અમેરિકી ઇતિહાસની સૌથી મોટી કાર્યવાહી, શરણ માગનાર ૨ લાખ વિદેશીઓના વિઝા રદ થઈ શકે છે
અમેરિકામાં ડોનાલ્ડ ટ્રમ્પ વહીવટીતંત્રે ફરી એકવાર ઇમિગ્રેશન નીતિઓ કડક બનાવવાનું શરૂ કર્યું છે. તાજેતરના અહેવાલો અનુસાર, વહીવટીતંત્ર આશરે 200,000 વિદેશી નાગરિકોના બિઝનેસ (B1) અને ટુરિઝમ (B2) વિઝા રદ કરવાની તૈયારી કરી રહ્યું છે જેમણે અમેરિકામાં પ્રવેશ્યા પછી આશ્રય માટે અરજી કરી હતી અથવા હાલમાં તે શોધી રહ્યા છે.
જો આ યોજના સંપૂર્ણપણે લાગુ થઈ જાય છે, તો અમેરિકી ઇતિહાસમાં એક જ ઝાટકે મોટા પાયે વિઝા રદ કરવાની આ સૌથી મોટી ઘટના બનશે. સમાચાર એજન્સી એસોસિએટેડ પ્રેસ (AP)ના અહેવાલ અને વિદેશ વિભાગના દસ્તાવેજોના હવાલેથી આ માહિતી સામે આવી છે.
કોને નિશાન બનાવવામાં આવશે?
અમેરિકી વિદેશ વિભાગ અને હોમલેન્ડ સિક્યોરિટી વિભાગ (DHS)ની આ સંયુક્ત યોજના હેઠળ મુખ્યત્વે એવા લોકોને ટાર્ગેટ કરવામાં આવશે, જેને 2016 થી 2026 વચ્ચે B1 અને B2 વિઝા જારી કરવામાં આવ્યા હતા.
વિદેશ વિભાગના પ્રવક્તા ટોમી પિગોટે આ વાતની પુષ્ટિ કરતા જણાવ્યું કે ઘણા લોકો અમેરિકામાં શોર્ટ-ટર્મ વિઝિટર (ટૂંકા ગાળાના મુલાકાતી) બનીને આવે છે અને બાદમાં અહીં કાયમ માટે વસવાટ કરવા માટે આશ્રય માટે અરજી કરી દે છે. આ જ કાનૂની છટકબારીને બંધ કરવા માટે આ પગલું ભરવામાં આવી રહ્યું છે.
શું લોકોને તરત જ દેશમાંથી બહાર કાઢી મૂકવામાં આવશે?
શું લોકોને તરત જ દેશમાંથી બહાર કાઢી મૂકવામાં આવશે?અધિકારીઓએ સ્પષ્ટ કર્યું છે કે વિઝા રદ થવાનો અર્થ એ નથી કે સંબંધિત લોકોને તરત જ દેશની બહાર (ડિપોર્ટ) કરી દેવામાં આવશે. જે લોકોના આશ્રય સાથે જોડાયેલા કેસો હજુ પેન્ડિંગ (વિચારણા હેઠળ) છે, તેમને ફરીથી રીકેટેગરાઇઝ (ફરીથી વર્ગીકૃત) કરવામાં આવશે, પરંતુ તેઓ પોતાના બિઝનેસ કે ટૂરિઝમ ટ્રાવેલરનો દરજ્જો કાયમ માટે ગુમાવી દેશે.
વહીવટીતંત્રનું કડક વલણ
અમેરિકી અધિકારીઓનું માનવું છે કે દેશની શરણાર્થી પ્રણાલીનો ખોટો ઉપયોગ કરવામાં આવી રહ્યો છે. અમેરિકી નાયબ વિદેશ મંત્રી ક્રિસ્ટોફર લાંડાઉએ સોશિયલ મીડિયા પ્લેટફોર્મ ‘એક્સ’ પર પોસ્ટ કરતા લખ્યું કે દુનિયાભરના લોકો બનાવટી આશ્રયના દાવાઓથી કંટાળી ગયા છે અને આશ્રય કાયદાનો ઉપયોગ ઇમિગ્રેશન નિયમોથી બચવા માટેના રસ્તા તરીકે ન થવો જોઈએ.
નિષ્ણાતો માને છે કે એકવાર આ યોજના સત્તાવાર રીતે લાગુ થઈ જાય, પછી તેને કોર્ટના પડકારો અથવા કાનૂની વિરોધનો સામનો કરવો પડી શકે છે; જોકે, ટ્રમ્પ વહીવટીતંત્રના કડક વલણથી સ્પષ્ટ થાય છે કે આગામી દિવસોમાં અમેરિકામાં ઇમિગ્રન્ટ્સ માટે મુશ્કેલીઓ વધવાની છે.
