2029 માં વિજય PM કેન્ડિડેડ? કોંગ્રેસ સાથેના મતભેદો વચ્ચે TVK નો માસ્ટરસ્ટ્રોક, રાજકારણમાં ગરમાવો
તમિલનાડુના રાજકારણમાં અચાનક મોટો ઉલટફેર જોવા મળી રહ્યો છે. દક્ષિણ ભારતના લોકપ્રિય સુપરસ્ટાર અને ‘તમિલગા વેટ્રી કઝગમ’ (TVK) ના વડા સી. જોસેફ વિજય (વિજય) ને વર્ષ 2029 ની લોકસભા ચૂંટણીમાં દેશના આગામી વડાપ્રધાન (PM) ઉમેદવાર તરીકે પ્રોજેક્ટ કરવાની માંગણીએ જોર પકડ્યું છે. આ મુદ્દાને લઈને TVK અને તેની સાથી પક્ષ કોંગ્રેસ વચ્ચે તણાવ અને રાજકીય વિવાદ ચરમસીમાએ પહોંચી ગયો છે.
શુક્રવારે તમિલનાડુ સરકારના મંત્રી કે.એ. સેંગોટ્ટૈયને TVK ના આ વલણનું સમર્થન કરતાં સ્પષ્ટ કર્યું હતું કે પક્ષ પોતાના નિર્ણય પર અડગ છે. આ નિવેદન બાદ દક્ષિણ ભારતથી લઈને દિલ્હીના રાજકીય ગલિયારામાં ભારે ચર્ચા જાગી છે.
તમિલનાડુના મંત્રીનું નિવેદન અને સ્પષ્ટતા
જ્યારે પત્રકારોએ કે.એ. સેંગોટ્ટૈયનને વિજયને વડાપ્રધાન પદના ઉમેદવાર બનાવવા અંગે પ્રશ્ન પૂછ્યો, ત્યારે તેમણે ભારપૂર્વક જણાવ્યું કે, “જ્યાં સુધી અમારી વાત છે, અમારા નેતા અને પાર્ટીનું વલણ ખૂબ જ સ્પષ્ટ છે. તમિલનાડુની જનતાએ વિજય પર પૂર્ણ વિશ્વાસ મૂકીને તેમને મત આપ્યા છે.”
તેમણે વધુમાં ઉમેર્યું હતું કે TVK એ પોતાની સ્થાપનાના માત્ર બે જ વર્ષના ટૂંકા ગાળામાં અને વિધાનસભા ચૂંટણીના બે મહિના પહેલાં નવું ચૂંટણી પ્રતીક મળવા છતાં અસાધારણ જીત હાંસલ કરી છે. મુખ્યમંત્રી રાજ્યના લોકોની સુરક્ષા અને જનકલ્યાણકારી યોજનાઓ અમલમાં મૂકવા માટે તમામ જરૂરી પગલાં લઈ રહ્યા છે.
પોસ્ટર વોર અને કનિમોઝી સંતોષનું મોટું નિવેદન
આ વિવાદની શરૂઆત ત્યારે થઈ જ્યારે થૂથુકુડી (ટુટીકોરિન) ના પોર્ટ-ઇન્ડસ્ટ્રિયલ વિસ્તારમાં અચાનક વિજયના મોટા મોટા પોસ્ટરો જોવા મળ્યા, જેના પર “કાલના PM” લખેલું હતું. આ પોસ્ટરો તાજેતરમાં AIADMK છોડીને TVK માં જોડાયેલા કાર્યકર્તા સુધાકર દ્વારા લગાવવામાં આવ્યા હતા.
ત્યારબાદ TVK ના ધારાસભ્ય કનિમોઝી સંતોષે એક સનસનાટીભર્યું નિવેદન આપતાં કહ્યું કે, “2029 માં ભારતીય રાજકારણમાં એક મોટો અને આશ્ચર્યજનક ફેરફાર જોવા મળશે. કોંગ્રેસ નેતા રાહુલ ગાંધીએ જ થલપતિ વિજયને તમિલનાડુના મુખ્યમંત્રી બનાવવામાં મદદ કરી હતી. હવે તેઓ જ વિજયનો હાથ પકડીને 2029 માં તેમને વડાપ્રધાનની ખુરશી પર બેસાડશે.”
TVK ના જાહેર બાંધકામ મંત્રી (PWD Minister) આધવ અર્જુને પણ આ વાતને ટેકો આપતાં કહ્યું કે દેશના સૌથી મોટા બંધારણીય પદ પર તમિલનાડુના કોઈ નેતા વિરાજમાન થાય તે સમયની માંગ છે.
કોંગ્રેસનો ભારે આક્રોશ અને કેબિનેટમાંથી રાજીનામાની ધમકી
TVK નેતાઓ દ્વારા વિજયને PM કેન્ડિડેડ ગણાવતાં જ ગઠબંધન ભાગીદાર કોંગ્રેસમાં ભારે નારાજગી ફેલાઈ ગઈ છે. તમિલનાડુમાં TVK ના નેતૃત્વ વાળી સરકારમાં કોંગ્રેસ પણ સામેલ છે.
સરકારનું માળખું: આ ગઠબંધન સરકારમાં TVK ના 107 MLA, કોંગ્રેસના 5 MLA, ઈન્ડિયન યુનિયન મુસ્લિમ લીગ (IUML) ના 2 MLA અને VCK/ડાબેરી ગઠબંધનના 2 MLA સામેલ છે.
મંત્રીઓની ધમકી: તમિલનાડુના પર્યટન મંત્રી અને કોંગ્રેસ નેતા એસ. રાજેશ કુમારે જાહેરાત કરી છે કે જો TVK 2029 ની સામાન્ય ચૂંટણીમાં રાહુલ ગાંધીને વડાપ્રધાન પદના ઉમેદવાર તરીકે સ્વીકારશે નહીં, તો કોંગ્રેસના બંને મંત્રીઓ તાત્કાલિક ધોરણે કેબિનેટમાંથી રાજીનામું આપી દેશે.
બીજી તરફ, તમિલનાડુ કોંગ્રેસના અધ્યક્ષ બી. મણિકમ ટાગોરે TVK નેતાઓ પર કટાક્ષ કરતાં કહ્યું હતું કે કેટલાક TVK નેતાઓ હજુ પણ જવાબદાર નેતા બનવાની જગ્યાએ ‘ફેન-ક્લબ મોડ’ માં કામ કરી રહ્યા છે.
2029 ની રાજનીતિ પર આ વિવાદની અસર
તમિલનાડુમાં બનેલી આ ઘટના માત્ર રાજ્ય પૂરતી સીમિત નથી પરંતુ રાષ્ટ્રીય સ્તરે વિપક્ષી એકતા અને ગઠબંધનની રાજનીતિ પર મોટી અસર પાડી શકે છે. દક્ષિણ ભારતમાં વિજયની લોકપ્રિયતા અને તેમની ફેન ફોલોઈંગ ખૂબ મોટી છે. પરંતુ કોંગ્રેસ રાહુલ ગાંધી સિવાય અન્ય કોઈ ચહેરાને પીએમ પદ માટે સ્વીકારવા તૈયાર નથી.
હવે જોવાનું એ રહેશે કે આગામી દિવસોમાં TVK અને કોંગ્રેસ પોતાના મતભેદો ઉકેલીને ગઠબંધન જાળવી રાખે છે કે પછી 2029 ની લોકસભા ચૂંટણી પહેલાં તમિલનાડુના રાજકારણમાં કોઈ નવો મોટો ધડાકો થાય છે.
