબદારી
ભારત સામેની આ શ્રેણીની ત્રણેય મેચો હરારે સ્પોર્ટ્સ ક્લબ ખાતે જ રમાવાની છે. પહેલી મેચ ૨૩ જુલાઈએ, જ્યારે બીજી અને ત્રીજી મેચ અનુક્રમે ૨૫ અને ૨૬ જુલાઈએ આયોજિત થશે. હોમ ગ્રાઉન્ડ પર રમાનારી આ શ્રેણીમાં ઝિમ્બાબ્વે તરફથી બ્રાયન બેનેટ, રાયન બર્લ અને સ્ટાર ઝડપી બોલર બ્લેસિંગ મુઝારાબાની જેવા અનુભવી ખેલાડીઓ પર ટીમની જીતનો મોટો દારમદાર રહેશે. ટીમના કેપ્ટન સિકંદર રઝા સાથે મળીને આ સીનિયર ખેલાડીઓ ભારતીય યુવા ટીમને આકરો પડકાર આપવા માટે તૈયાર છે.
ઝિમ્બાબ્વેની ૧૫ સભ્યોની T20 ટીમ:
સિકંદર રઝા (કેપ્ટન), બ્રાયન બેનેટ, રાયન બર્લ, તનાકા ચિવાંગા, બેન કુરાન, બ્રેડ ઇવાન્સ, વેસ્લી માધેવેરે, તાદિવાનાશે મારુમાની, વેલિંગ્ટન મસાકાડઝા, બ્લેસિંગ મુઝારાબાની, ડીયોન માયર્સ, રિચાર્ડ નગારવા, ન્યુમેન ન્યામહુરી, મિલ્ટન શુમ્બા અને તફાડ્ઝવા ત્સિગા (વિકેટકીપર).
Zimbabwe name squad for India T20I series
Details 🔽https://t.co/ZjoUQJJi42 pic.twitter.com/VuiEE2QHWC
— Zimbabwe Cricket (@ZimCricketv) July 22, 2026
આંકડામાં ભારતનું પલડું ભારે: ઝિમ્બાબ્વે માત્ર ૩ મેચ જીતી શક્યું છે
આંતરરાષ્ટ્રીય T20 ક્રિકેટના ઈતિહાસ પર નજર કરીએ તો ભારત સામે ઝિમ્બાબ્વેનો રેકોર્ડ ખાસ ઉત્સાહજનક રહ્યો નથી. બંને દેશો વચ્ચે અત્યાર સુધીમાં કુલ ૧૪ T20 આંતરરાષ્ટ્રીય મેચો રમાઈ છે, જેમાંથી ભારતે ૧૧ મેચોમાં વિજય મેળવ્યો છે, જ્યારે ઝિમ્બાબ્વે માત્ર ૩ મેચ જ જીતી શક્યું છે.
