SIP દ્વારા રોકાણનો નવો રેકોર્ડ: ચાલુ નાણાકીય વર્ષના પ્રથમ ૫ મહિનામાં જ રોકાણ ₹૧.૫૮ લાખ કરોડને વટાવી ગયું
ભારતીય શેરબજારમાં ચાલી રહેલી ભારે ઉથલપાથલ અને અનિશ્ચિતતા વચ્ચે પણ સ્થાનિક છૂટક રોકાણકારોનો મ્યુચ્યુઅલ ફંડ પરનો વિશ્વાસ વધુ મજબૂત બન્યો છે. એસોસિએશન ઓફ મ્યુચ્યુઅલ ફંડ્સ ઇન ઇન્ડિયા (AMFI) દ્વારા ઓગસ્ટ ૨૦૨૬ના જાહેર કરાયેલા તાજેતરના આંકડા મુજબ, દેશમાં માસિક સિસ્ટમેટિક ઇન્વેસ્ટમેન્ટ પ્લાન (SIP) મારફતે થતું રોકાણ ₹૩૨,૨૯૭ કરોડની ઐતિહાસિક સપાટીએ પહોંચી ગયું છે. આ સાથે મ્યુચ્યુઅલ ફંડ ઉદ્યોગનું એકંદર એસેટ અંડર મેનેજમેન્ટ (AUM) ₹૮૭.૦૮ લાખ કરોડના નવા શિખરે પહોંચી ગયું છે.
બજારના ઘટાડામાં રોકાણની શ્રેષ્ઠ તક
સામાન્ય રીતે જ્યારે શેરબજારમાં કટોકટી કે ઘટાડાનો તબક્કો આવે છે ત્યારે રોકાણકારો પોતાના નાણાં પાછા ખેંચતા હોય છે અથવા નવું રોકાણ અટકાવી દેતા હોય છે. પરંતુ ઓગસ્ટ મહિનામાં આ ટ્રેન્ડ તદ્દન ઊલટો જોવા મળ્યો છે. ફંડામેન્ટલ એનાલિસ્ટ્સના મતે, ભારતીય રોકાણકારો હવે વધુ પરિપક્વ બન્યા છે અને તેમણે બજારના ઘટાડાનો ઉપયોગ ગભરાવાને બદલે નીચા ભાવે વધુ રોકાણ કરવાની તક તરીકે કર્યો છે.
ઓગસ્ટ મહિના દરમિયાન તમામ મ્યુચ્યુઅલ ફંડ સ્કીમ્સમાં કુલ ₹૧૪.૦૯ લાખ કરોડનું રોકાણ આવ્યું હતું, જેની સામે ₹૧૩.૬૮ લાખ કરોડનો ઉપાડ થયો હતો. આમ, ઓગસ્ટમાં શુદ્ધ એટલે કે નેટ ઇનફ્લો ₹૪૧,૩૫૩.૬૦ કરોડ નોંધાયો હતો.
સ્મોલ અને મિડકેપમાં ભારે આકર્ષણ, લાર્જકેપમાંથી ઉપાડ
કેટેગરી વાઈઝ રોકાણની વાત કરીએ તો રોકાણકારોનો સૌથી વધુ ઝુકાવ સ્મોલકેપ અને મિડકેપ ફંડ્સ તરફ રહ્યો છે. ઓગસ્ટમાં સ્મોલકેપ ફંડ્સમાં સૌથી વધુ ₹૭,૯૭૩.૩૩ કરોડનો નેટ ઇનફ્લો રહ્યો હતો. જ્યારે મિડકેપ ફંડ્સમાં ₹૬,૯૮૯.૪૦ કરોડ, ફ્લેક્સી કેપમાં ₹૫,૦૫૯.૪૨ કરોડ, લાર્જ એન્ડ મિડકેપમાં ₹૩,૮૭૨.૭૯ કરોડ અને મલ્ટિકેપ ફંડ્સમાં ₹૩,૭૩૨.૭૭ કરોડનું નવું રોકાણ આવ્યું હતું.
