બાળકોના વાલીઓને ટાર્ગેટ કરતી હાઈટેક છેતરપિંડી
ડિજિટલ યુગમાં જેમ ટેક્નોલોજી આગળ વધી રહી છે તેમ છેતરપિંડી કરનારાઓ પણ નવી નવી યુક્તિઓ અજમાવી રહ્યા છે. ખેડા જિલ્લાના નડિયાદમાં એવો ચોંકાવનારો બનાવ સામે આવ્યો છે જેમાં સાયબર ગઠિયાઓએ સીધા સ્કૂલમાં ભણતા બાળકોના વાલીઓને નિશાન બનાવ્યા છે. જાણીતી સંતરામ ઇંગ્લિશ મીડિયમ સ્કૂલના નામનો દુરુપયોગ કરીને વાલીઓને ફોન કરવામાં આવ્યા. આ બનાવે વાલીઓમાં ચિંતા અને ભયનો માહોલ ઉભો કર્યો છે.
એક જ દિવસે સો કરતાં વધુ વાલીઓને ફોન
17 ડિસેમ્બરની સવારથી નડિયાદમાં અનેક વાલીઓના મોબાઇલ ફોન વાગવા લાગ્યા હતા. ફોન કરનાર વ્યક્તિ પોતાને સ્કૂલના સંચાલક અથવા શિક્ષક તરીકે ઓળખાવતી હતી. બાળકોની વિગતો અપડેટ કરવાની વાત કરી વાલીઓનો વિશ્વાસ જીતવાનો પ્રયાસ કરાયો. બાદમાં કોઈ શૈક્ષણિક એપ્લિકેશનના બહાને વાલીઓ પાસેથી OTP માંગવામાં આવતો હતો.
વોટ્સએપ ગ્રુપ હેક કરીને રચાયેલી ચાલ
આ કિસ્સામાં ગઠિયાઓએ એક નવી જ પદ્ધતિ અપનાવી હોવાનું સામે આવ્યું છે. સૌથી પહેલા વિદ્યાર્થીઓના વાલીઓના વોટ્સએપ ગ્રુપ પર હાથ સાફ કરવામાં આવે છે. ત્યારબાદ સ્કૂલ કે ટ્યુશન ક્લાસના નામે આત્મવિશ્વાસપૂર્વક ફોન કરવામાં આવે છે. વાલી જેમ OTP આપે તેમ તરત જ ફોન કે બેંક ખાતું હેક થઈ જાય છે.
વિશ્વાસનો દુરુપયોગ કરી રૂપિયા ઉડાવ્યા
એક ગંભીર ઘટનામાં ગઠિયાએ પોતાને શિક્ષિકાનો પતિ હોવાનું કહી વાલીને ફોન કર્યો હતો. સ્કૂલ સંબંધિત માહિતી આપતી એપ્લિકેશન ડાઉનલોડ કરાવવાના બહાને OTP માંગવામાં આવ્યો. વાલીએ ભરોસો મૂકતા જ ગણતરીની સેકન્ડોમાં તેમના ખાતામાંથી 14 હજાર રૂપિયા ઉપડી ગયા. આવી ઘટનાઓથી વાલીઓમાં ભારે રોષ જોવા મળ્યો છે.
સ્કૂલ અને પોલીસની સતર્કતા
એક સાથે અનેક વાલીઓને ફોન આવતા સ્કૂલ તંત્ર તરત જ હરકતમાં આવ્યું હતું. સ્કૂલે સ્પષ્ટ જણાવ્યું કે તેમની તરફથી ક્યારેય OTP કે લિંક મોકલવામાં આવતી નથી. સાયબર ક્રાઈમ પોલીસના અધિકારીએ પણ વાલીઓને અપીલ કરી છે કે કોઈ અજાણ્યા ફોન પર વ્યક્તિગત માહિતી ન આપે. સતર્કતા જ આવા સાયબર ગુનાઓથી બચવાનો એકમાત્ર રસ્તો છે.
