કેરળના ધારાસભ્ય એન્ટની રાજુને પુરાવા સાથે છેડછાડના કેસમાં 3 વર્ષની સજા; ધારાસભ્ય પદ પણ રદ થયું
કેરળની એક અદાલતે શનિવાર, 3 જાન્યુઆરી 2026 ના રોજ રાજ્યના પૂર્વ પરિવહન મંત્રી અને વર્તમાન ધારાસભ્ય એન્ટની રાજુને 36 વર્ષ જૂના “પુરાવા સાથે છેડછાડ” ના બહુચર્ચિત કેસમાં દોષિત ઠેરવીને ત્રણ વર્ષની સખત કેદની સજા ફટકારી છે. આ સજાના તુરંત બાદ, ‘લોક પ્રતિનિધિત્વ અધિનિયમ’ (Representation of the People Act), 1951 હેઠળ એન્ટની રાજુનું કેરળ વિધાનસભાનું સભ્યપદ આપોઆપ રદ થઈ ગયું છે.
શું છે આ 36 વર્ષ જૂનો કેસ?
આ મામલો 1990નો છે જ્યારે ઓસ્ટ્રેલિયન નાગરિક એન્ડ્રુ સાલ્વાડોર સર્વેલીની તિરુવનંતપુરમ એરપોર્ટ પર પોતાના અન્ડરવેરમાં 61.5 ગ્રામ પ્રતિબંધિત માદક દ્રવ્ય (ચરસ) છુપાવીને તસ્કરી કરવાના આરોપમાં ધરપકડ કરવામાં આવી હતી. તે સમયે એન્ટની રાજુ એક યુવા વકીલ હતા અને સર્વેલીની કાનૂની ટીમનો ભાગ હતા.
અન્ડરવેર સાથે કરવામાં આવી હતી ‘ફિક્સિંગ’
તપાસમાં સાબિત થયું કે રાજુએ કોર્ટના ક્લર્ક જોસ સાથે મળીને મુખ્ય પુરાવા (અન્ડરવેર) ને કોર્ટની કસ્ટડીમાંથી બહાર કાઢ્યો અને તેની સાઈઝ નાની કરવા માટે તેને ફરીથી સીવી લીધો. 1991માં જ્યારે કેરળ હાઈકોર્ટમાં અપીલ દરમિયાન સર્વેલીએ તે અન્ડરવેર પહેરીને બતાવ્યો, ત્યારે તે તેને નાનો પડ્યો હતો. તેના આધારે હાઈકોર્ટે તેને શંકાનો લાભ આપી નિર્દોષ જાહેર કર્યો હતો.
ફોરેન્સિક રિપોર્ટ અને ઓસ્ટ્રેલિયાથી મળ્યો પુરાવો
વર્ષો પછી, સર્વેલીએ ઓસ્ટ્રેલિયાની એક જેલમાં સ્વીકાર્યું કે ભારતમાં તેના કેસમાં પુરાવા સાથે છેડછાડ કરવામાં આવી હતી. ત્યારબાદ થયેલી તપાસમાં ફોરેન્સિક નિષ્ણાતોએ શોધી કાઢ્યું કે અન્ડરવેરમાં હાથથી કરવામાં આવેલી સિલાઈ અને કાપેલા લેબલ એ વાતનો પાકો પુરાવો હતો કે તેની સાથે છેડછાડ કરવામાં આવી હતી.
અદાલતનો ચુકાદો અને રાજકીય પ્રભાવ
તિરુવનંતપુરમની મેજિસ્ટ્રેટ કોર્ટે રાજુને પુરાવા સાથે છેડછાડ, છેતરપિંડી અને વિશ્વાસઘાતના આરોપોમાં દોષિત ઠેરવ્યા. જોકે આ ઘટના 36 વર્ષ જૂની છે, પરંતુ સુપ્રીમ કોર્ટ દ્વારા નવેમ્બર 2024 માં કેસને ફરીથી જીવંત કર્યા પછી કાર્યવાહીમાં તેજી આવી હતી.
સજા મળવાને કારણે એન્ટની રાજુ હવે આગામી છ વર્ષ સુધી ચૂંટણી લડવા માટે પણ અયોગ્ય ઠર્યા છે. તેમના હટવાથી તિરુવનંતપુરમ વિધાનસભા બેઠક હવે ખાલી પડી છે, જે રાજ્યની સત્તાધારી LDF સરકાર માટે એક મોટો નૈતિક ફટકો છે.