બીજી તરફ, મોટા જોખમ વગરના ગણાતા લાર્જકેપ ફંડ્સમાંથી રોકાણકારોએ ₹૧,૧૪૭.૩૬ કરોડ પાછા ખેંચ્યા હતા. આ ઉપરાંત ELSS (ટેક્સ સેવિંગ) સ્કીમ્સમાંથી ₹૧,૦૭૮.૩૨ કરોડ, ડિવિડન્ડ યીલ્ડ ફંડ્સમાંથી ₹૧૩૩.૫૭ કરોડ અને સેક્ટોરલ ફંડ્સમાંથી ₹૫૩.૧૯ કરોડનો આઉટફ્લો જોવા મળ્યો હતો. ઓપન એન્ડેડ ઇક્વિટી સ્કીમ્સમાં કુલ ₹૭૩,૬૧૪.૦૭ કરોડનું રોકાણ કરાયું હતું અને ₹૪૪,૨૮૫.૪૫ કરોડ ઉપાડવામાં આવતા નેટ ઇક્વિટી ઇનફ્લો ₹૨૯,૩૨૮.૬૨ કરોડ રહ્યો હતો.
SIP રોકાણનો નવો સૂર્યોદય
ભારતમાં મધ્યમ વર્ગ અને પગારદાર વર્ગમાં SIP નો ક્રેઝ સતત વધી રહ્યો છે. ઓગસ્ટ ૨૦૨૬માં SIP દ્વારા આવેલી ₹૩૨,૨૯૭ કરોડની રકમ જુલાઈ ૨૦૨૬ના ₹૩૧,૯૬૧ કરોડ કરતાં વધુ છે. ગયા વર્ષના સમાન ગાળા એટલે કે ઓગસ્ટ ૨૦૨૫ના ₹૨૮,૨૬૫ કરોડની સરખામણીએ આમાં આશરે ૧૪ ટકાનો નોંધપાત્ર વધારો થયો છે. ચાલુ નાણાકીય વર્ષના પ્રથમ પાંચ મહિનામાં જ SIP મારફતે કુલ રોકાણ ₹૧.૫૮ લાખ કરોડથી આગળ નીકળી ગયું છે, જે મ્યુચ્યુઅલ ફંડ ઉદ્યોગ માટે ખૂબ જ પ્રોત્સાહક બાબત છે. હાલ સમગ્ર ઇન્ડસ્ટ્રીમાં કુલ ફોલિયોની સંખ્યા ૨૮.૩૫ કરોડને આંબી ગઈ છે.
ETF, ઇન્ડેક્સ ફંડ્સ અને NFO ની સ્થિતિ
ઓગસ્ટ દરમિયાન એક્સચેન્જ ટ્રેડેડ ફંડ્સ (ETF) માં પણ સારું રોકાણ જોવા મળ્યું હતું. ETF કેટેગરીમાં ₹૧૦,૧૬૦.૮૭ કરોડનો નેટ ઇનફ્લો થયો હતો. જેમાં સુરક્ષિત રોકાણ તરફ વળેલા લોકોએ ગોલ્ડ ETFમાં ₹૨,૫૯૬.૭૦ કરોડ અને સિલ્વર ETFમાં ₹૧,૨૭૦.૬૩ કરોડ ઠાલવ્યા હતા, જ્યારે ઇક્વિટી ETFમાં ₹૭,૨૩૭.૪૯ કરોડ આવ્યા હતા.
નવા ફંડ ઓફર (NFO) ની વાત કરીએ તો, ઓગસ્ટમાં લોન્ચ થયેલી ૨૬ નવી મ્યુચ્યુઅલ ફંડ સ્કીમ્સે બજારમાંથી કુલ ₹૭,૧૧૦ કરોડ એકત્ર કર્યા હતા. જેમાં SBI બેલેન્સ્ડ હાઇબ્રિડ ફંડે ₹૧,૮૧૮ કરોડ અને બંધન કોન્ટ્રા ફંડે ₹૧,૭૧૧ કરોડનું ભંડોળ મેળવવામાં સફળતા મેળવી હતી. આ આંકડા દર્શાવે છે કે ભારતીય અર્થતંત્ર અને લાંબા ગાળાના ઇક્વિટી રોકાણ પર રોકાણકારોનો વિશ્વાસ અતિ મજબૂત સ્થિતિમાં છે.
