ગાંધીનગરમાં જાયન્ટ સાઇઝ ચેસ બોર્ડનું અનાવરણ, ચેસ રમતને લોકપ્રિય બનાવવા જનપ્રતિનિધિઓની હાજરીમાં વિશેષ કાર્યક્રમ
ગાંધીનગર જિલ્લા ચેસ એસોસિએશન દ્વારા આયોજિત આ ટુર્નામેન્ટમાં સમગ્ર ભારતભરમાંથી ૪૦૦થી વધુ ખેલાડીઓએ ભાગ લીધો હતો. આ સ્પર્ધાની વિશેષતા એ હતી કે તેમાં ૭૦ જેટલા ઇન્ટરનેશનલ ફીડે (FIDE) રેટેડ પ્લેયર્સ પણ મેદાને પડ્યા હતા. ગુજરાતના વિવિધ શહેરો ઉપરાંત રાજસ્થાન, મધ્યપ્રદેશ અને સિક્કિમ જેવા રાજ્યોના ખેલાડીઓએ ગાંધીનગરના આંગણે ચેસની રમતમાં પોતાનું કૌશલ્ય દાખવ્યું હતું.
જાયન્ટ ચેસ બોર્ડનું અનાવરણ
ગાંધીનગર મ્યુનિસિપલ કોર્પોરેશન (GMC) દ્વારા ચેસની રમતને લોકપ્રિય બનાવવા માટે વસાવવામાં આવેલ ‘જાયન્ટ સાઈઝ’ના ચેસ બોર્ડ અને ચેસમેનનું મેયર સુશ્રી મીરાબેન પટેલ અને ધારાસભ્ય રિટાબેન પટેલના હસ્તે ઉદઘાટન કરવામાં આવ્યું હતું. આ પ્રસંગે મુખ્યમંત્રીશ્રીનો પ્રેરણાદાયી સંદેશ પણ વાંચવામાં આવ્યો હતો. મહાનુભાવોએ આ નવતર પ્રયોગને બિરદાવ્યો હતો, જે શહેરના યુવાનોને ચેસ પ્રત્યે આકર્ષિત કરવામાં મદદરૂપ થશે.
વિશ્વ ચેમ્પિયન્સનું વિશેષ સન્માન
ટુર્નામેન્ટ દરમિયાન ભારતનું ગૌરવ વધારનાર પ્રતિભાઓનું વિશેષ સન્માન કરવામાં આવ્યું હતું:
-
કુ. વાકા લક્ષ્મી પ્રજ્ઞીકા: ૭ વર્ષથી નીચેની વય જૂથમાં વિશ્વ ચેમ્પિયન બનનાર, જેમને રાષ્ટ્રપતિ અને વડાપ્રધાન દ્વારા સન્માનિત કરવામાં આવ્યા છે.
-
કુ. આદિત્રી સોમ: ૧૪ વર્ષથી નીચેની વય જૂથમાં કોમનવેલ્થ ચેસ ગેમ ચેમ્પિયનશીપ જીતનાર.
-
વિશેષ યોગદાન: ચેસની રમતમાં પાયાનું યોગદાન આપનાર કિન્નરીબેન પટેલ, મોતિસિંહ આટોદરિયા અને અન્ય મહાનુભાવોનું શાલ અને પુસ્તક અર્પણ કરી સન્માન કરાયું હતું.
વિજેતાઓ પર ઈનામોનો વરસાદ
ટુર્નામેન્ટના સમાપન સમારંભમાં પ્રમુખ સુભાષભાઇ દવે અને અગ્રણીઓની ઉપસ્થિતિમાં વિજેતા ખેલાડીઓને રોકડ ઇનામ, ટ્રોફી અને પ્રમાણપત્રો એનાયત કરવામાં આવ્યા હતા. આ કાર્યક્રમને સફળ બનાવવા માટે વાલીઓ, કોચ અને શાળાઓના પ્રિન્સીપાલશ્રીઓએ મોટો સહયોગ આપ્યો હતો. સમગ્ર કાર્યક્રમનું સંચાલન શ્રી અજયભાઈ વખારીયા દ્વારા સુંદર રીતે કરવામાં આવ્યું હતું.
