લોરેન્સ બિશનોઈ ગેંગ શું બોલિવૂડની નવી ‘D કંપની’ બનવા માંગે છે? સ્ટાર્સમાં ઉભો કરી રહી છે ડર
લોરેન્સ બિશનોઈ ગેંગ દ્વારા બોલિવૂડ અને પંજાબી મ્યુઝિક ઇન્ડસ્ટ્રીને નિશાન બનાવવામાં આવી રહી છે. રોહિત શેટ્ટીના ઘરની બહાર ફાયરિંગ સહિત અનેક સેલેબ્સને ધમકીઓ અને ખંડણીના કોલ આવ્યા છે. ગેંગનો હેતુ દાઉદ ઈબ્રાહિમની જેમ મુંબઈમાં દબદબો જમાવીને એક્સટોર્શન (ખંડણી) રેકેટ ચલાવવાનો હોવાનું જણાય છે.
છેલ્લા કેટલાક દિવસોમાં બોલિવૂડ અને પંજાબી મ્યુઝિક ઇન્ડસ્ટ્રી સાથે જોડાયેલા નામો પર જે રીતે ધમકીઓ, ફાયરિંગ અને પછી તેની જવાબદારી લેતી પોસ્ટ્સ સામે આવી છે, તેણે સમગ્ર એન્ટરટેઈનમેન્ટ ઇન્ડસ્ટ્રીમાં ડરનો માહોલ પેદા કર્યો છે. સવાલ એ છે કે શું લોરેન્સ બિશનોઈ ગેંગ એક મોટા કાવતરા હેઠળ બોલિવૂડને નિશાન બનાવીને ખંડણીનું રેકેટ ઉભું કરવા માંગે છે?
શનિવારે પ્રખ્યાત ફિલ્મ નિર્માતા રોહિત શેટ્ટીના ઘરની બહાર ગોળીબારની ઘટનાએ સમગ્ર બોલિવૂડને હચમચાવી દીધું હતું. આ ફાયરિંગ બાદ જે રીતે ગેંગસ્ટરોએ સોશિયલ મીડિયા પોસ્ટ દ્વારા હુમલાની જવાબદારી લીધી, તેનાથી હેતુ સ્પષ્ટ હતો કે રોહિત શેટ્ટીને ધમકાવીને સમગ્ર બોલિવૂડમાં લોરેન્સ ગેંગનો ડર પેદા કરવો.
પોસ્ટમાં શું લખવામાં આવ્યું?
ગેંગ તરફથી કરવામાં આવેલી પોસ્ટમાં લખ્યું હતું કે, “અમે જેમને જેમને કોલ કર્યા છે, તે બધા સમયસર લાઈન પર આવી જાય, નહીંતર બાબા સિદ્દીકી જેવી હાલત થશે.” લોરેન્સ ગેંગ તરફથી સામે આવેલી આ પોસ્ટ સીધી રીતે ડર પેદા કરવાની અને દબાણ લાવવાની વ્યૂહરચના તરફ ઈશારો કરે છે.
પંજાબી અને બોલિવૂડ ગાયકોને ધમકી
સૂત્રોના જણાવ્યા અનુસાર, રોહિત શેટ્ટી પહેલા પણ લોરેન્સ ગેંગે અનેક મોટા નામોને નિશાન બનાવ્યા હતા. પંજાબી અને બોલિવૂડમાં લોકપ્રિય ગીતો આપનાર ગાયક B Praak પાસે કથિત રીતે 10 કરોડ રૂપિયાની ખંડણી માંગવામાં આવી હતી.
એટલું જ નહીં, પંજાબી ગાયક દિલનૂરને પણ ધમકીભર્યા કોલ અને મેસેજ મોકલવામાં આવ્યા હતા. આ કેસોમાં પંજાબ પોલીસે હાલમાં જ FIR નોંધી છે. તપાસમાં સામે આવ્યું છે કે લોરેન્સ ગેંગ સાથે જોડાયેલા આરઝૂ બિશનોઈએ ન માત્ર ધમકી આપી, પરંતુ ઓડિયો મેસેજ મોકલીને ડરાવવાનો પ્રયાસ પણ કર્યો હતો.
ધમકી, ઓડિયો અને જવાબદારી – એક પેટર્ન?
રોહિત શેટ્ટીના ઘર પર ફાયરિંગ કર્યા પછી ઓડિયો મેસેજ જાહેર કરીને બોલિવૂડને ધમકાવવું, સોશિયલ મીડિયા પર પોસ્ટ મૂકીને જવાબદારી લેવી અને પછી સતત જાણીતા લોકોને કોલ કરવા. આ બધું કોઈ એક છૂટીછવાઈ ઘટનાનો હિસ્સો નથી, પરંતુ એક નક્કી કરેલી પેટર્ન તરફ ઈશારો કરે છે.
આમાં કેટલાક પ્રશ્નો ઉભા થાય છે:
- શું લોરેન્સ ગેંગ જાણી જોઈને બોલિવૂડ સેલિબ્રિટીઝને ધમકી આપીને પૈસા વસૂલવા માંગે છે?
- શું મુંબઈમાં એક પછી એક ફાયરિંગ કરીને પોતાનો ખોફ કાયમ કરવામાં આવી રહ્યો છે?
- શું રોહિત શેટ્ટી સિવાય પણ બોલિવૂડના અનેક લોકોને ધમકીભર્યા કોલ આવ્યા છે?
ડર કે મજબૂરી?
સૂત્રોનું કહેવું છે કે અનેક લોકો ડરના કારણે સામે નથી આવી રહ્યા. રોહિત શેટ્ટીને પણ પહેલા ધમકીભર્યા કોલ આવ્યા હતા, જેમને તેમણે કથિત રીતે નજરઅંદાજ કર્યા હતા. પરંતુ જ્યારે તેમના ઘરની બહાર ગોળીઓ ચાલી, ત્યારે મજબૂરીમાં મુંબઈ પોલીસને ફરિયાદ આપવી પડી.
જૂની ‘કંપની’ ની જેમ ‘સિક્કો જમાવવાની’ કોશિશ?
છેલ્લા બે વર્ષમાં જે રીતે લોરેન્સ બિશનોઈ ગેંગનું નામ મુંબઈના મોટા ગુનાઓ સાથે જોડાયું છે, તેનાથી હવે એ સ્પષ્ટ થઈ ગયું છે કે આ ગેંગ દાઉદ ઈબ્રાહિમના જૂના મોડલની જેમ મુંબઈમાં પોતાનું વર્ચસ્વ સ્થાપવા માંગે છે.
લોરેન્સ ગેંગની કમાન પહેલા ખુદ લોરેન્સ બિશનોઈના હાથમાં હતી, પરંતુ ભારતની જેલોમાં કડકાઈ બાદ અમેરિકામાં બેઠેલો તેનો ભાઈ અનમોલ બિશનોઈ ગેંગના ઓપરેશન જોવા લાગ્યો હતો. અનમોલના ભારત ડિપોર્ટ થતાની સાથે જ હવે કમાન અનમોલ અને લોરેન્સના ખાસ એવા આરઝૂ બિશનોઈના હાથમાં છે, જેણે રોહિત શેટ્ટીના ઘર પર ફાયરિંગની જવાબદારી લીધી છે.
