એક TTE ના શિરે વધુમાં વધુ કેટલા ડબ્બા? લોકસભામાં રેલવે મંત્રીએ સ્પષ્ટ કર્યા નવા નિયમો
ભારતીય રેલવે ક્ષેત્રે રોજગાર અને વહીવટી કામગીરી અંગે સંસદમાં મહત્વની માહિતી સામે આવી છે. લોકસભા અને રાજ્યસભામાં સાંસદો દ્વારા પૂછવામાં આવેલા વિવિધ પ્રશ્નોના જવાબ આપતાં કેન્દ્રીય રેલવે મંત્રી અશ્વિની વૈષ્ણવે જણાવ્યું હતું કે, છેલ્લા ૧૨ વર્ષ દરમિયાન ભારતીય રેલવેએ દેશભરમાં ૫.૫૬ લાખથી વધુ લોકોને પારદર્શક રીતે રોજગારી પૂરી પાડી છે.
આ સાથે જ તેમણે ટ્રેનોમાં TTE ના વર્કલોડ અને તાજેતરમાં શરૂ કરાયેલી વંદે ભારત સ્લીપર તથા અમૃત ભારત એક્સપ્રેસ ટ્રેનોના ટિકિટ રદ્દીકરણ (Cancellation) ના સુધારેલા નિયમોની પણ વિસ્તૃત વિગતો ગૃહ સમક્ષ રજૂ કરી હતી.
યુપીએ શાસન સાથે ભરતીના આંકડાની સરખામણી
રેલવે મંત્રીએ સંસદમાં આંકડાકીય વિગતો આપતાં જણાવ્યું હતું કે, વર્ષ ૨૦૧૪ થી જૂન ૨૦૨૬ સુધીના સમયગાળા દરમિયાન ભારતીય રેલવેના વિવિધ ઝોન અને વિભાગોમાં કુલ ૫,૫૬,૦૦૦ ઉમેદવારોની ભરતી કરવામાં આવી છે. આ સમયગાળા દરમિયાન એકલા દક્ષિણ રેલવે (Southern Railway) ક્ષેત્રમાં જ ૫૦,૪૮૫ લોકોને નોકરી આપવામાં આવી છે.
અગાઉની સરકાર સાથે તુલના કરતાં તેમણે ઉમેર્યું હતું કે, વર્ષ ૨૦૦૪-૦૫ થી ૨૦૧૩-૧૪ ના યુપીએ શાસનના ૧૦ વર્ષ દરમિયાન રેલવેમાં ૪.૧૧ લાખ લોકોની ભરતી થઈ હતી, જ્યારે વર્તમાન સમયમાં ભરતીનો આંકડો નોંધપાત્ર રીતે વધ્યો છે.
તેમણે સ્પષ્ટ કર્યું કે બદલાતી ટેકનોલોજી અને જરૂરિયાતો મુજબ વિવિધ ઝોનમાંથી આવતી માંગને આધારે પારદર્શક ભરતી પરીક્ષાઓ યોજવામાં આવે છે.
TTE ની જવાબદારી અને ડબ્બાઓની મર્યાદા
નાંદેડના કોંગ્રેસના સાંસદ રવિન્દ્ર વસંતરાવ ચવ્હાણ દ્વારા ટ્રેનોમાં TTE પરના કામના બોજ અંગે પૂછાયેલા પ્રશ્નનો જવાબ આપતાં રેલવે મંત્રીએ ચોક્કસ મર્યાદાઓની જાહેરાત કરી હતી.
નવી વહીવટી માર્ગદર્શિકા મુજબ, ટ્રેનમાં એક TTE ને વધુમાં વધુ પાંચ AC કોચ (AC Coaches) અથવા ત્રણ ચેરકાર અથવા ત્રણ સ્લીપર કોચની જવાબદારી જ સોંપવામાં આવે છે. આનાથી વધુ કોચ માટે એક જ TTE ને ફરજ સોંપી શકાય નહીં.
લાંબા અંતરની ટ્રેનો, જેમ કે દિલ્હીના સરાઈ રોહિલ્લા અને ઉધમપુર વચ્ચે ચાલતી ટ્રેન નંબર ૨૨૪૦૧/૨૨૪૦૨ માં TTE ના વર્કલોડ અંગે તેમણે ઉમેર્યું કે, ટ્રેનમાં તૈનાત ચેકિંગ સ્ટાફની સંખ્યા ડબ્બાઓના પ્રકાર પર આધાર રાખે છે, જેથી મુસાફરોને મદદ મળી રહે અને ટિકિટ ચકાસણી યોગ્ય રીતે થઈ શકે.
રદ થયેલી ટિકિટોની આવક અને રિફંડના નવા નિયમો
રાજ્યસભામાં એક લેખિત જવાબ દરમિયાન રેલવે મંત્રીએ સ્પષ્ટતા કરી હતી કે, રદ થયેલી અથવા વેટિંગ લિસ્ટવાળી ટિકિટોમાંથી મળતી આવકનો કોઈ અલગ કે ઝોનવાર રેકોર્ડ રેલવે દ્વારા રાખવામાં આવતો નથી, પરંતુ આ રકમ સામાન્ય રેલવે આવકમાં જમા થાય છે.
આ સાથે તેમણે વંદે ભારત સ્લીપર એક્સપ્રેસ અને અમૃત ભારત એક્સપ્રેસ ટ્રેનો માટે કન્ફર્મ ટિકિટ રદ કરવા અંગેના રિફંડ નિયમો વિશે પણ માહિતી આપી હતી:
-
૭૨ કલાક પહેલાં કેન્સલેશન: જો કન્ફર્મ ટિકિટ ટ્રેનના નિયત પ્રસ્થાન સમયથી ઓછામાં ઓછા ૭૨ કલાક પહેલાં રદ કરવામાં આવે છે, તો કુલ ભાડામાંથી ૨૫ ટકા રકમ કાપીને બાકીની રકમ રિફંડ કરવામાં આવશે.
-
૭૨ થી ૮ કલાક વચ્ચે કેન્સલેશન: જો ટિકિટ પ્રસ્થાનના ૭૨ કલાકથી લઈને ૮ કલાક સુધીના સમયગાળા દરમિયાન રદ કરવામાં આવશે, તો ભાડાની ૫૦ ટકા રકમ કાપવામાં આવશે.
-
૮ કલાકથી ઓછો સમય: જો ટ્રેન ઉપડવાના ૮ કલાક કે તેથી ઓછા સમયમાં કન્ફર્મ ટિકિટ રદ કરવામાં આવશે, તો મુસાફરને કોઈ પણ પ્રકારનું રિફંડ મળશે નહીં.
