ટીમ ઈન્ડિયા એશિયા કપ માટે દુબઈ પહોંચી: પાકિસ્તાનને હરાવીને ટાઇટલ ફરી કબજે કરવા પર હરમનપ્રીત સેનાની નજર
એશિયન ક્રિકેટ કાઉન્સિલ (ACC) મહિલા એશિયા કપ ૨૦૨૬ માટે ભારતીય મહિલા ક્રિકેટ ટીમ દુબઈ, યુએઈ (UAE) ખાતે પહોંચી ગઈ છે. હરમનપ્રીત કૌરની આગેવાની હેઠળની ભારતીય ટીમ ૨૮ ઓગસ્ટથી શરૂ થઈ રહેલી આ મહત્વપૂર્ણ ટુર્નામેન્ટમાં પોતાના એશિયન તાજને ફરીથી મેળવવાના મક્કમ ઈરાદા સાથે મેદાનમાં ઉતરશે.
ભારતીય ક્રિકેટ કંટ્રોલ બોર્ડ (BCCI) એ સોશિયલ મીડિયા પર ખેલાડીઓના દુબઈ આગમનનો એક વીડિયો શેર કરીને આ માહિતી આપી હતી. આ વખતે ટુર્નામેન્ટમાં આઠ ટીમો ભાગ લઈ રહી છે અને તમામ ૧૫ T20 મેચો પહેલીવાર દુબઈમાં આયોજિત થઈ રહી છે.
જૂના પરાજયનો બદલો લેવાનો આકરો પડકાર
ભારતીય મહિલા ટીમ એશિયા કપના ઇતિહાસમાં સૌથી સફળ ટીમ રહી છે. અત્યાર સુધી યોજાયેલી મહિલા T20 એશિયા કપની પાંચ આવૃત્તિઓમાંથી ભારતે ત્રણ વખત ટાઇટલ જીત્યું છે. જોકે, ૨૦૨૪ માં શ્રીલંકામાં યોજાયેલી છેલ્લી આવૃત્તિમાં યજમાન શ્રીલંકા સામે ફાઇનલમાં હાર વેઠવી પડી હતી.આ વખતે હરમનપ્રીત કૌર અને વાઇસ-કેપ્ટન સ્મૃતિ મંધાનાની જોડી ભૂતકાળની હાર ભૂલીને ટાઇટલ પાછું મેળવવા માટે શ્રેષ્ઠ પ્રદર્શન કરવા આતુર છે.
ભારતનો પ્રથમ મુકાબલો થાઇલેન્ડ સામે: પાકિસ્તાન સામેની હાઇ-વોલ્ટેજ મેચ ૫ સપ્ટેમ્બરે
ટુર્નામેન્ટમાં ભાગ લઈ રહેલી આઠ ટીમોને બે ગ્રુપમાં વહેંચવામાં આવી છે. ભારતને ગ્રુપ A માં પાકિસ્તાન, થાઇલેન્ડ અને હોંગકોંગ સાથે મૂકવામાં આવ્યું છે. જ્યારે ગ્રુપ B માં ડિફેન્ડિંગ ચેમ્પિયન શ્રીલંકા, બાંગ્લાદેશ, ઇન્ડોનેશિયા અને યુએઈ સમાવિષ્ટ છે.
ભારતીય ટીમનું મેચ શિડ્યુલ નીચે મુજબ છે:
૩૦ ઓગસ્ટ: ભારત વિરુદ્ધ થાઇલેન્ડ (પ્રથમ ગ્રુપ મેચ)
૩ સપ્ટેમ્બર: ભારત વિરુદ્ધ હોંગકોંગ (બીજી ગ્રુપ મેચ)
૫ સપ્ટેમ્બર: ભારત વિરુદ્ધ પાકિસ્તાન (હાઇ-વોલ્ટેજ મેચ)
દરેક ગ્રુપમાંથી ટોચની બે ટીમો સેમિફાઇનલમાં પ્રવેશ કરશે. સેમિફાઇનલ મુકાબલા ૧૦ અને ૧૧ સપ્ટેમ્બરે રમાશે, જ્યારે ટુર્નામેન્ટની ગ્રાન્ડ ફાઇનલ ૧૩ સપ્ટેમ્બરે યોજાશે.
Hello Dubai! 👋#TeamIndia have arrived for the ACC Women’s Asia Cup 2026 😎#ACC | #WomensAsiaCup2026 pic.twitter.com/90w7VRAFk6
— BCCI Women (@BCCIWomen) August 27, 2026
મહિલા એશિયા કપ ૨૦૨૬ માટે ભારતીય સ્ક્વોડ
હરમનપ્રીત કૌર (કેપ્ટન), સ્મૃતિ મંધાના (વાઇસ-કેપ્ટન), શેફાલી વર્મા, ભારતી ફુલમાલી, દીપ્તિ શર્મા, રિચા ઘોષ (વિકેટકીપર), જી. કમલિની (વિકેટકીપર), અરુંધતી રેડ્ડી, પ્રેમા રાવત, રાધા યાદવ, શ્રી ચારણી, રેણુકા ઠાકુર, નંદિની શર્મા, ક્રાંતિ ગૌડ અને પ્રતિકા રાવલ.
