વડગામથી હિંમતનગર સુધી વિરોધની લહેર, મેવાણીના શબ્દો સામે પોલીસ પરિવારનો ઉગ્ર વિરોધ
વડગામના ધારાસભ્ય જિજ્ઞેશ મેવાણી દ્વારા પોલીસ અંગે કરાયેલા કથિત અપમાનજનક નિવેદનને લઈને ઉત્તર ગુજરાતમાં પોલીસ પરિવારોમાં ભારે રોષ જોવા મળી રહ્યો છે. મેવાણીએ થોડા દિવસ પહેલાં પોલીસની યુનિફોર્મ અને પટ્ટા અંગે કરેલી ટિપ્પણી બાદ વાવ, થરાદ અને બનાસકાંઠા જિલ્લાઓમાં વિરોધના સ્વરો તેજ થયા છે. હિંમતનગરમાં આજે કોંગ્રેસની જન આક્રોશ યાત્રા પહોંચતાં જ પોલીસ પરિવારની મહિલાઓએ રેલી રોકી વિરોધ નોંધાવ્યો હતો. પ્લે કાર્ડ અને સૂત્રોચ્ચાર સાથે મહિલાઓએ આક્ષેપ કર્યો કે મેવાણીના શબ્દો પોલીસનું અપમાન છે.
હિંમતનગરમાં મહિલાઓએ રોકી કોંગ્રેસની યાત્રા
કોંગ્રેસની જન આક્રોશ યાત્રા હિંમતનગર પહોંચતાં જ પોલીસ પરિવારોની મહિલાઓએ રસ્તો અટકાવી વિરોધ પ્રદર્શિત કર્યો હતો. વિરોધ દરમિયાન મહિલાઓએ અમિત ચાવડાને રજૂઆત કરી અને મેવાણીના નિવેદનથી તેઓ દુભાવાઈ હોવાની વાત કરી હતી. મહિલાઓએ આક્ષેપ કર્યો કે રેલી દરમિયાન કોંગ્રેસ કાર્યકર્તાઓએ તેમની સાથે ધક્કામુક્કી પણ કરી હતી. તેમની માંગ હતી કે પોલીસના પડકારરૂપ ફરજોને અવગણતા અને પરિવારથી દૂર રહેતા અધિકારીઓની મહેનતનું અપમાન કોઈ પણ રીતે સ્વીકાર્ય નથી.
કોંગ્રેસના નેતાઓના આક્ષેપો અને મેવાણી વિવાદ
વિગતવાર વાત કરતાં કોંગ્રેસ નેતા અમિત ચાવડાએ પણ ગંભીર આક્ષેપો લગાવ્યા હતા. તેમણે જણાવ્યું કે ગુજરાતમાં દારૂ, જુગાર અને ડ્રગ્સના અડ્ડાઓ ખુલ્લેઆમ ચાલે છે અને હપ્તા લેવાય છે. તેમના કહેવા પ્રમાણે પોલીસ પરિવાર નહીં પરંતુ રાજકીય દબાણ હેઠળ લોકો વિરોધના બેનરો લગાવી રહ્યા છે. બીજી તરફ થરાદ પોલીસે સ્પષ્ટ કર્યું કે મેવાણીએ ટોળામાં ઉભા રહી અશોભનીય ભાષાનો ઉપયોગ કર્યો હતો, જે પોલીસની છબીને નુકસાન પહોંચાડે એવો છે.
પોલીસ પરિવારની પીડા: ફરજ, દબાણ અને અપમાન
વિરોધ કરતી મહિલાઓએ જણાવ્યું કે તેમના પતિઓ તહેવારોમાં પણ પરિવાર સાથે રહી શકતા નથી અને સતત ફરજમાં જ જોડાયેલા રહે છે. પરિવારના સભ્યો બીમાર હોય ત્યારે પણ જિલ્લા અને રાજ્યની સુરક્ષા તેમની પ્રથમ જવાબદારી બને છે. તેઓનું કહેવું છે કે આવી કઠોર ફરજ બજાવતા કર્મચારીઓ અંગે અપમાનજનક ભાષા વાપરવી અત્યંત દુખદ અને અસ્વીકાર્ય છે. મહિલાઓએ પ્રશ્ન કર્યો કે જ્યારે પોલીસ રેલીની સુરક્ષા માટે જ ઉભી છે, ત્યારે તેમના જ વિરુદ્ધ આવા શબ્દો કેમ બોલવામાં આવ્યા?
