૫૦ કિમી દૂરથી આવે છે ગ્રાહકો! ઉષાબેનના હાથે બનેલું ઉંબાડિયું બન્યું સુરતની શાન
આજે જ્યારે નોકરીઓ માટે યુવાનો વલખાં મારી રહ્યા છે, ત્યારે સુરતના ભાઠા ગામની એક સામાન્ય ગૃહિણીએ ખેતી અને પરંપરાગત સ્વાદના સંગમથી સફળતાનું નવું શિખર સર કર્યું છે. માત્ર પાંચ ચોપડી ભણેલા ઉષાબેન પટેલ છેલ્લા ૩૩ વર્ષથી ખેતી ક્ષેત્રે સક્રિય છે અને આજે તેઓ માત્ર સુરત જ નહીં પરંતુ વિદેશમાં પણ પોતાના હાથના સ્વાદ માટે જાણીતા બન્યા છે.
નવસારી બજારથી ખેતર સુધીની સફર
શરૂઆતના વર્ષોમાં ઉષાબેન પોતાના બે વીઘા ખેતરમાં ઉગાડેલી પાપડી વેચવા નવસારી બજારમાં જતાં હતા. જોકે, સમય જતાં બજારની હાડમારીઓને બદલે તેમણે ખેતર પર જ ગ્રાહકોને બોલાવવાનું નક્કી કર્યું. ગુણવત્તામાં ક્યારેય બાંધછોડ ન કરી હોવાથી ગ્રાહકોનો અતૂટ વિશ્વાસ કેળવાયો. આજે સ્થિતિ એવી છે કે અમેરિકા, લંડન અને દુબઈ જેવા દેશોમાં વસતા ગુજરાતીઓ પણ ખાસ ઉષાબેનના ખેતરની પાપડી મંગાવે છે.
ખાસ ઉંબાડિયું અને ‘સીક્રેટ’ ચટણીનો જાદુ
સાત વર્ષ પહેલાં ઉષાબેને પાપડી વેચવાની સાથે સાથે દક્ષિણ ગુજરાતની લોકપ્રિય વાનગી ‘ઉંબાડિયું’ બનાવવાનું શરૂ કર્યું. પોતાના જ ખેતરની તાજી પાપડી અને ઘરેલુ મસાલાથી તૈયાર થતું આ ઉંબાડિયું એટલું સ્વાદિષ્ટ હોય છે કે લોકો ૫૦ કિલોમીટર દૂરથી ભાઠા ગામ સુધી પહોંચે છે. રૂ. ૪૦૦ પ્રતિ કિલોના ભાવે તેઓ દરરોજ અંદાજે ૯૦ કિલો ઉંબાડિયું વેચે છે. ગ્રાહકોના મતે અહીંની ખાસ ચટણીનો સ્વાદ બીજે ક્યાંય મળવો મુશ્કેલ છે.
આવકનો મલ્ટિપલ સ્ત્રોત: ખેતી સાથે બિઝનેસ
ઉષાબેન માત્ર પાપડી કે ઉંબાડિયા પર નિર્ભર નથી, પરંતુ તેમણે પોતાની આવક વધારવા મલ્ટિપલ બિઝનેસ મોડલ અપનાવ્યું છે:
-
ગલેલીનો વ્યવસાય: ખેતરમાં ૨૪ જેટલા ગલેલીના ઝાડ છે, જે સિઝનમાં સારી આવક આપે છે.
-
ફળોની ખેતી: ખેતરમાં કેસર કેરીની ૧૩૦ જેટલી કલમો વાવીને કેરીની સિઝનમાં પણ મોટું વેચાણ કરે છે.
-
વાર્ષિક કમાણી: આ તમામ પ્રવૃત્તિઓ થકી તેઓ વાર્ષિક રૂ. ૮ થી ૧૦ લાખની આવક મેળવે છે.
૩૦ લોકોને રોજગારી આપી બન્યા મહિલા સશક્તિકરણનું ઉદાહરણ
એક સફળ ઉદ્યોગસાહસિકની જેમ ઉષાબેન પોતાના પરિવાર ઉપરાંત આસપાસના અંદાજે ૩૦ જેટલા લોકોને સીધી કે આડકતરી રીતે રોજગારી પૂરી પાડી રહ્યા છે. તેમની સફળતા એ વાતનો પુરાવો છે કે જો મહેનત, વિશ્વાસ અને વસ્તુની ક્વોલિટી જાળવવામાં આવે તો ખેતી એ ખોટનો સોદો નથી, પરંતુ એક મોટો વ્યવસાય બની શકે છે.
