‘થર્ડ વર્લ્ડ દેશોના લોકોને USમાં એન્ટ્રી નહીં આપું…’, ગોળીબારની ઘટના બાદ ગુસ્સે ભરાયેલા ટ્રમ્પે લીધું વધુ એક મોટું પગલું
અમેરિકાના રાષ્ટ્રપતિ ડોનાલ્ડ ટ્રમ્પે વોશિંગ્ટન ડીસીમાં થયેલા ગોળીબાર બાદ મોટી કાર્યવાહી કરી છે. તેમણે કહ્યું છે કે પ્રશાસન ‘થર્ડ વર્લ્ડ’ (ત્રીજા વિશ્વ)ના દેશોના માઈગ્રેશન (સ્થળાંતર)ને સંપૂર્ણપણે રોકવા પર કામ કરશે.
અમેરિકાના વોશિંગ્ટન ડીસીમાં થયેલા ગોળીબાર બાદ રાષ્ટ્રપતિ ડોનાલ્ડ ટ્રમ્પ એક્શનમાં છે. તેમણે શુક્રવારે (28 નવેમ્બર) એક મોટો નિર્ણય લીધો. ટ્રમ્પે સોશિયલ મીડિયા પર એક પોસ્ટ શેર કરતા જણાવ્યું કે તેમનું પ્રશાસન ‘ત્રીજા વિશ્વ’માંથી થતા સ્થળાંતરને કાયમી ધોરણે રોકવા માટે કામ કરશે. ટ્રમ્પનું કહેવું છે કે તેઓ આના દ્વારા અમેરિકન સિસ્ટમને સંપૂર્ણપણે રિકવર અને રીસેટ કરશે.
ટ્રમ્પે શું કહ્યું?
ટ્રમ્પે ટ્રુથ સોશિયલ પર લખ્યું, “ભલે આપણે ટેક્નોલોજીમાં પ્રગતિ કરી છે, પરંતુ ઈમિગ્રેશન પોલિસીએ ઘણા લોકો માટે તે ફાયદા અને રહેવાની સ્થિતિને ખતમ કરી નાખી છે. હું તમામ ત્રીજા વિશ્વના દેશોમાંથી થતા સ્થળાંતરને કાયમ માટે અટકાવી દઈશ, જેથી અમેરિકન સિસ્ટમ સંપૂર્ણપણે ઠીક થઈ શકે. બાઈડેનના લાખો ગેરકાયદેસર એડમિશન ખતમ કરી દઈશ.”
હવે કોને ડિપોર્ટ કરવાની તૈયારીમાં છે ટ્રમ્પ?
ટ્રમ્પે એમ પણ કહ્યું કે જે વ્યક્તિ અમેરિકાના કામની નથી, તેને બહાર કરી દેવામાં આવશે. અમેરિકી રાષ્ટ્રપતિએ લખ્યું,
“હું એવા કોઈપણ વ્યક્તિને બહાર કરી દઈશ જે યુનાઈટેડ સ્ટેટ્સ માટે ‘નેટ એસેટ’ (ઉપયોગી સંપત્તિ) નથી, અથવા આપણા દેશ પ્રત્યે લગાવ નથી રાખતા. આપણા દેશના બિન-નાગરિકોને મળતા તમામ ફેડરલ લાભો અને સબસિડી ખતમ કરી દઈશ. જાહેર જનતા પર બોજ હોય તેવા દરેક વિદેશી નાગરિકને ડિપોર્ટ કરી દઈશ.”
ટ્રમ્પે કોને ગણાવ્યા થર્ડ વર્લ્ડ દેશ?
અમેરિકી રાષ્ટ્રપતિ ટ્રમ્પે તેમની સોશિયલ મીડિયા પોસ્ટમાં ‘થર્ડ વર્લ્ડ કંટ્રીઝ’નો ઉલ્લેખ કર્યો છે. આ શબ્દ ઘણો વિવાદાસ્પદ માનવામાં આવે છે. તેનો ઉપયોગ શીત યુદ્ધ (Cold War) દરમિયાન શરૂ થયો હતો. ‘થર્ડ વર્લ્ડ’નો ઉપયોગ દુનિયાને ત્રણ ભાગમાં વહેંચવા માટે કરવામાં આવતો હતો:
-
ફર્સ્ટ વર્લ્ડ: આમાં એ દેશો હતા, જે અમેરિકા અને નાટો (NATO)ના સહયોગી માનવામાં આવતા હતા.
-
સેકન્ડ વર્લ્ડ: આમાં એ દેશો હતા જે સોવિયેત સંઘ અને વોર્સો પેક્ટના સહયોગી હતા.
-
થર્ડ વર્લ્ડ: આમાં એવા દેશો હતા જે કોઈપણ જૂથનો ભાગ ન હતા. એશિયા, આફ્રિકા અને લેટિન અમેરિકાને તેનો ભાગ માનવામાં આવતા હતા.
