યુવાનોના ભવિષ્ય સાથે રમત રમનારાને બક્ષવામાં નહીં આવે – પીએમ મોદી

દેશમાં સ્પર્ધાત્મક અને જાહેર પરીક્ષાઓને પારદર્શક તથા ભ્રષ્ટાચાર મુક્ત બનાવવા માટે કેન્દ્ર સરકારે એક ઐતિહાસિક કદમ ઉઠાવ્યું છે. સંસદના બંને ગૃહો—લોકસભા અને રાજ્યસભા—માં પેપર લીક વિરોધી કડક કાયદાનું બિલ પસાર થયા બાદ વડાપ્રધાન નરેન્દ્ર મોદીનો એક ખાસ વીડિયો સંદેશ સામે આવ્યો છે.

ગુરુવારે મોડી રાત્રે પોતાના સોશિયલ મીડિયા એકાઉન્ટ્સ—ઇન્સ્ટાગ્રામ, ‘એક્સ’ (ટ્વિટર) અને ફેસબુક પર આ વીડિયો જાહેર કરતા પીએમ મોદીએ દેશના કરોડો યુવાનો અને વિદ્યાર્થીઓને ખાતરી આપી હતી કે હવે દેશમાં પરીક્ષા પ્રણાલીને અત્યંત મજબૂત અને વિશ્વસનીય બનાવી દેવામાં આવી છે.

રાજ્યોના સૂચનો અને વિશ્વસ્તરીય સુધારા

પોતાના વિડીયો સંદેશની શરૂઆત સાથી નાગરિકો અને યુવા મિત્રોને સંબોધીને કરતા પીએમ મોદીએ જણાવ્યું હતું કે, “મિત્રો, ભારત એક વિશ્વકક્ષાની પારદર્શક પરીક્ષા પ્રણાલી વિકસાવવા માટે સતત આગળ વધી રહ્યું છે. આ માટે માત્ર કાયદો બનાવવામાં નથી આવ્યો, પરંતુ તમામ રાજ્યોના મૂલ્યવાન સૂચનોને ધ્યાનમાં લેવામાં આવ્યા છે.”

તેમણે ઉમેર્યું કે ટાસ્ક ફોર્સની રચના કરવી હોય કે કેસોના ઝડપી નિકાલ માટે ફાસ્ટ ટ્રેક કોર્ટ બનાવવાની વાત હોય, કેન્દ્ર સરકારે તમામ પાસાઓ પર ગંભીરતાથી કામ કર્યું છે.

Parliament passes a Bill that makes our examination system more robust! pic.twitter.com/OEvLKXoUaf

— Narendra Modi (@narendramodi) July 30, 2026

યુવાનોના ભવિષ્ય સાથે રમત રમનારા માફિયાઓ સામે લાલ આંખ

દેશની શિક્ષણ પ્રણાલીમાં રહેલી ખામીઓ પર ચિંતા વ્યક્ત કરતા વડાપ્રધાન મોદીએ કહ્યું કે, “છેલ્લા કેટલાક દાયકાઓથી દેશનું દરેક રાજ્ય અને કેન્દ્ર સરકાર પેપર લીકની ગંભીર સમસ્યાનો સામનો કરી રહી હતી. આ દૂષણને કારણે દેશના હોંશિયાર બાળકો અને મહેનતુ યુવાનોના ભવિષ્ય પર મોટું જોખમ ઊભું થતું હતું. તેથી દેશભરમાં, રાજ્યોમાં અને કેન્દ્રીય સ્તરે શિક્ષણ તથા પરીક્ષા પ્રણાલીમાં આ મૂળભૂત સુધારા કરવા અત્યંત જરૂરી બની ગયા હતા.”

તેમણે સ્પષ્ટ શબ્દોમાં ચેતવણી આપતા જણાવ્યું કે, હવે પરીક્ષા પ્રક્રિયામાં આધુનિક ટેકનોલોજીનો મહત્તમ ઉપયોગ કરવામાં આવશે. કોઈ પણ પેપર માફિયા, પેપર લીક કરતી ગેંગ કે દેશના યુવાનોના ભવિષ્ય સાથે રમત રમનારી કોઈ પણ અસામાજિક ટોળકીને હવે ચલાવી લેવામાં કે બક્ષવામાં આવશે નહીં.

સંસદના બંને ગૃહોએ આપી મંજૂરી

પોતાના વચનનો પુનરોચ્ચાર કરતા પીએમ મોદીએ જણાવ્યું કે, “અમે દેશના યુવાનોને કડક કાયદો લાવવાનું વચન આપ્યું હતું, જે આજે પૂર્ણ થયું છે. છેલ્લા બે દિવસમાં સંસદના બંને ગૃહોમાં તમામ માનનીય સાંસદો દ્વારા આ વિષય પર ઊંડાણપૂર્વક ચર્ચા કરવામાં આવી છે અને બંને ગૃહોએ આ કઠોર કાયદાની કલમો અને જોગવાઈઓને સર્વાનુમતે મંજૂરી આપી દીધી છે.”

તેમણે દેશવાસીઓને આહ્વાન કરતા કહ્યું કે, “વિશ્વસનીય પરીક્ષા પ્રણાલી તરફ આગળ વધવાનું આ એક મહત્વપૂર્ણ પગલું છે. આપણે આવી ખામીયુક્ત સ્થિતિને વધુ સમય સુધી ચાલુ રાખી શકીએ નહીં. ચાલો, આપણે સૌ સાથે મળીને ખભેથી ખભો મિલાવીને ‘વિકસિત ભારત’ના સ્વપ્નને પૂર્ણ કરવા તરફ આગળ વધીએ.”

કાયદામાં ૧૦ વર્ષની જેલ અને ₹૫૦ લાખના દંડની જોગવાઈ

સંસદ દ્વારા પસાર કરવામાં આવેલા “જાહેર પરીક્ષાઓ (અન્યાયી માધ્યમો નિવારણ) સુધારા બિલ, ૨૦૨૬” માં ગેરરીતિ આચરનારાઓ સામે અત્યંત સખત સજા નક્કી કરવામાં આવી છે.

આ નવા કાયદા હેઠળ જો કોઈ વ્યક્તિ, સંસ્થા કે ગેંગ પ્રશ્નપત્ર લીક કરવામાં, આન્સર શીટ સાથે ચેડાં કરવામાં કે પરીક્ષામાં ગેરરીતિ આચરવામાં દોષી સાબિત થશે, તો તેને ૧૦ વર્ષ સુધીની કડક જેલની સજા અને ₹૫૦ લાખ સુધીના ભારે દંડની જોગવાઈ કરવામાં આવી છે.

નોંધનીય છે કે અગાઉ NEET જેવી મહત્ત્વની પરીક્ષાઓના પ્રશ્નપત્ર લીકની ઘટનાઓ બાદ “જાહેર પરીક્ષાઓ (અન્યાયી માધ્યમો નિવારણ) અધિનિયમ, ૨૦૨૪” રજૂ કરવામાં આવ્યો હતો, જેમાં હવે ૨૦૨૬ ના નવા સુધારા ઉમેરીને વધુ કડક કાયદાકીય કવચ તૈયાર કરવામાં આવ્યું છે.