i-ખેડૂત પોર્ટલ પર બીલો અપલોડ ન કરનાર ખેડૂતોની સહાય અટકી શકે
વડોદરા જિલ્લાના જે ખેડૂતમિત્રોએ નાણાંકીય વર્ષ ૨૦૨૫-૨૬ દરમિયાન બાગાયત ખાતાની યોજનાઓ હેઠળ કેળ (ટીશ્યુ) અને પપૈયા ઘટક માટે ઓનલાઈન પૂર્વમંજૂરી મેળવેલી છે, તેમના માટે વહીવટી પ્રક્રિયા પૂર્ણ કરવાની અંતિમ તારીખ જાહેર કરવામાં આવી છે. જે ખેડૂતોએ પૂર્વમંજૂરી મેળવી લીધી છે, તેમણે સત્વરે પોતાના દસ્તાવેજો રજૂ કરવાના રહેશે.
દસ્તાવેજો અપલોડ કરવાની રીત અને સમયમર્યાદા
ખેડૂતમિત્રોએ નીચે મુજબની પ્રક્રિયા સમયમર્યાદામાં પૂર્ણ કરવાની રહેશે:
-
ઓનલાઈન પ્રક્રિયા: ખરીદીના અસલ બિલો અને અન્ય તમામ સાધનિક કાગળો i-khedut પોર્ટલ પર તા. ૧૫/૦૨/૨૦૨૬ સુધીમાં અપલોડ કરવાના રહેશે.
-
ઓફલાઈન જમા કરાવવા: ઓનલાઈન અપલોડ કર્યા બાદ, અરજીની કોપી અને કાગળોની નકલ નીચેના સરનામે રૂબરૂ અથવા ટપાલથી મોકલી આપવી.
સરનામું: નાયબ બાગાયત નિયામકની કચેરી, રાવપુરા પોલીસ સ્ટેશન પાછળ, વડોદરા.
સંપર્ક નંબર: ૦૨૬૫-૨૪૨૯૧૫૩
ખેડૂતો માટે ખાસ સૂચના
નાયબ બાગાયત નિયામક શ્રી, વડોદરા દ્વારા જણાવવામાં આવ્યું છે કે જો સમય મર્યાદામાં બિલો અપલોડ કરવામાં નહીં આવે અથવા કચેરીએ કાગળો જમા નહીં કરાવાય, તો સહાય મેળવવામાં મુશ્કેલી પડી શકે છે. આથી, વડોદરા જિલ્લાના તમામ પાત્રતા ધરાવતા ખેડૂતોએ આ પ્રક્રિયા સત્વરે પૂર્ણ કરવી.
