વર્ગ-૩ અને વર્ગ-૪ના કર્મચારીઓને હવે વધારાની કામગીરી માટે મળશે વધુ વળતર
ગુજરાતમાં ફિક્સ પગાર પર કાર્યરત વર્ગ-૩ અને વર્ગ-૪ ના હજારો કર્મચારીઓ માટે રાજ્ય સરકારે મહત્વપૂર્ણ સુધારો કર્યો છે. હવે આ કર્મચારીઓને જ્યારે વધારાની કામગીરી સોંપવામાં આવે, ત્યારે તેમને વધુ ચાર્જ એલાઉન્સ મળશે. સરકારના નવા નિર્ણય મુજબ, વધારાના હવાલા અનુસાર 5 થી 10 ટકા સુધીનું વધારાનું મહેનતાણું આપવામાં આવશે, જેના કારણે કર્મચારીઓને વધતી જવાબદારીઓ માટે યોગ્ય વળતર મળી શકશે.
જૂના ઠરાવમાં સુધારો કરીને નવી ગણતરી અમલમાં
નાણા વિભાગે જાહેર કરેલા તાજેતરના પરિપત્રમાં જણાવાયું છે કે 2006થી અમલમાં રહેલી ફિક્સ પગાર નીતિમાં દર્શાવેલ જોગવાઈઓમાં હવે ફેરફાર કરવામાં આવ્યો છે. અગાઉ ચાર્જ એલાઉન્સની ગણતરી 2015ના ઠરાવ મુજબના જૂના ફિક્સ પગાર પર થતી હતી, જ્યારે વચ્ચે પગારમાં સુધારો થયા પછી પણ એલાઉન્સની રકમમાં કોઈ પરિવર્તન કરવામાં આવ્યો ન હતો. નવા પરિપત્રમાં આ અસંગતતા દૂર કરી, વર્તમાન મહેનતાણાને આધારે ચાર્જ એલાઉન્સ નક્કી કરવાનો નિર્ણય લેવામાં આવ્યો છે.
વધારાની કામગીરી માટે ત્વરિત અસરથી સુધારેલો લાભ
સરકારે સ્પષ્ટ કર્યું છે કે જ્યારે ફિક્સ પગારના વર્ગ-૩ અથવા વર્ગ-૪ કર્મચારીને સમાન અથવા વધુ જવાબદારીવાળી જગ્યાનો હવાલો સોંપવામાં આવશે, ત્યારે તેને ચાલતા મહેનતાણામાંથી 5 ટકા અથવા 10 ટકા જેટલું વધારાનું એલાઉન્સ મળશે. આ સુધારો કર્મચારીઓમાં કાર્યપ્રત્યે ઉત્સાહ જાળવાઈ રહે તે હેતુથી કરવામાં આવ્યો છે અને નવો નિયમ પરિપત્ર પ્રકાશિત થયેલી તારીખથી જ અમલમાં આવશે.
