મુખ્યમંત્રીના સહકારથી ગગદાસને મળ્યા અદ્યતન પ્રોસ્થેટિક પગ અને નવી આશા
વીજળીના ભયાનક અકસ્માતમાં બન્ને પગ ગુમાવ્યા છતાં ગગદાસ પરમારના સપનાએ ક્યારેય વિરામ લીધો નથી. રોજ સવારે 100 અને 200 મીટરની દોડ માટેની કઠોર તૈયારી સાથે તે પોતાના લક્ષ્ય તરફ આગળ વધી રહ્યો છે. તેની આંખોમાં એક જ સ્વપ્ન ઝળહળી રહ્યું છે, દેશનું પ્રતિનિધિત્વ કરવાનું. આ સફર ગગદાસ માટે માત્ર રમત નહીં, પરંતુ જીવનને ફરીથી સાબિત કરવાની તક છે.
અકસ્માતથી બદલી ગયેલું જીવન
વર્ષ 2017માં વીજ કરંટ લાગતા ગગદાસના બન્ને પગ ઘૂંટણ નીચેથી કપાવા પડ્યા હતા. ખેતમજૂર પરિવાર માટે આ ઘટના આર્થિક અને માનસિક રીતે અત્યંત આઘાતજનક સાબિત થઈ. પરિવારએ અનેક વર્ષો સુધી સારવાર પાછળ ભારે ખર્ચ કર્યો. છતાં, આ મુશ્કેલ સમયમાં ગગદાસે હિંમત હારી નહીં.
શિક્ષણ અને રમત તરફનો વળાંક
અકસ્માત બાદ ગગદાસે અભ્યાસ ચાલુ રાખવા પાલનપુરનો માર્ગ પકડી લીધો. દિવ્યાંગો માટેની હોસ્ટેલમાં રહીને તેણે અભ્યાસ સાથે રમતગમતની શરૂઆત કરી. અહીં તેને યોગ્ય માર્ગદર્શન અને પ્રોત્સાહન મળ્યું. માત્ર છ મહિનાની તૈયારીમાં જ તેણે ડિસ્ક થ્રો અને પેરા પાવરલિફ્ટિંગમાં રાષ્ટ્રીય સ્તરે પદકો મેળવી પોતાની ક્ષમતા સાબિત કરી.
મુખ્યમંત્રી સુધી પહોંચેલી રજૂઆત
રમતગમતમાં આગળ વધવા માટે ગગદાસને અદ્યતન પ્રોસ્થેટિક પગોની જરૂર હતી, જેનો ખર્ચ તેના પરિવાર માટે અસમર્થનીય હતો. આ પરિસ્થિતિમાં ગગદાસે હિંમત કરીને સીધી રીતે મુખ્યમંત્રી સમક્ષ પોતાની વાત રજૂ કરી. ગાંધીનગર જઈ તેણે પોતાના સપના અને સંઘર્ષની વિગત સરકાર સુધી પહોંચાડી. આ રજૂઆત તેના જીવનમાં મહત્વપૂર્ણ વળાંક બની.
સહાયથી મળ્યો નવો આત્મવિશ્વાસ
મુખ્યમંત્રીના પ્રયાસોથી ગગદાસને સરકારી સહાય અને સીએસઆર ફંડ દ્વારા તાત્કાલિક મદદ મળી. અદ્યતન ટેક્નોલોજીવાળા પ્રોસ્થેટિક પગ અને ઉચ્ચ સ્તરના કોચિંગથી તેની તૈયારીને નવી ગતિ મળી છે. હવે ગગદાસનો લક્ષ્ય સ્પષ્ટ છે અને તે ઓલિમ્પિક મેડલ જીતવા માટે અવિરત મહેનત કરી રહ્યો છે.
