કેનેડામાં 30 ઇંચ જેટલો બરફ પડ્યો તેનાથી રાજધાનીમાં 21 વર્ષ જૂનો રેકોર્ડ તૂટ્યો

કેનેડામાં બરફના તોફાને ભારે તબાહી મચાવી છે. બોમ્બ સાયકલોનના કારણે કેનેડાના અનેક વિસ્તારો પ્રભાવિત થયા છે. અહીંયા હિમ વર્ષાએ બે દાયકાનો રેકોર્ડ તોડ્યો છે.  કેનેડાના સેન્ટ જોનમાં 30 ઇંચ જેટલો રેકોર્ડ તોડ બરફ પડ્યો છે.કેનેડામાં આવેલા બરફના તોફાન બોમ્બ સાયક્લોને ન્યૂ ફાઉન્ડલેન્ડ, એટલાન્ટિક અને લેબ્રાડોર રાજ્યમાં તબાહી મચાવી દીધી છે. બરફના તોફાનની ચપેટમાં આવ્યા બાદ ન્યૂ ફાઉન્ડલેન્ડની રાજધાની સેન્ટ જોનમાં ઈતિહાસની અત્યાર સુધીની સૌથી વધારે બરફવર્ષા થઇ હતી. સેન્ટ જોન ઇન્ટરનેશનલ એરપોર્ટ પર 120-157 કિમી પ્રતિ કલાકની સ્પીડથી હવાઓ ચાલી જેના કારણે હવાઇ સેવાઓ રોકવી પડી હતી.હવામાન વૈજ્ઞાનિકે કહ્યું છે કે બોમ્બ સાયક્લોન બનવાનું કારણ 24 કલાકમાં હવાનું દબાણ 24 મિલીબાર અથવા તેનાથી વધારે થયું હતુ. જેના કારણે શહેરમાં એક દિવસમાં 76.2 સેમી  એટલે કે 30 ઇંચ જેટલો બરફ પડ્યો. તેનાથી રાજધાનીમાં બરફવર્ષાનો 21 વર્ષ જૂનો રેકોર્ડ તૂટ્યો. સેન્ટ જોન શહેરમાં આ પહેલા 5 એપ્રિલ 1999એ 68.4 સેમી એટલે કે 27 ઇંચ બરફ વર્ષા નોંધાઇ હતી.ગત સપ્તાહની શરૂઆતમાં અમેરિકાના પૂર્વોત્તર વિસ્તારોમાં ભારે પવન, બરફવર્ષા અને વરસાદના લીધે આ તોફાન કેનેડા પહોંચીને બોમ્બ સાયક્લોનમાં તબદીલ થઇ ગયું હતું. તેનાથી કેનેડાના ત્રણ રાજ્યોમાં અસર થઇ છે. સેન્ટ જોન શહેરમાં બરફના થર જામી જવાથી ઘરોના દરવાજા બંધ થઇ ગયા અને લોકો તેમા ફસાઇ ગયા હતાં. રસ્તાઓ પર ઉભેલી ગાડીઓ પણ બરફ નીચે દબાઇ ગઇ છે. લોકોની મદદ માટે સેના પહોંચી છે.