સુરેન્દ્રનગર કલેક્ટર કચેરીમાં રજાના દિવસે પણ ભ્રષ્ટાચારની તપાસ

તારીખવાર ડેટા તૈયાર, સુરેન્દ્રનગરમાં મોટા ખુલાસાની તૈયારી

ગુજરાતમાં ભ્રષ્ટાચાર સામે ચાલી રહેલી કાર્યવાહી વચ્ચે સુરેન્દ્રનગર જિલ્લો ફરી ચર્ચાના કેન્દ્રમાં આવ્યો છે. EDના દરોડા બાદ હવે જિલ્લા વહીવટીતંત્રએ અંદરની તપાસ વધુ તેજ કરી છે. સામાન્ય રીતે રજાના દિવસોમાં સુમસામ રહેતી કલેક્ટર કચેરીમાં આ વખતે અલગ જ દ્રશ્ય જોવા મળ્યું. શનિ-રવિની રજામાં પણ અધિકારીઓ અને કર્મચારીઓ આખી રાત સુધી હાજર રહી શંકાસ્પદ દસ્તાવેજોની તપાસ કરતા નજરે પડ્યા.

કલેક્ટર કચેરીમાં રાત્રી દરમિયાન ફાઈલોની ઊંડાણપૂર્વક ચકાસણી

EDની કાર્યવાહી બાદ કલેક્ટર કચેરીની કામગીરી પર સવાલો ઊભા થયા હતા. તે પછી વહીવટીતંત્રે પોતાની વિશ્વસનીયતા જાળવવા માટે તમામ શંકાસ્પદ વહીવટો ખંગાળવાનો નિર્ણય લીધો છે. સૂત્રોના જણાવ્યા અનુસાર, શનિવારે મોડી રાત સુધી કચેરીમાં લાઈટો ચાલુ રહી હતી. ઉચ્ચ અધિકારીઓની દેખરેખ હેઠળ જૂની ફાઈલો, મંજૂરીના દસ્તાવેજો અને નોંધપાત્ર નિર્ણયોની ફરીથી ચકાસણી કરવામાં આવી હતી.

બિનખેતી મંજૂરીઓ અને જમીન વ્યવહારો પર ખાસ ધ્યાન

આ આંતરિક તપાસમાં મુખ્ય ફોકસ જમીન મહેસૂલ વિભાગ અને બિનખેતી મંજૂરીઓ પર રાખવામાં આવ્યો છે. ભૂતકાળમાં આપવામાં આવેલી NA મંજૂરીઓમાં નિયમોનું પાલન થયું હતું કે નહીં, તેની તપાસ ચાલી રહી છે. કયા ગામમાં કેટલી જમીન બિનખેતી કરવામાં આવી, કોને લાભ મળ્યો અને કયા હેતુ માટે મંજૂરી અપાઈ, તેની વિગતવાર માહિતી એકત્રિત કરવામાં આવી રહી છે.

સોલાર પ્રોજેક્ટના નામે થયેલા સોદાઓની પણ તપાસ

તપાસ દરમિયાન સોલાર એનર્જી પ્રોજેક્ટ સાથે જોડાયેલી જમીન ફાળવણી પર પણ ખાસ નજર રાખવામાં આવી છે. સોલાર પ્રોજેક્ટના બહાને મોટા પાયે જમીન સોદા થયા હોવાની આશંકા સેવાઈ રહી છે. કયા ઉદ્યોગપતિ અથવા વ્યક્તિને કેટલી જમીન ફાળવાઈ, તે જમીન કયા ગામની છે અને મંજૂરી પ્રક્રિયામાં કોણ સામેલ હતું, તેની સંપૂર્ણ યાદી તૈયાર કરવામાં આવી રહી છે.

વઢવાણના હવા મહેલમાં મિલેટ મહોત્સવની રંગીન સાંજ, લોકનૃત્ય અને સંગીતે ઝાલાવાડને મંત્રમુગ્ધ કર્યું

પ્રાકૃતિક ખેતી અને મિલેટના ફાયદાઓ અંગે સુરેન્દ્રનગરમાં વિશેષ સ્ટોલ

તારીખ અને વર્ષ પ્રમાણે ડેટા ગોઠવવાની કામગીરી

તપાસને વધુ ચોક્કસ બનાવવા માટે તમામ ફાઈલોનું તારીખવાર અને વર્ષવાર વર્ગીકરણ શરૂ કરવામાં આવ્યું છે. કઈ અરજી ક્યારે રજૂ થઈ, કયા સમયમાં મંજૂરી મળી અને કયા અધિકારી દ્વારા સહી કરવામાં આવી, તેની નોંધ તૈયાર થઈ રહી છે. આ પ્રક્રિયા પૂર્ણ થયા બાદ સંડોવાયેલા નામો સામે કડક કાર્યવાહી થવાની શક્યતા વ્યક્ત કરવામાં આવી રહી છે.

મોટા કૌભાંડના પર્દાફાશ તરફ વહીવટીતંત્ર

EDની તપાસમાંથી મળેલી માહિતી અને હાલની આંતરિક ચકાસણીને જોડીને મોટા કૌભાંડનો પર્દાફાશ થવાની સંભાવના છે. વહીવટીતંત્ર ભ્રષ્ટાચાર સામે કડક વલણ અપનાવી રહ્યું હોવાનું સ્પષ્ટ દેખાઈ રહ્યું છે. આવનારા દિવસોમાં સુરેન્દ્રનગરમાં વધુ ખુલાસા અને કાર્યવાહી થવાની શક્યતા નકારી શકાય તેમ નથી.