દાયકાભર નાની મહિલા વનકર્મી સાથેના સંબંધે કેવી રીતે આખા પરિવારનો ભોગ લીધો
ભાવનગર શહેરને હચમચાવી મૂકે તેવા ત્રિપલ હત્યા કેસમાં સતત નવા તથ્યો સામે આવી રહ્યા છે. પોતાની પત્ની, પુત્ર અને પુત્રીની હત્યા કરનાર આરોપી ACF શૈલેષ ખાંભલાએ શરૂઆતમાં પ્રેમ સંબંધને કારણે ગુનો કર્યો હોવાની કબૂલાત કરી હતી. તપાસ આગળ વધતાં જાણવા મળ્યું કે તેનાથી દાયકાભર નાની મહિલા વનકર્મી સાથે તેના લાંબા સમયથી સંબંધ હતા. હવે પોલીસે આ મહિલા મિત્રની પણ પૂછપરછ શરૂ કરી હોવાથી સમગ્ર કેસમાં નવા પાસાઓ ખુલ્યા છે.
દસ દિવસની શોધખોળ બાદ ત્રણેય મૃતદેહ મળી આવ્યા
શરૂઆતમાં પોલીસ તંત્ર શૈલેષની પત્ની અને બે સંતાનોને ગુમસુદા માનીને તેમની શોધખોળ કરી રહ્યું હતું. લગભગ દસ દિવસ બાદ ફોરેસ્ટ કોલોનીની નજીક આવેલી એક અવાવરૂ જગ્યા પરથી દુર્ગંધ આવતાં પોલીસને શંકા ગયેલી. ડોગસ્કવોડની મદદથી સ્થળ તપાસ કરતાં માટી ખોદતાં એક પછી એક ત્રણ મૃતદેહ મળ્યા હતા. તપાસમાં મૃતકોની ઓળખ ACF શૈલેષ ખાંભલાની પત્ની નયના રબારી, પુત્ર ભવ્ય અને પુત્રી પૃથા તરીકે થઈ હતી.
શૈલેષે પરિવારને મારી દાટી નાખ્યો હોવાનું બહાર આવ્યું
તપાસ દરમિયાન શૈલેષે પોલીસને ભ્રમિત કરવાનો પ્રયાસ કરતા ખાડામાં નીલગાય પડી ગઈ હોવાનું જણાવ્યું હતું. જોકે તપાસમાં જાણવા મળ્યું કે તેણે ત્રણેયની હત્યા કર્યા બાદ જ સાત મજૂર અને ત્રણ વનકર્મીના સહકારથી JCBથી ખાડો ખોદાવી મૃતદેહોને દાટી દીધા હતા. ત્યારબાદ ગુમસુદા હોવાની ફરિયાદ નોંધાવી તે દસ દિવસ સુધી અજાણ્યાનો ઢોંગ કરતો રહ્યો હતો. સમગ્ર ઘટનામાં પ્રેમ સંબંધ મુખ્ય કારણ હોવાનું પોલીસ સમક્ષ બહાર આવ્યું છે.
હત્યા કેવી રીતે કરી તેના ચોંકાવનારા તથ્યો
એસપી દ્વારા આપવામાં આવેલી વિગતો મુજબ, પાંચ નવેમ્બરના રોજ શૈલેષે પહેલાં પત્નીનું મોં દબાવી તેને મોતને ઘાટ ઉતારી હતી. પછી દીકરા અને દીકરીને તે જ રીતે મારી નાખ્યા હતા. લાશો પાણીમાં તરતી ન જાય તે માટે પથ્થર બાંધીને તેમને ખાડામાં દાટી દેવાયા હતા. ઉપર ગાદલું અને મોરમ નાખીને ખાડો છુપાવવાનો પણ પ્રયાસ કર્યો હતો. તપાસમાં તે જુનાગઢમાં કાર્યરત મહિલા વનકર્મી સાથે ચાર વર્ષથી સંબંધ ધરાવતો હોવાનું સામે આવ્યું છે.
ભાવનગરમાં રોષ, કોર્ટ બહાર ફાંસીની માંગ
આ ક્રૂર હત્યાકાંડ સામે લોકોમાં ભારે રોષ ફેલાયો છે. કોર્ટ બહાર ‘ફાંસી આપો’ના નારા લગાડાયા હતા. સુરતમાં પણ આ ઘટનાને લઈને રેલી નીકળી હતી. શૈલેષના પિતાએ પણ પોતાના દીકરાને કડક સજા આપવાની માંગ કરી છે. હાલમાં રિમાન્ડ પર રહેલા શૈલેષને મળવા કોઈ પરિવારજનો પણ આગળ ન આવતા તેમની સ્થિતિ વધુ પ્રશ્નાર્થભરેલી બની છે.
ખાડો ખોદાવામાં મદદ કરનારાઓની પૂછપરછ શરૂ
શૈલેષની કબૂલાત અનુસાર ખાડો ખોદાવવા માટે તેણે ત્રણ વનકર્મી અને સાત મજૂરોની મદદ લીધી હતી. તપાસ ટીમ હવે આ તમામના નિવેદનો લઈ રહી છે. ત્રણેય મૃતદેહ મળેલા સ્થળ અંગે પણ વિશેષ તપાસ ચાલી રહી છે. આવતા દિવસોમાં વધુ ચોંકાવનારા ખુલાસા થવાની શક્યતા વ્યક્ત કરવામાં આવી છે.
