કાવાસાકી ઇન્ડિયાનો મોટો ધડાકો: Z650 અને Z650RS પર ભારે ડિસ્કાઉન્ટ; જાણો 2026 મોડલની વિશેષતાઓ અને નવા સુરક્ષા નિયમો
કાવાસાકી ઇન્ડિયાએ તેના ગ્રાહકો માટે નવા વર્ષ નિમિત્તે ખાસ ભેટ રજૂ કરી છે. કંપનીએ તેની લોકપ્રિય મોટરસાઇકલ, Z650 અને Z650RS પર 27,000 રૂપિયા સુધીના ભારે ડિસ્કાઉન્ટની જાહેરાત કરી છે. આ ઓફર 31 જાન્યુઆરી, 2026 સુધી માન્ય છે.
Z650 અને Z650RS પર મળી રહી છે મોટી રાહત
આ ડિસ્કાઉન્ટ બાદ, Kawasaki Z650 ની નવી એક્સ-શોરૂમ કિંમત 6,99,000 રૂપિયા થઈ ગઈ છે, જે પહેલા 7,26,000 રૂપિયા હતી. બીજી તરફ, નિયો-રેટ્રો સ્ટાઇલ ધરાવતી Z650RS હવે 7,63,000 રૂપિયામાં ઉપલબ્ધ છે. નોંધનીય છે કે આ ડિસ્કાઉન્ટ માત્ર MY25 (2025 માં ઉત્પાદિત) યુનિટ્સ પર જ લાગુ છે.
આ ઉપરાંત, કંપનીએ તેની પ્રીમિયમ સુપરબાઈક Ninja ZX-10R પર 2.5 લાખ રૂપિયાનું જંગી ડિસ્કાઉન્ટ આપ્યું છે, જેનાથી તેની કિંમત 18.29 લાખ રૂપિયા (એક્સ-શોરૂમ) થઈ ગઈ છે. Ninja 1000 SX પર પણ 1.43 લાખ રૂપિયાનો ઘટાડો કરવામાં આવ્યો છે.
2026 Z650RS મોડલની મુખ્ય વિશેષતાઓ
કાવાસાકીએ ભારતમાં Z650RS નું 2026 મોડલ (MY26) પણ લોન્ચ કર્યું છે. જેની કિંમત જૂના મોડલ કરતા 14,000 રૂપિયા વધુ રાખવામાં આવી હતી, પરંતુ વર્તમાન ડિસ્કાઉન્ટ સાથે તે MY25 મોડલ કરતા પણ સસ્તી થઈ ગઈ છે.
- E20 ફ્યુઅલ રેડી: નવી Z650RS નું એન્જિન હવે E20 ઇંધણ (20% ઇથેનોલ મિશ્રણ) ને સુસંગત છે.
- b કંપનીએ જૂનો ઇબોની રંગ હટાવીને નવો ‘મેટાલિક ઓશન બ્લુ’ રંગ રજૂ કર્યો છે.
- એન્જિન અને ટોર્ક: તેમાં 649cc નું પેરેલલ-ટ્વિન એન્જિન છે. જોકે, નવા ઉત્સર્જન ધોરણોને કારણે તેના ટોર્કમાં મામૂલી ઘટાડો થયો છે; હવે તે 62.1 Nm ટોર્ક પેદા કરે છે, જે પહેલા 64 Nm હતો.
- સુરક્ષા ફીચર્સ: તેમાં ડ્યુઅલ ચેનલ ABS અને 2-મોડ ટ્રેક્શન કંટ્રોલ જેવા આધુનિક સુરક્ષા ફીચર્સ આપવામાં આવ્યા છે.
2026 થી બદલાઈ જશે સુરક્ષા નિયમો
ભારત સરકારના માર્ગ પરિવહન અને રાજમાર્ગ મંત્રાલય (MoRTH) એ એક મહત્વપૂર્ણ ડ્રાફ્ટ જારી કર્યો છે. તે મુજબ 1 જાન્યુઆરી, 2026 થી ઉત્પાદિત થતા તમામ દ્વિચક્રી વાહનોમાં એન્ટી-લોક બ્રેકિંગ સિસ્ટમ (ABS) ફરજિયાત કરવામાં આવી છે.
- કિંમતો પર અસર: 125cc થી ઓછી ક્ષમતા ધરાવતા વાહનો (જેમાં પહેલા CBS ફરજિયાત હતું) માં ABS લાગવાથી તેમની કિંમતોમાં 3-5% (આશરે 2,500 થી 4,000 રૂપિયા) નો વધારો થવાની શક્યતા છે.
- હેલ્મેટ નિયમ: નવા નિયમો અનુસાર, હવે વાહનની ખરીદી સાથે બે સુરક્ષા હેલ્મેટ આપવા પણ ફરજિયાત રહેશે.
ABS (એન્ટી-લોક બ્રેકિંગ સિસ્ટમ) રોડ સેફ્ટી માટે એક ક્રાંતિકારી પગલું છે કારણ કે તે અચાનક બ્રેક મારતી વખતે પૈડાંને લોક થતા અટકાવે છે, જેનાથી વાહન લપસી જતું બચે છે. આંકડા મુજબ, ભારતમાં દ્વિચક્રી વાહન અકસ્માતોમાં મૃત્યુદર ઊંચો રહ્યો છે, જેને નિયંત્રિત કરવા માટે સરકાર આ કડક પગલાં લઈ રહી છે.
