લૂંટના પૈસાની વહેંચણી કરતા એલસીબીએ આરોપીઓને રંગેહાથ પકડ્યા
પ્રાંતિજ તાલુકાના દલપુર નજીક નવ દિવસ પહેલા એક મોટી લૂંટની ઘટના સામે આવી હતી. ફાઈનાન્સ કંપનીનો કર્મચારી પ્રાંતિજથી હિંમતનગર તરફ રૂ.7.88 લાખની રોકડ લઈને જઈ રહ્યો હતો. રાત્રિના સમયે ધાર્મિક સ્થળ પાસે બે અજાણ્યા બાઈક સવારો આવી તેને લૂંટી ફરાર થઈ ગયા હતા. આ ઘટનાની ફરીયાદ પ્રાંતિજ પોલીસ સ્ટેશનમાં નોંધાતા તપાસ શરૂ કરવામાં આવી હતી.
એલસીબીની કાર્યવાહીથી છ આરોપી ઝડપાયા
લૂંટની ઘટનાની માહિતીના આધારે સાબરકાંઠા એલસીબીની ટીમે સક્રિય તપાસ હાથ ધરી હતી. ગુરુવારે પ્રાંતિજ તાલુકાના મામરોલીની સીમ વિસ્તારમાં શંકાસ્પદ હરકતો અંગે માહિતી મળી હતી. ઉમિયા કંપા નજીકના ખરાબામાં તપાસ કરતાં છ શખ્સો લૂંટના પૈસાની વહેંચણી કરતા મળી આવ્યા હતા. એલસીબીએ તમામને સ્થળ પર જ રંગેહાથ ઝડપી લીધા હતા.
ફાઈનાન્સ કર્મચારી પર હુમલો કરી લૂંટ
પોલીસ પુછપરછમાં ખુલ્યું કે ફાઈનાન્સ કંપનીમાં કામ કરતા બે કર્મચારીઓએ અંદરની માહિતી પોતાના ઓળખીતાઓને આપી હતી. આ માહિતીના આધારે લૂંટનું આયોજન કરવામાં આવ્યું હતું. 3 ડિસેમ્બરની રાત્રે બે બાઈક પર આવેલા આરોપીઓએ કર્મચારીને બોથડ પદાર્થથી ઈજા પહોંચાડી હતી. ત્યારબાદ રોકડ ભરેલી થેલી લૂંટી તેઓ ભાગી ગયા હતા.
લાખોનો મુદ્દામાલ અને વાહનો જપ્ત
પોલીસે પકડાયેલા છ આરોપીઓ પાસેથી મોટી માત્રામાં મુદ્દામાલ કબ્જે કર્યો છે. રોકડ રકમ, મોબાઈલ ફોન તેમજ બે બાઈક સહિત કુલ રૂ.9.88 લાખથી વધુનો મુદ્દામાલ જપ્ત કરવામાં આવ્યો છે. આરોપીઓ પાસેથી વધુ માહિતી મેળવવા રિમાન્ડની કાર્યવાહી હાથ ધરવામાં આવી છે. આ કેસ બાદ વિસ્તારમાં ફરી એકવાર સુરક્ષા મુદ્દે ચર્ચા શરૂ થઈ છે.
