હિંમતનગરના કાનપુર ખાતે RBI દ્વારા ક્ષેત્ર સ્તરીય નાણાકીય સાક્ષરતા કાર્યક્રમ યોજાયો, ડિજિટલ સુરક્ષા અને બચત પર ભાર

ઝડપી વિકસતી અર્થવ્યવસ્થામાં નાણાકીય જાગૃતિ અનિવાર્ય: RBI પ્રાદેશિક નિર્દેશકનો નાગરિકોને સંદેશ

સાબરકાંઠા જિલ્લાના હિંમતનગર તાલુકાના કાનપુર ખાતે ભારતીય રિઝર્વ બેંક (RBI) દ્વારા ‘ક્ષેત્ર સ્તરીય નાણાકીય સાક્ષરતા કાર્યક્રમ’ યોજાયો હતો. RBI ના પ્રાદેશિક નિર્દેશકની અધ્યક્ષતામાં યોજાયેલા આ કાર્યક્રમમાં ભારપૂર્વક જણાવવામાં આવ્યું હતું કે, ભારત જેવી ઝડપથી વિકસતી અર્થવ્યવસ્થામાં નાણાકીય સાક્ષરતા હવે માત્ર પસંદગી નથી, પણ દરેક નાગરિક માટે સુરક્ષિત ભવિષ્યની જરૂરિયાત છે.

નિષ્ક્રિય ખાતાઓ માટે વિશેષ KYC અભિયાન

RBI દ્વારા સપ્ટેમ્બર 2025 થી એક વિશેષ રાષ્ટ્રવ્યાપી અભિયાન શરૂ કરવામાં આવ્યું છે, જેનો મુખ્ય ઉદ્દેશ્ય પંચાયત સ્તરે નિષ્ક્રિય પડેલા બેંક ખાતાઓનું રી-KYC (Re-KYC) પૂર્ણ કરવાનો છે.

• હેતુ: નાગરિકોના પરિશ્રમથી કમાયેલા નાણાં જે નિષ્ક્રિય ખાતામાં બિનદાવેદાર પડ્યા છે, તેને બેંક ખાતા સક્રિય કરાવી પરત અપાવવા.

• નાણાકીય સાક્ષરતા સપ્તાહ: આગામી નાણાકીય સાક્ષરતા સપ્તાહની થીમ પણ આ જ અભિયાન પર આધારિત રહેશે.

• UDGAM પોર્ટલ: પ્રાદેશિક નિર્દેશકે નાગરિકોને RBI ના ‘UDGAM’ પોર્ટલનો ઉપયોગ કરી તેમની કોઈ બિનદાવેદાર જમા રકમ (Unclaimed Deposits) છે કે નહીં તે તપાસવા વિનંતી કરી હતી.

સાયબર સુરક્ષા અને ડિજિટલ સાવચેતી

વધતા જતા ડિજિટલ વ્યવહારોની સાથે સાયબર ફ્રોડ અને નાણાકીય ઠગાઈના કિસ્સાઓ અંગે પ્રાદેશિક નિર્દેશકે ગંભીર ચિંતા વ્યક્ત કરી હતી. નાગરિકોને ડિજિટલ સેવાઓનો ઉપયોગ કરતી વખતે સતર્ક રહેવા અને કોઈની પણ સાથે અંગત બેંકિંગ વિગતો શેર ન કરવા સલાહ આપવામાં આવી હતી. કાર્યક્રમ દરમિયાન RBI ના અધિકારીઓએ પ્રશ્નોત્તરી અને ઇન્ટરએક્ટિવ સત્રો દ્વારા ગ્રામજનોને લોન, વીમા અને સુરક્ષિત રોકાણના વિવિધ પાસાઓ સમજાવ્યા હતા.