Video: ‘લે બેટા… દિલ ના દિયા’ની ધૂન પર ઝૂમ્યા જવાનો, પ્રજાસત્તાક દિવસની રિહર્સલનો આ વીડિયો જોયો કે નહીં?
સોશિયલ મીડિયા પર આજકાલ ભારતીય સેનાનો એક વીડિયો લોકોમાં ઝડપથી વાયરલ થઈ રહ્યો છે. જેમાં ભારતીય સેનાના જવાનો વાયરલ થયેલા ધૂમ નામના યુવકના ગીત “દિલ ના દિયા દિલ ના લિયા બોલો ના બોલો ના ક્યા કિયા” પર મજેથી ડાન્સ કરતા અને ગાતા જોવા મળી રહ્યા છે. રિહર્સલની વચ્ચે અચાનક ગુંજતા આ ગીતે માહોલને ખુશનુમા બનાવી દીધો અને ત્યાં હાજર લોકોના ચહેરા પર સ્મિત લાવી દીધું હતું.
પ્રજાસત્તાક દિવસની પરેડની તૈયારીઓ વચ્ચે ભારતીય સેનાના જવાનોનો આ મજેદાર વીડિયો સોશિયલ મીડિયા પર ખૂબ પસંદ કરવામાં આવી રહ્યો છે. સામાન્ય રીતે કડક શિસ્ત, ગંભીરતા અને કઠિન તાલીમ માટે ઓળખાતી સેનાનું આ હળવું-ફૂલવું સ્વરૂપ લોકોને ખૂબ જ ગમી રહ્યું છે. રિહર્સલ દરમિયાન જવાનોને ‘લે બેટા! દિલ ના લિયા, દિલ ના દિયા’ ગુનગુનાવતા જોવામાં આવ્યા અને આ ક્ષણ જોતજોતામાં ઇન્ટરનેટ પર છવાઈ ગઈ.
કોણ છે આ ગીત ગાનાર ‘ધૂમ’?
આ ગીત સૌ પ્રથમ સોશિયલ મીડિયા પર ધૂમ નામના યુવકને કારણે વાયરલ થયું હતું. ધૂમ ઝારખંડના જમશેદપુરનો રહેવાસી છે. તેણે મસ્તીના મૂડમાં આ ગીત તેના મિત્રોને સંભળાવ્યું હતું, જે તેમણે મોબાઇલમાં રેકોર્ડ કરી સોશિયલ મીડિયા પર અપલોડ કરી દીધું હતું. ધૂમનો અંદાજ અને તેની બેફિકર રીત લોકોને એટલી ગમી ગઈ કે તે રાતોરાત ઇન્ટરનેટ સેન્સેશન બની ગયો. કહેવાય છે કે ધૂમ માનસિક રીતે બીમાર છે, પરંતુ તેના ચહેરાની માસૂમ સ્મિત અને ગીત ગાવાની મજેદાર શૈલીએ લોકોના દિલ જીતી લીધા છે.
“दिल ना दिया… दिल ना लिया… बोलो न बोलो न क्या किया…”
दुनिया भर के सैन्य तनावों के बीच दिल्ली से भारत के सैनिकों का एक कूल वीडियो… गणतंत्र दिवस परेड के अभ्यास के दौरान एक गाने पर क़दमताल करते जवान pic.twitter.com/D2hXnMI73D
— Umashankar Singh उमाशंकर सिंह (@umashankarsingh) January 20, 2026
જવાનોએ પણ મચાવી ધૂમ
હવે એ જ ગીતને ભારતીય સેનાના જવાનોએ પોતાના અંદાજમાં દોહરાવ્યું છે. પ્રજાસત્તાક દિવસની પરેડના રિહર્સલ દરમિયાન જ્યારે જવાનો પૂરી શિસ્ત સાથે અભ્યાસ કરી રહ્યા હતા, ત્યારે અચાનક તેમણે આ વાયરલ ગીત ગાવાનું શરૂ કરી દીધું હતું. ગંભીર માહોલ વચ્ચે આ ક્ષણ દરેક માટે એક સુંદર સરપ્રાઈઝ બની ગઈ હતી.
વીડિયોમાં સ્પષ્ટ જોઈ શકાય છે કે જવાનો પૂરા જોશ સાથે પરેડની તૈયારીમાં લાગેલા છે. કદમતાલ, તાલમેલ અને શિસ્ત બધું જ પોતાની જગ્યાએ અકબંધ છે, પરંતુ તેની વચ્ચે તેઓ આ ગીતની લાઈનો ગાતા જોવા મળે છે. આ નજારો દર્શાવે છે કે કઠિન ડ્યુટી અને કડક નિયમો હોવા છતાં જવાનોના હૃદય કેટલા જીવંત છે. તેઓ માત્ર વર્દીમાં સજ્જ કઠોર ચહેરા નથી, પરંતુ તેમની અંદર પણ હાસ્ય, મસ્તી અને લાગણીઓ છે.
ધૂમના ગીતને જવાનો દ્વારા દોહરાવવું એ પણ એક ખાસ વાત છે. તે દર્શાવે છે કે સોશિયલ મીડિયા પર વાયરલ થતી વસ્તુઓ કેવી રીતે અલગ-અલગ સ્થળો અને લોકોને જોડી દે છે. એક સામાન્ય યુવકનું મસ્તીમાં ગાયેલું ગીત હવે સેનાના રિહર્સલ સુધી પહોંચી ગયું અને ત્યાં પણ લોકોના ચહેરા પર ખુશી લાવી દીધી. આ ઇન્ટરનેટની તાકાત અને માનવીય લાગણીઓની સુંદરતા બંનેને ઉજાગર કરે છે.
